2 Oc cycawin ke xjal tzꞌaklxix, in che jaw tzalaj ke xjal; octzun cycawin ke xjal mya baꞌn, biꞌx in che jaw ayayan xjal tuꞌn cybis.

3 Aju cꞌwaꞌlbaj at tnabl in jaw tzalaj tman tuꞌn; atzunju cꞌwaꞌlbaj in xiꞌ cyucꞌil ke xuꞌj jawni cywitz cyucꞌil xinak, cbel naj tkꞌinumabl.

4 Aju rey in xi tbinchaꞌn tiꞌj tcyakil tuj tumelxix in tcyuwsaꞌn ttanmi; atzunju rey oꞌcx in kanin chojenj cyibaj xjal in naj ttanmi tuꞌn.

5 Aju xjal nnoꞌc ten kꞌmalte yol baꞌn nok tuꞌn tcub t-sbuꞌn jun tucꞌil, in cub tkꞌoꞌn jun cꞌobil tuj tex tbe.

6 Ax ke til xjal binchal mya baꞌn in che oc te jun cꞌobil te; atzunju xjal tzꞌaklxix in bitzan ex in tzalaj.

7 Aju xjal tzꞌaklxix in colin cyiꞌj ke xjal meba ex in onin cyiꞌj, atzunju xjal binchal mya baꞌn mintiꞌ taj cyiꞌj.

8 Ke xjal jyol kꞌoj, in che jaw tilj tnam xjal cyuꞌn; atzun ke xjal at cynabl, in chewix kꞌoj cyuꞌn.

9 Ka ma tzꞌetz tkꞌoj jun xjal at tnabl tucꞌil jun xjal mintiꞌ tnabl, ate xjal mintiꞌ tnabl nok in jaw kꞌojl, nnoꞌc ten xmayil ex mlayx bant tiꞌj kꞌoj cyuꞌn.

10 Ke xjal byol xjal ke, icꞌun ju xjal baꞌn tmod cyuꞌn, atzun ke xjal baꞌn cymod in che jyon tzaꞌn tten tuꞌn cytzalaj.

11 Aju xjal mintiꞌ tnabl in xi ttzokpin tib tuꞌn tkꞌojin, atzunju xjal at tnabl in tjacꞌunte tib tuꞌn miꞌn tkꞌojin.

12 Ka at jun cawil in xi tkꞌoꞌn twiꞌ cyiꞌj ke nicꞌaj yol, cycyakil xjal at cyoclen ttxlaj che oquel te mya baꞌn.

13 Aju xjal meba ex ju xjal in yajlante te, at jun in cycꞌmoꞌn cycabil; tuꞌn Kman xi tkꞌoꞌn ke tbakꞌ cywitz cycabil.

14 Aju rey in cawin tuj tumelxix cyibaj ke xjal meba cucx ccawil te jumajx.

15 Ka ma txi cawin jun cꞌwaꞌl ex ma txiꞌ tasyal, tuꞌn jlu nnoꞌc tnabl, atzunju cꞌwaꞌlbaj in xi kꞌoꞌn ambil te tuꞌn tbinchante nok alcye tajbil, jun chꞌixbil jlu te ttxuꞌ.

16 Ka ma chmet nim xjal binchal mya baꞌn, ax icx in chmet nim il; pero ke xjal tzꞌaklxix oc cyilaꞌ oc cycub tzꞌak ke jlu.

17 Cawinx tcꞌwaꞌla ex cꞌankꞌiltzuna tuꞌn tuj txubtxaj, ex nim jacu tzalaja tiꞌj.

18 Jatum mintiꞌ jun t-sanjel Dios tuj jun tnam, mya tuj ttxolil in che ankꞌin xjal, pero at tzalajbil teju xjal in japun tley Dios tuꞌn.

19 Nok tuꞌn yol mlay txi cawit aju majen, masque tzꞌex tuj twiꞌ pero mlay txi tniman.

20 Mas baꞌn chꞌintl te xjal mintiꞌ tnabl twitzju xjal jurat in yolin naj ex mintiꞌ in ximan tiꞌj tyol.

21 Aju xjal mi tel-len jun tmajen tuꞌn atxix tuj tneꞌyilx majen, te bajsbil mya baꞌn cꞌelel te patrón lu.

22 Aju xjal jawni kꞌojl, nok kꞌoj in tzaj tiꞌn, ex aju xjal txꞌuꞌj twiꞌ, nok cyjaꞌ tchmet til.

23 Aju xjal in jaw tniman tib, cꞌoquel kꞌoꞌn te chꞌin toclen, atzunju xjal mans, cjawil nimsaꞌn.

24 Aju xjal nnoꞌc tucꞌin tib tucꞌil jun elekꞌ, tuꞌnx nneꞌl ticꞌun tib, ex masque tbi ke mya baꞌn che tzajel tiꞌj, pero mintiꞌ in jatz tmaꞌn til.

25 Aju xjal in tzaj t-xobil twitz juntl xjal, jun cꞌobil jlu te te, atzunju xjal kꞌukl tcꞌuꞌj tiꞌj Kman, ctel tuj segur.

26 Nimcu xjal in che jyon tiꞌj jun xtalbil tuꞌn jun cawil, pero oꞌcxte Kman in xi binchante tiꞌj tcyakil tuj tumelxix.

27 Ke xjal tzꞌaklxix, in che icꞌun cyiꞌj ke xjal mya baꞌn, ex ke xjal binchal mya baꞌn, in che icꞌun cyiꞌj ke xjal tzꞌaklxix.