2 Tuꞌnju nim mya baꞌn in bant tuj jun tnam in che oc kꞌoꞌn nim xjal te cawil, pero tuꞌn jun xjal at tnabl ex tojtzkibl jacu ten tcyakil tuj tumel.

3 Aju xjal meba ex in yajlan cyiꞌj ke mastl meba xjal, ic tten jlu ic tzaꞌn nim jbal in tzaj, biꞌx in baj naj awal tuꞌn.

4 Ke xjal mintiꞌ in japun ley cyuꞌn, in jaw cynimsaꞌn ke xjal binchal mya baꞌn; atzun ke xjal in japun ley cyuꞌn, at cykꞌoj cyiꞌj keju mintiꞌ in japun cyuꞌn.

5 Ke xjal binchal mya baꞌn mintiꞌ nneꞌl cynicꞌ tiꞌj ju tzꞌaklxix, atzun ke xjal in che niman te Kman, nneꞌl cynicꞌ tiꞌj tcyakil.

6 Masque meba te xjal pero ka baꞌn tmod, atzun jlu mas baꞌn twitz ju xjal kꞌinun ex sbul.

7 Aju xjal in japun tley Dios tuꞌn, atzun jun cꞌwaꞌlbaj at tnabl, atzunju xjal nnoꞌc tucꞌin tib cyucꞌil keju cykꞌon cyib tuj achbil, tchꞌixwi tman in cub tkꞌoꞌn.

8 Aju xjal in baj tchmoꞌn tkꞌinumabl nok tuꞌn ju taꞌl pwak nneꞌl tkanin, in baj tchmoꞌn tuꞌn toc teju xjal baꞌn tzꞌeꞌy tcꞌuꞌj cyiꞌj ke xjal meba.

9 Aju xjal tcꞌiꞌ txi tbiꞌn tley Dios, ax icx te mlay tzaj tbiꞌn Dios aju tnaꞌj Dios.

10 Aju xjal in cheꞌx tiꞌn ke xjal tzꞌaklxix tuj be mya baꞌn, ax te xjal lu cbel tzꞌak tujx tcꞌobil, atzun ke xjal mintiꞌ cypaltil, ctzajel cycꞌmoꞌn ju baꞌn.

11 Aju xjal kꞌinun nnoꞌc tkꞌon tib te at tnabl, pero aju xjal meba ex at tnabl, jacu tzꞌel tnicꞌ tiꞌj ka mintiꞌ tnabl kꞌinun.

12 Oc cycamban ke xjal tzꞌaklxix, nnoꞌc jun nintz ninkꞌij cyuꞌn xjal; pero oc cycamban ke xjal binchal mya baꞌn, biꞌx in xi cyewan cyib xjal.

13 Aju xjal in che cub tewan ke til, mlay tzꞌel baꞌn te te; atzunju xjal in jatz tmaꞌn til ex biꞌx nneꞌl tpaꞌn tib tiꞌj, cbel najsaꞌn til.

14 At tzalajbil teju xjal cucx in niman te Dios; atzunju xjal in cub tcyuwsaꞌn tanmi, cbel tzꞌak tuj mya baꞌn.

15 Aju xjal binchal mya baꞌn ex toc te cawil tibaj jun tnam meba, ic tten ic tzaꞌn jun balun in tzanun wen ex ka ic tzaꞌn jun txcup oso at weꞌyaj tiꞌj.

16 Aju cawil mintiꞌ tnabl nok nnoꞌc ten yajlal cye xjal; atzunju cawil mintiꞌ in pon tcuꞌj tiꞌj jun tiꞌxti, nim kꞌij ctel twitz txꞌotxꞌ.

17 Aju xjal otok cub byonte jun xjal, cꞌokjebil, max cwebil tuꞌn tel ok ocxi tcyim ex mi aꞌl jun jacu onin te.

18 Aju xjal baꞌn tmod oc cletel, atzunju xjal tkꞌon tib jumajx tuj mya baꞌn, ctzajel mya baꞌn tibaj.

19 Aju xjal in akꞌnan twitz ttxꞌotxꞌ, ctel nim twa; atzunju xjal nnoꞌc lpeꞌ cyiꞌj keju mintiꞌ in che akꞌnan, ctel tuj mebayil.

20 Aju xjal axix toc yolin, cbel cyꞌiwlaꞌn nimxix; atzunju xjal taj tuꞌn toc naj te kꞌinun, mlayx tzꞌicx tiꞌj tuꞌn miꞌn tcub tcastiw.

21 Mya baꞌn tuꞌn toc kkꞌoꞌn kwitz tiꞌj t-xilen xjal; nokpe tuꞌn chꞌin cotzbaj in xi kꞌoꞌn te jwes in binchan il.

22 Aju xjal oꞌcx toc tcꞌuꞌj tiꞌj kꞌinumabl ex taj tuꞌn tcnet jurat naj, mintiꞌ baꞌn tuꞌn ka tzul mebayil tibaj.

23 Aju xjal in xi cawin te juntl, te tibajxi mas che tzalajel xjal tiꞌj twitz jun xjal mejor xmoxin tuꞌn t-sbun.

24 Aju xjal nneꞌl elkꞌante aju at te tman ex te ttxuꞌ, ex in tmaꞌn ka mya il aju otok tbincha, junx taꞌ til tucꞌil til jun xjal byol xjal.

25 Aju xjal in pon tcꞌuꞌj tiꞌj nimcu, nok kꞌoj in tzaj tuꞌn; atzunju xjal kꞌukl tcꞌuꞌj tiꞌj Kman, baꞌn nneꞌla tcyakil te.

26 Aju xjal nnoꞌc keꞌ tcꞌuꞌj tiꞌj tex t-ximbetz mintiꞌ tnabl; aju xjal in tbinchaꞌn jun tiꞌxti tucꞌil nabl oc cletel.

27 Aju xjal in onin tiꞌj jun xjal meba, mintiꞌ jun atx taj ctel te; atzunju xjal mintiꞌ in xi tkꞌoꞌn jun onbil te jun xjal meba, cxel cykanin xjal nimcu mya baꞌn tibaj.

28 Oc cycamban ke xjal binchal mya baꞌn, biꞌx in xi cyewan cyib xjal; ex octzun cynaj ke jlu, cchmetel cybaj ke xjal tzꞌaklxix.