2 Ke xjal in che bet tuj tumel in che niman te Kman; atzun keju mya tuj tumel in che bet, icꞌun Kman cyuꞌn.

3 Tuj ttzi xjal mintiꞌ tnabl nneꞌtz yol te tnimbil tib; atzunju xjal at tnabl at colbilte tuj tyol.

4 Ka mintiꞌ boys tuꞌn cychꞌoquin twitz txꞌotxꞌ, ax icx mintiꞌ twitz awal tuj txꞌutxꞌ; tuꞌn cyipun boys in jaw nim twitz awal.

5 Aju testiw axix toc tyol mintiꞌ in nicꞌan yol; atzunju testiw mya ax toc tyol nimxix in nicꞌan yol.

6 Aju xjal baꞌn xmayin in jyon tiꞌj nabl ex mintiꞌ in cnet tuꞌn; atzunju xjal at tojtzkibl jurat nneꞌl tnicꞌ tiꞌj.

7 Paꞌn el tiba tiꞌj ju xjal mintiꞌ tnabl, porque mlay tcꞌama jun yol te ojtzkibl tuꞌn.

8 Aju xjal at tnabl, tuꞌnju ojtzkibl nneꞌl tnicꞌ tiꞌj alcye tuꞌn tbant tuꞌn, atzunju xjal mintiꞌ tnabl, in cub t-sbun tib tuꞌnx t-ximbetz mya baꞌn.

9 Ke xjal mintiꞌ cynabl mintiꞌ in che xob tuꞌn cybinchante mya baꞌn, atzun ke xjal in che bet tuj tumelxix in che tzalaj cyucꞌil mastl.

10 Baꞌn tuꞌn tanmi xjal alcye taꞌw toc tiꞌj, ex mi aꞌl juntl xjal jacu tzꞌel tnicꞌ tiꞌj ttzalajbil.

11 Aju cyja xjal binchal mya baꞌn cbajel xitj; atzun keju ateꞌ tuj tja ke xjal tzꞌaklxix cucx che tel tuj tzalajbil.

12 At be jikun tiꞌj tuj twitz xjal, pero aju bajsbilte in pon tuj camic.

13 At xjal in che tzeꞌn pero tuj cyanmi at taꞌw, ex octzun tbaj tzalajbil in tzaj bis.

14 Aju xjal nneꞌl tpaꞌn tib tiꞌj Dios, ax ke tbinchben tzul kꞌinte bis tiꞌj, atzunju xjal baꞌn, ax ke tbinchben tzul kꞌinte tzalajbil te.

15 Aju xjal mintiꞌ tnabl in xi tniman tcyakil aju in tzaj kꞌmaꞌn te; atzunju xjal at tnabl toc tcwent tiꞌj jatum in bet.

16 Aju xjal at tnabl in xob tiꞌj ju mya baꞌn ex nneꞌl tpaꞌn tib tiꞌj, atzunju xjal mintiꞌ tnabl jurat in jaw cyakpaj ex tuj twitz ka baꞌn taꞌ.

17 Aju xjal jurat in jaw kꞌojl in bant jun tiꞌxti tuꞌn mya tuj ttxolil; atzunju xjal jawni twitz tuꞌn t-sbuꞌn cꞌelel icꞌun.

18 Ke xjal mintiꞌ cynabl in che oc te tajwil ju mintiꞌ tajben; atzun ke xjal at cynabl nojni cywiꞌ tuꞌn ojtzkibl.

19 Ke xjal mya baꞌn che bel mocꞌeꞌ cywitz ke xjal baꞌn cymod; ex ke xjal binchal mya baꞌn che cubsal ttzi cyja ke xjal tzꞌaklxix.

20 Aju xjal meba nneꞌl icꞌun cyuꞌnx ke tamiw; atzunju xjal kꞌinun nim tamiw at.

21 Aju xjal nneꞌl icꞌunte tucꞌil, in binchan il tuꞌn jlu, atzunju xjal in tzaj tzꞌeꞌy tcꞌuꞌj cyiꞌj ke xjal meba, at tzalajbil te.

22 Ke xjal in che ximan tuꞌn cybinchante mya baꞌn, in che el tzpet tiꞌj be; atzun keju in che ximan tuꞌn cybinchante baꞌn, ctel cycꞌujlalil xjal cyiꞌj ex cjapunel yol tziyimaj cye.

23 Aju xjal in akꞌnan, at tcambabl tiꞌj jlu, atzunju xjal nok laꞌjbil nnoꞌc tilil tuꞌn, nok mebayil in tzaj tiꞌj.

24 Aju tkꞌinumabl ju xjal at tnabl ic tten ic tzaꞌn jun coron tjax tuj twiꞌ; atzun keju mintiꞌ cynabl, oꞌcx in cybinchaꞌn aju mya tuj ttxolil.

25 Aju testiw axix toc tyol in che clet xjal tuꞌn; atzunju testiw mya ax toc tyol, in nicꞌan yol.

26 Ka in ko xob twitz Kman Dios ex ka in ko niman te, tuꞌn jlu in keꞌxix kcꞌuꞌj, ex tuꞌnx jlu che tel ke kcꞌwaꞌl tuj segur.

27 Aju tuꞌn kniman te Kman Dios, chwinklal in tzaj tkꞌoꞌn, ex in ko clet tuꞌn tuꞌn miꞌn ktzyet tuꞌn camic.

28 Ka in cawin rey cyibaj nimcu xjal, a jlu jun nimbil te, pero ka in cawin cyibaj nicꞌxi xjal, a jlu jun xitbil te.

29 Aju xjal mya jurat in tzaj tkꞌoj, at nim tnabl, atzunju xjal jurat in tzaj tkꞌoj, mintiꞌ tnabl.

30 Ka kꞌukl tcꞌuꞌj jun xjal, chwinklal jlu te t-ximlal, atzunju xjal cye loꞌch tcꞌuꞌj, in che baj kꞌay ke tbakil.

31 Aju xjal in baj yajlante cye xjal meba, icꞌun Dios tuꞌn, aju Binchalte cye, atzunju xjal at tkꞌakꞌbil tcꞌuꞌj cyiꞌj ke xjal meba, in niman te Dios.

32 Aju xjal binchal mya baꞌn in naj tuꞌnxju mya baꞌn in bant tuꞌn; atzunju xjal tzꞌaklxix at colbil te oc tcyim.

33 Atzun taꞌ nabl tuj tanmi xjal at tojtzkibl, atzun ke xjal mintiꞌ cynabl misicyer nneꞌl cynicꞌ tiꞌj.

34 Ka tzꞌaklxix ke xjal tuj jun nasyon, tuꞌn jlu cjawil nimsaꞌn, katzun mya baꞌn cybinchben xjal tuj jun nasyon, nok chꞌixbil in tzaj tuꞌn.

35 In tzalaj rey cyiꞌj ke xjal secꞌ cynabl, akeju in che ajben te, pero in tzaj tkꞌoj cyiꞌj keju mya secꞌ cynabl.