2 Mas baꞌn ka ma jaw nimsaꞌna cyuꞌn mastl xjal, porque mya baꞌn tuꞌn tjaw tnimsan tiba tuꞌnxa.

3 Ke abj ex ju ttxa tzꞌaꞌn puro al ke, pero masxix al nneꞌl tkꞌoj ju xjal mintiꞌ tnabl.

4 Aju at tkꞌoj tiꞌj juntl mlay tzaj kꞌakꞌan tcꞌuꞌj tiꞌj, ex ka ma tzaj ttxꞌuꞌjil tiꞌj juntl jacu naj xjal tuꞌn, atzunju xjal at tloꞌch tcꞌuꞌj tiꞌj juntl, mintiꞌ tumel tuꞌn tyupj naj.

5 Mas baꞌn tuꞌn toc kmaꞌn jun yol tibaj twitz jun xjal, twitzju tuꞌn kcꞌujlante te ex mintiꞌ in xi kmaꞌn.

6 Mas jacu keꞌ kcꞌuꞌj tiꞌj jun kamiw in ko cꞌixbisanjtz tuꞌn, twitzju tuꞌn tkeꞌ kcꞌuꞌj tiꞌj aj kꞌoj kiꞌj ka ma ko tzaj tchleꞌn.

7 Aju xjal nojni tcꞌuꞌj nneꞌl ticꞌun taꞌl cab, atzunju xjal nneꞌl tcꞌuꞌj, masque cꞌa aju in xiꞌ tuꞌn, pero chiꞌ nneꞌla tuj ttziꞌ.

8 Aju xjal in cyaj tcolin tja tman tuꞌn t-xiꞌ tuj juntl lugar najchak, ic tten ic tzaꞌn jun chyuꞌj in cyaj tcolin tkꞌuꞌ ex in xiꞌ najchak.

9 Cyuꞌn ke perjum mejorxix in tzalaj tanmi xjal; ex cyuꞌn ke consej baꞌn in jaw tzalaj tanmi xjal.

10 Miꞌn che cyaj tcolina ke tamiwoya, ex mi ke tamiw tmana; cyjaꞌtzun mya il tiꞌj tuꞌn t-xiꞌya tja termaniya ka at jun tiꞌxti mya baꞌn ma tzaj tiꞌja. Mas baꞌn jun tvesina nikayin taꞌ, twitz jun termaniya najchak taꞌ.

11 Ncꞌwaꞌl, toca at tnabla, tuꞌntzun ntzalaje tiꞌja; cyjaꞌtzun jacu che tzakꞌwet wuꞌne keju in che yolin mya baꞌn wiꞌje tuꞌn tlaja.

12 Aju xjal at tnabl, oc ttil cyjaꞌ ttzaj mya baꞌn, nneꞌl ok tiꞌj; atzunju xjal mintiꞌ tnabl, nok cyjaꞌ in xiꞌ lakꞌeꞌ tuj tbe ex in tzaj mya baꞌn tiꞌj.

13 Kꞌiꞌn ela t-xbalun aju xjal in cyaj weꞌ tiꞌj tcꞌas juntl ka mintiꞌ ojtzkiꞌn tuꞌn, ex axtzun tzyun cyaja te jun prent.

14 Aju xjal in pon kꞌolbelte tamiw tucꞌil tkꞌajkꞌajel twi cyuw ex prim wen, a jlu mer ic tzaꞌn jun mya baꞌn in tzaj tkanin tiꞌj tamiw.

15 Aju xuꞌj jawni kꞌojl ic tten ic tzaꞌn tzꞌuj mintiꞌ in weꞌ tuj tkꞌijlalil jbal;

16 aju xjal taj tuꞌn tmayet xuꞌj lu tuꞌn, junx taꞌ ic tzaꞌn jun xjal tajbil tuꞌn tmayet cykꞌikꞌ tuꞌn, ex ka tuꞌn ttzyet aseyt tuꞌn tkꞌab.

17 Aju cꞌuxbil, in japun ttziꞌ tuꞌn juntl cꞌuxbil, ex aju xjal nnoꞌc tnabl tuꞌn t-xnakꞌtzbil juntl xjal.

18 Aju xjal cwentin tkan higo tuꞌn, cloꞌl tiꞌj twitz; ex aju xjal cwentin tpatrón tuꞌn, oc tcꞌmaꞌ nimbil te.

19 Ic tzaꞌn aꞌ malecj kwitz oc tcuꞌx kqueꞌyin tuj, icxtzun cyten ke xjal, malecj ke tuj cyximbetz.

20 Aju cynajbil cyimni tucꞌix ju mukbil in che pon cyimni cyuj pero mintiꞌ in che noj, ictzun tten ju xjal in pon tcꞌuꞌj tiꞌj nimcu ex mintiꞌ in keꞌ tcꞌuꞌj tiꞌj ju at te.

21 Aju kꞌan pwak ex ju sak pwak, tuꞌn kꞌakꞌ nneꞌl nicꞌbaj cyiꞌj; atzunju xjal nneꞌl nicꞌbaj tiꞌj tuꞌnju nimbil te.

22 Aju xjal mintiꞌ tnabl mlayx cyaj tcolin aju tchcyinibil masque baj tcꞌixbisaꞌna wen.

23 Che tqueꞌyin baja ke t-ẍneꞌla, ex cwentin oca ke taluna,

24 porque mi jun kꞌinumabl ex mi jun cyoclen xjal ctel te jumajx.

25 Oc tjaw jlet chꞌim tucꞌix chaꞌx cꞌul, ex oc tjaw chmet cꞌul te tjakꞌ cꞌul te cywa alumaj,

26 cyiꞌj ke t-ẍneꞌla cꞌelel lan tuꞌn tbant t-xbaluna tiꞌj; ex cyiꞌj ke tchipa cnetel tpwaka tuꞌn tlakꞌet ttxꞌotxꞌa,

27 ex cyiꞌj ke ttxu tchipa cꞌelel nim lech tuꞌn tcꞌana tiꞌj, cyucꞌix ke tcꞌwaꞌla ex cycyakil ke tmajena.