2 Ke xjal baꞌn in cycꞌmoꞌn jun oyaj tiꞌj ju yol baꞌn in cymaꞌn, atzun keju in che oc meltzꞌaj cyiꞌj cyucꞌil, mas cyaj tuꞌn cyyajlan cyiꞌj xjal.

3 Aju xjal toc tcwent tiꞌj tyol, nnoꞌc tcwentin tib, atzunju xjal jawni yolin, tuꞌnx tib in naj.

4 Aju xjal cyꞌaj, nim tgan tuꞌn tten jun tiꞌxti te, pero mintiꞌ in cnet tuꞌn, atzunju xjal akꞌnal in cnet nim tuꞌn.

5 Aju xjal tzꞌaklxix, icꞌun nicꞌaj yol tuꞌn, atzunju xjal mya baꞌn, tuꞌnx in tzaj tiꞌn tchꞌixwi ex icꞌbil te.

6 Aju xjal mintiꞌ til, cwentin tuꞌnju in bet tuj tumel, atzunju xjal aj il, tuꞌnx tbinchben mya baꞌn in naj.

7 At junjun xjal misicyer chꞌin at cye ex nnoꞌc cykꞌon cyib ic tzaꞌn kꞌinun; ex at junjuntl tcyakil at cye, pero nnoꞌc cykꞌon cyib ic tzaꞌn meba.

8 Aju xjal kꞌinun in clet tuꞌn tkꞌinumabl tuꞌn miꞌn tcub byoꞌn, atzunju xjal meba mlay che pon ke elekꞌ xobtzal te.

9 Ke xjal tzꞌaklxix ic cyten ic tzaꞌn jun spicꞌun in koptzꞌaj, atzun ke xjal mya baꞌn, ic cyten ic tzaꞌn jun candil in cuꞌx yupj.

10 Aju xjal in jaw tniman tib, nok kꞌoj in jyon tiꞌj, atzun keju in xi cybiꞌn consej, at cynabl.

11 Aju kꞌinumabl jurat naj in cnet, nok chꞌin in ten, atzunju cheba in cnet, in chꞌiy.

12 Ka at jun tiꞌxti in ko ayon tiꞌj ex ka mintiꞌ ma tzul, tzul bis tuj kanmi tuꞌn, pero ka ma kcꞌam aju at kgan tiꞌj, ko tzalajel.

13 Aju xjal mintiꞌ in xi tniman aju xnakꞌtzbil, tzul tilil tuꞌn, atzunju xjal in xi tniman ju mandamyent, tzul kꞌoꞌn t-xel te.

14 Aju xnakꞌtzbil tuꞌn xjal at tnabl in tzaj tkꞌoꞌn kchwinklal ex in ko clet tuꞌn, tuꞌn miꞌn ktzyet tuꞌn camic.

15 Aju xjal baꞌn tnabl in che tzalaj xjal tiꞌj, atzun ke xjal in che oc meltzꞌaj cyiꞌj cyucꞌil, cyjaꞌ cyxiꞌ tuj najen.

16 Aju xjal at tnabl in tbinchaꞌn jun tiꞌxti tuꞌn tojtzkibl, atzunju xjal mintiꞌ tnabl, tuꞌnx in tyecꞌun ka mintiꞌ baꞌn tuꞌn.

17 Aju sanjel mya baꞌn in tzaj tiꞌn xitbil cyibaj xjal, atzunju sanjel in japunxix tuꞌn, in onin tuꞌn cyten xjal tuj txubtxaj.

18 Mebayil ex chꞌixbajil tzul tibaj ju xjal nneꞌl ticꞌun consej baꞌn, atzunju xjal in cub tuj twitz oc toc mayoꞌn tiꞌj mya baꞌn, nimxix cjawil nimsaꞌn.

19 Aju in pon tcꞌuꞌj xjal tiꞌj ex in cnet tuꞌn, in tkꞌoꞌn tzalajbil te. Ke xjal mintiꞌ cynabl mintiꞌ nnicꞌx cyuꞌn tuꞌn tel cypaꞌn cyib tiꞌj mya baꞌn.

20 Ka ma tzꞌoc tjunin tiba cyucꞌil ke xjal at cynabl, ctel tnabla, katzun ma tzꞌoc tjunin tiba cyucꞌil ke xjal mintiꞌ cynabl, cnajela.

21 Ke xjal aj il in che yajlanjtz tuꞌn mya baꞌn; atzun ke xjal tzꞌaklxix in cycꞌmoꞌn ju baꞌn te chojbil cye.

22 Aju xjal baꞌn tmod in cyaj tkꞌoꞌn cyetzbil ke tal tchman; atzun tkꞌinumabl ju xjal aj il, cꞌuꞌn te cye ke xjal tzꞌaklxix.

23 Tuj cycojbil ke xjal meba at nim twitz awal, pero jacu cub naj jlu tuꞌnju mintiꞌ in cybinchaꞌn xjal aju tzꞌaklxix.

24 Aju xjal mintiꞌ in xi tcawin tcꞌwaꞌl, nneꞌl ticꞌun; atzunju cꞌujlaꞌn tcꞌwaꞌl tuꞌn, in xi tcawin.

25 Aju xjal tzꞌaklxix in waꞌn ex in noj tcꞌuꞌj, atzunju xjal binchal mya baꞌn in waꞌn ex mintiꞌ in noj tcꞌuꞌj.