26
Mya tuj tumel ka ma tzaj tkꞌab cheꞌw tuj tkꞌijlalil cyak, ex mya tuj tumel ka ma tzaj jbal oc tjaw chmet twitz awal, ax icxtzun mya tuj tumel tuꞌn t-xi kꞌot nimbil te jun xjal mintiꞌ tnabl.2 Ic tzaꞌn jun tal tzꞌunin nneꞌl tzpet ex ic tzaꞌn jun xtxꞌaꞌyil in lipan twitz cyaꞌj, ictzun tten ju mya baꞌn in xi cykanin xjal tiꞌj juntl; ka mintiꞌ til xjal mlay japun jlu.
3 Baꞌn tuꞌn tcub mansit chej tuꞌn asyal, atzunte bur baꞌn tuꞌn tocx pren tuj ttziꞌ, atzunju xjal mintiꞌ tnabl, baꞌn tuꞌn t-xi jatet tasyal.
4 Miꞌn txi ttzakꞌweꞌna tyol xjal mintiꞌ tnabl tucꞌil yol mintiꞌ tnabl, tuꞌntzun miꞌn tpona ic tzaꞌn te.
5 Tzakꞌwenxa ju xjal mintiꞌ tnabl ic tzaꞌnxju tyol, tuꞌntzun miꞌn toc tkꞌon tib at tnabl.
6 Ka ma txi ksamaꞌn jun xjal mintiꞌ tnabl te ksanjel, a jlu mer ic tzaꞌn nneꞌl txꞌemin ke kkan ex in tzaj mya baꞌn kiꞌj.
7 Ic tzaꞌn jun xjal cox mya segur ateꞌ ke tkan, icxtzun tten ju yol te xnakꞌtzbil tuꞌnju xjal mintiꞌ tnabl.
8 Ic tzaꞌn jun xjal nnoꞌcx tcꞌaloꞌn jun abj tuj jun xobl te, mya baꞌn jlu, icxtzun tten ju xjal in xi kꞌonte nimbil teju xjal mintiꞌ tnabl.
9 Ic tzaꞌn chꞌiꞌx in xiꞌ tuj tkꞌab jun xjal cꞌal kꞌeꞌn, ictzun tten jun yol te xnakꞌtzbil tuꞌnju xjal mintiꞌ tnabl.
10 Ic tzaꞌn ju xjal in xi t-xoꞌn plech tiꞌj nok alcyex jun xjal nnicꞌ bet, icxtzun tten aju in xi kꞌonte takꞌun jun xjal mintiꞌ tnabl ex nok in betjeꞌ.
11 Ic tzaꞌn jun txꞌyan nnaꞌj meltzꞌaj loꞌl t-xaꞌw juntl maj, ictzun tten ju xjal mintiꞌ tnabl nnaꞌj meltzꞌaj juntl maj binchalte mya baꞌn.
12 Mas baꞌn chꞌintl te xjal mintiꞌ tnabl, twitzju xjal nnoꞌc tkꞌon tib te at tnabl.
13 Aju xjal tcꞌiꞌ tzꞌakꞌnan in tmaꞌn cyjaꞌ: Tuj cay at jun balun tcubsaꞌn ex tuj be tcubsaꞌn juntl.
14 Ic tzaꞌn tlamel ja in yucch cyuꞌn ke visagr cyoc tiꞌj, icxtzun tten ju xjal cyꞌaj nok in tol ticꞌ tuj tcoẍbil.
15 Aju xjal cyꞌaj in xi tlamoꞌn tkꞌab tuj lak tuꞌn twaꞌn, pero mintiꞌ nnoꞌc tilil tuꞌn tuꞌn tpon canun tuj ttziꞌ.
16 Aju xjal cyꞌaj nnoꞌc tkꞌon tib mas at tnabl cywitz wuk xjal baꞌn ttzakꞌwenjtz yol cyuꞌn tuj tumelxix.
17 Aju xjal nnoꞌcx tkꞌon tib tuj jun kꞌoj mintiꞌ toclen tiꞌj, junx taꞌ ic tzaꞌn jun xjal in tzaj ttzyuꞌn jun txꞌyan cyiꞌj twi t-ẍcyin.
18 Ic tzaꞌn jun xjal in tzaj tuj twitz in cheꞌx t-xoꞌn ke plech in cꞌant kꞌakꞌ cyiꞌj ex ke plech in che naj xjal tuꞌn,
19 ictzun tten ju xjal in cub t-sbuꞌn tamiw, ex te tibajxi in tmaꞌn: Nok jun laꞌjbil jlu chi.
20 Ka mintiꞌ siꞌ in cuꞌx yupj kꞌakꞌ, ex ka mi aꞌl jun xjal in siꞌmin yol in baj kꞌoj.
21 Aju xkꞌaꞌl at tajben tuꞌn tjaw cꞌant kꞌakꞌ tiꞌj; aju siꞌ at tajben tuꞌn tocx tuj kꞌakꞌ; ex tuꞌnju xjal jawni kꞌojl in tzaj mastl kꞌoj.
22 Aju tyol xjal siꞌmil yol ic tten ic tzaꞌn jun tiꞌxti nnoꞌcx tuj ttziꞌ puro chiꞌ wen, ex max in cuꞌpun tuj tcꞌuꞌj.
23 Ic tzaꞌn jun cꞌil txꞌotxꞌ ttxꞌotxꞌil toc tcꞌaꞌ sak pwak, ictzun tten tyol xjal cyeꞌyix tbinx atzunju t-ximbetz mya baꞌn.
24 Aju xjal in icꞌun tiꞌj juntl mintiꞌ in xi tyecꞌun t-ximbetz oc tyolin, pero tuj tanmi in baj t-ximan mya baꞌn;
25 ka ma yolin tuj mansbajil teya, miꞌn txi tnimana porque aju t-ximbetz nojni tuꞌn mya baꞌn;
26 masque cub tewan tkꞌoj, pero aju tbinchben mya baꞌn cꞌelel tuj kꞌanchaꞌl cywitz cycyakil xjal.
27 Alcye jun xjal in cuꞌx lacunte jun jul tuꞌn t-xi tzꞌak juntl xjal tuj, axte cbelex tzꞌak tuj; ex alcye jun in xi tolinte jun abj tibaj juntl xjal, tibajx in tzaj tolj abj.
28 Aju xjal nicꞌal yol nneꞌl ticꞌun aju axix toc, ex aju xjal mejor xmoxin tuꞌn t-sbun, xitbil in tzaj tuꞌn.