2 Akine mintiꞌ nnable ic tzaꞌn ke mastl xinak, ex mintiꞌ wojtzkible ic tzaꞌn cye mastl xjal.

3 Mintiꞌ o chin xnakꞌtzane tiꞌj tuꞌn toc nnable, ex mintiꞌ baꞌn wuꞌne tiꞌj ju Dios xjan.

4 ¿Alcye o txiꞌ aj ex o cuꞌtz tuj cyaꞌj? ¿Alcye jun o cub tzyunte cykꞌikꞌ tuj tkꞌab? ¿Alcye jun o baj balkꞌinte mar tuj t-xbalun te txaybil tiꞌj? ¿Alcye jun o cub kꞌonte ke tmojonil txꞌotxꞌ? Ka baꞌn tuꞌna, kꞌmantza weye ti tbi ex ti tbi tcꞌwaꞌl.

5 Tcyakil tyol Dios puro tzꞌaklxix ex mintiꞌ tpaltil; ex ate Kman cwentil cye keju kꞌukl cycꞌuꞌj tiꞌj.

6 Miꞌn tzꞌoc ttzꞌaksaꞌna juntl yol tiꞌj ju in tzaj tmaꞌn, tuꞌntzun miꞌn toc mayoꞌna tuꞌn ex tuꞌn miꞌn toc kꞌoꞌna te nicꞌal yol tuꞌn.

7 Nok cabe nkanbetze ma txi nkanine teya Nman Dios; kꞌontza ke jlu weye naꞌnxtok ncyime:

8 Kꞌiꞌn ela ju mintiꞌ tajben ex ju nicꞌaj yol wiꞌje, ex miꞌn chin oc tkꞌoꞌna te kꞌinun ex mi te meba; oꞌcx kꞌontza aju nwaye at tajben;

9 porque ka ma sobryin nwaye, jacu bant tcub wewane ex jacu bant t-xi nmaꞌne ka mintiꞌ ojtzkiꞌna wuꞌne; ex ka mintiꞌ ma canun nwaye, jacu bant nxiꞌye elkꞌal, ex tuꞌn jlu jacu chin yoline mya baꞌn tiꞌja.

10 Miꞌn jaw tnicꞌana yol tiꞌj jun majen twitz tpatrón; mya yajcu tzaj tkanin jun mya baꞌn tibaja ex jacu tzaj tcastiwoya.

11 At junjun xjal in xi cykanin mya baꞌn tibaj cyman, ex mintiꞌ in xi cykanin tuꞌn tcub cyꞌiwlaꞌn cytxuꞌ.

12 At junjun in cymaꞌn ka mintiꞌ cypaltil, pero naꞌnx t-sakix tuj cyanmi tuꞌn cytzꞌilil.

13 At junjun nnoꞌc cykꞌon cyib te maꞌ cyoclen, ex tucꞌil cynimbil cyib in xi cyqueꞌyin cyiꞌj mastl.

14 At junjun xjal ic tten twitz cyeꞌ ic tzaꞌn spad, ex ke cycyaꞌ ic cyten ic tzaꞌn puñal, tuꞌntzun tel cyelkꞌaꞌn tcyakilju at cye xjal meba ateꞌ tuj cytanmi.

15 At jun tal ẍukꞌ sanguijwela tbi, baꞌn cꞌan chicꞌ, at cabe tal ex oꞌcx in che kanin tiꞌj: Kꞌontza mastl chicꞌ te kchiye, che chi.

At ox tiꞌxti akeju mlayx bant tuꞌn cynoj, icxpe aju tcyajin mlayx tma acuxtzun jlu, chiwt,

16 ex atzun ke jlu: Aju cynajbil cyimni, aju xuꞌj miban alin, aju txꞌotxꞌ mintiꞌ in baj tgan tiꞌj aꞌ, ex aju kꞌakꞌ mlayx tma: Oꞌcx jlu cbajel tzꞌey wuꞌne, chiwt.

17 Aju xjal nneꞌl icꞌunte tman ex tcꞌiꞌ txi tniman ttxuꞌ, baꞌn tuꞌn cyjatz ke tbakꞌ twitz cyuꞌn joj, ex baꞌn tuꞌn t-xi chyoꞌn cyuꞌn ke cꞌutz.

18 At ox tiꞌxti ex ka cyaje in chin jaw labine cyuꞌn ex mintiꞌ nneꞌl nnicꞌe cyiꞌj,

19 ex atzun ke jlu: Tzaꞌn tten in lipan tꞌiw twitz cyaꞌj, tzaꞌn tten in bet lobaj twi pic, tzaꞌn tten in bet barc tibaj mar, ex tzaꞌn tten in xi lpeꞌ jun xinak tiꞌj jun kꞌapoj oc toc kꞌajt tiꞌj.

20 Aju in tbinchaꞌn jun xuꞌj aj pajil, atzun jlu: In waꞌn, nneꞌl t-suꞌn ttziꞌ ex in tmaꞌn cyjaꞌ: Mintiꞌ ma nbinchaye mya baꞌn.

21 At ox tiꞌxti in cybinchaꞌn xjal biꞌx in che jaw tilj xjal cyuꞌn, ex aju tcyajin mlayx tzicꞌx cyuꞌn xjal, ex atzun ke jlu:

22 Aju xjal majen nnoꞌc te rey, aju xjal mintiꞌ tnabl sobr twa at,

23 aju xuꞌj icꞌunxix in cnet tchmil, ex aju xuꞌj majen nneꞌl tiꞌn toclen xuꞌj aju tpatrón.

24 At cyaje cꞌloj tal jil ateꞌ twitz txꞌotxꞌ mas at cynabl cywitz ke xjal at cynabl, ex atzun ke jlu:

25 Ke snic mintiꞌ cyipun, pero tuj coresma in baj cychmoꞌn cywa;

26 ke cwatusa mintiꞌ cyipun, pero atzun in che najan cyuj ke toyꞌ pic;

27 ke ẍplon, masque mintiꞌ cyrey, pero cycyakil in che bet tuj cꞌlojin ex tuj tumelxix;

28 ke ẍule, jacu che tzyet tuꞌn kkꞌab, pero in che ocx max tuj tja rey.

29 At ox mejorxix che queꞌyin oc in che bet, ax icx aju tcyajin mejorxix queꞌyin oc in bet, ex atzun ke jlu:

30 Aju balun mas at tipun cywitz ke mastl txcup, mintiꞌ nneꞌl ok cywitz mastl txcup ex mi cywitz xjal;

31 aju tzecꞌ in jaw tniman tib cyxol ke ttxu ecꞌ; aju tman chip in cub nej cywitz mastl chip, ex aju rey in cub nej cywitz ke t-soldad.

32 Ka tuꞌnju mintiꞌ tnabla in jaw tniman tiba, ex ka o cub t-ximana tuꞌn tbinchanteya mya baꞌn, tencuya ximal tiꞌj.

33 Ka ma tzꞌoc tena chculte lech, cbantel mantequiy tiꞌj, ka ma tzaj t-sakmaꞌna ttxaꞌna cyuw, cꞌeletz chicꞌ tuj, ex ka ma tzꞌoc ticꞌleꞌna jun xjal tuꞌn ttzaj tkꞌoj, ctzajel kꞌoj cyxole tucꞌil.