Jini muꞌ bʌ i chaꞌlen lot bʌ cʌntisa
2
Pero an jeꞌel tsaꞌ bʌ i lolon subu i bʌ xiqꞌuil ti Dios i yʌleꞌ yaꞌ baꞌan israelob ti ñoj oniyix. Chʌꞌʌch jeꞌel mi quej i yujtyel yaꞌ baꞌ añetla. Mi quejel lot bʌ ajcʌntisajob. Miꞌ lolon contrajin lac Yum jini tsaꞌix bʌ i xotꞌbeyob i mul. Ti mucul jach mi quej i cʌntisañetla ti bajñel i ñaꞌtyʌbal muꞌ bʌ i jisañetla. Jin chaꞌan mi quej i seb cꞌotyel i yorojlel i jisʌntyelob.2 Cabʌlob mi quej i tsʌclañob i simaronlel. Chaꞌan ti caj i tꞌañob mi quej i yʌcꞌob ti wajlentyel jini melel bʌ tꞌan.
3 Chaꞌan wersa yomob i ganarin tyaqꞌuin miꞌ xujchꞌibeñetla laꞌ tyaqꞌuin ti lot bʌ cʌntisa. Pero mi quej i wersa jisʌntyelob como wʌ chajpʌbilix bajcheꞌ mi quej i xotꞌob i mul.
4 Dios machꞌan tiꞌ ñusʌbe i mul jini ajtroñelob i chaꞌan chꞌoyoloꞌ bʌ ti panchan tsaꞌ bʌ i chaꞌleyob mulil. Pero tiꞌ chocoyob ochel yaꞌ ti colem bʌ yajnib cꞌajc chaꞌan cʌchʌlob mi cʌytyʌlob yaꞌ ti icꞌtꞌojñal jintyo ti yorojlel melojel.
5 Dios machꞌan tiꞌ ñusʌbeyob i mul jini añoꞌ bʌ ti mulawil ti ñoj oniyix. Pero tiꞌ choco tyʌlel butꞌ jaꞌ tiꞌ tyojlel jini simaroñoꞌ bʌ quixtyañujob. Tsaꞌ jach i cotyʌ Noé tsaꞌ bʌ i subu i tꞌan Dios chaꞌan yom i yajñelob ti tyoj. Tiꞌ cotyʌ jeꞌel yambʌ sietejob añoꞌ bʌ ti yotyot.
6 Dios ti yʌcꞌʌ i tꞌan chaꞌan mi jisʌntyel jeꞌel jini añoꞌ bʌ ti jini lum tyac i cꞌabaꞌ bʌ Sodoma yicꞌot Gomorra. Tiꞌ puluyob ti cꞌajc jintyo ti cʌyle ti tyan. Ti cʌyle ti pʌsoñel chaꞌan majchical jach muꞌ bʌ i chaꞌ ajñel ti simaronlel bajcheꞌ jini mi quej i ñaꞌtyan bajcheꞌ mi quej yujtyel yicꞌotyob muꞌ bʌ i ñusañob i tꞌan Dios.
7 Pero Dios tiꞌ cotyʌ loqꞌuel ti Sodoma juntiquil wen bʌ winic Lot bʌ i cꞌabaꞌ, Cabʌl i chꞌʌjyemlel i pusicꞌal chaꞌan ti caj bibajax bʌ i chaꞌlibal jini simaroñoꞌ bʌ quixtyañujob ti Sodoma.
8 Jini Lot chaꞌan tyoj bʌ winic tiꞌ ñusʌ wocol ti jumpꞌej i pusicꞌal ti jujumpꞌej qꞌuin chaꞌan ti caj i mulob jini simaroñoꞌ bʌ yaꞌ baꞌ chumul cheꞌ ñac ti yubi yicꞌot cheꞌ ñac ti yilʌ bajcheꞌ tiꞌ chaꞌleyob.
9 Chʌꞌʌch jeꞌel lac Yum yujil i cotyan loqꞌuel ti i wocol jini i chaꞌañoꞌ bʌ cheꞌ an i yilpusicꞌlentyel. Yujil jeꞌel i yʌqꞌuen i xotꞌob i mul jini simaroñoꞌ bʌ jintyo baꞌ bʌ ora mi quejel i melob i bʌ.
10 Dios mi quej i yʌcꞌ i xotꞌob i mul ti pejtyelelob muꞌ bʌ i bej chaꞌlen machꞌʌ wen muꞌ bʌ i bajñel mulan ti i pusicꞌalob. Yicꞌot jeꞌel miꞌ ñusañob i pꞌʌtyʌlel i tꞌan lac Yum. Mucꞌ jach i pꞌajob. Maꞌix i bʌqꞌuen miꞌ chaꞌlen. Mucꞌ jach i chaꞌlen chʌ bʌ jach yomob. Machꞌan miꞌ bʌcꞌñan i wajleñob jini añoꞌ bʌ i ñuclel yaꞌ ti panchan.
11 Pero ajtroñelob i chaꞌan Dios chꞌoyoloꞌ bʌ ti panchan aunque más an i wersajlel, más an i pꞌʌtyʌlel i tꞌan, pero machꞌan miꞌ chaꞌleñob tꞌan tiꞌ contra jini añoꞌ bʌ i ñuclel yaꞌ ti panchan tiꞌ tyojlel lac Yum.
12 Pero jini xlot bʌ ajcʌntisajob lajalob bajcheꞌ animal tyac muꞌ bʌ i bajñel niqꞌui cʌn. Jini animal mi jojchel chaꞌan jach mi chujquel, chaꞌan jach mi tsʌnsʌntyel. Como jini xlot bʌ ajcʌntisajob miꞌ chaꞌleñob tꞌan tiꞌ contra jini tꞌan machꞌʌ baꞌan miꞌ chꞌʌmbeñob i sujmlel. Mi quej i jisʌntyelob lajal bajcheꞌ animal tyac.
13 Mi quej i ñusañob wocol chaꞌan ti caj ti yʌqꞌueyob i ñusañob wocol yañoꞌ bʌ. Tijicñayob miꞌ lolon ñaꞌtyañob cheꞌ mucꞌob ti chʌ bʌ tyac jach bʌ qꞌuiñejel. Ñoj bibajax miꞌ chaꞌleñob. Quisintic i chaꞌlibal cheꞌ mi yotsañob i bʌ i chaꞌleñob qꞌuiñejel laꞌ wicꞌot. Wen tijicñayob chaꞌan jini muꞌ bʌ i chaꞌleñob chaꞌan i lotiñetla.
14 Cheꞌ miꞌ qꞌueleꞌ xꞌixic yom i waꞌ pejcan. Maꞌix miꞌ cʌyob i chaꞌlen mulil. Miꞌ pʌyob ti mulil jini machꞌʌ baꞌan xucꞌuloꞌ bʌ i pusicꞌal. Ñʌmʌlob i mulʌben i michꞌqꞌuelben chʌ bʌ an i chaꞌan yañoꞌ bʌ. Chocolobix ti Dios.
15 Tsaꞌix i sʌtyʌyob i bʌ como tsaꞌix i cʌyʌyob jini tyoj bʌ bij. Miꞌ lolon tsʌcleñob bajcheꞌ tiꞌ chaꞌle jini tsaꞌ bʌ i xiqꞌui i yʌleꞌ Dios Balaam bʌ i cꞌabaꞌ i yalobil bʌ Beor. Tiꞌ mulʌ i ganarin tyaqꞌuin ti melol machꞌʌ wen.
16 Ti tijqꞌui jini Balaam ti caj i mul ti juncojt ñaꞌ burro mach bʌ i tyʌlelic yujil tꞌan. Ti queji ti tꞌan cheꞌ bajcheꞌ quixtyañu. Tiꞌ tiqꞌui chaꞌan mach i bej chaꞌlen machꞌʌ wen bʌ i chaꞌlibal jini Balaam.
17 Lajalob jini xlot bʌ ajcʌntisajob bajcheꞌ pozo tyac machꞌʌ baꞌan i yaꞌlel. Lajalob bajcheꞌ tyocal tyac mucꞌ jach bʌ i pʌjyel majlel ti icꞌ. Como wʌ albilix chaꞌan mi quej i majlelob ti más iꞌicꞌ bʌ icꞌtꞌojñal chaꞌan ti pejtyelel ora.
18 Miꞌ chan isañob i bʌ ti lolon jach bʌ tꞌan ti machꞌʌ baꞌan i cꞌʌjnibal. Tiꞌ bibajax bʌ i chaꞌlibalob miꞌ chaꞌ yʌsañob ti mulil jini max tyo bʌ jaliji i cʌyʌyob i mul.
19 Miꞌ lolon subeñob chaꞌan libre añob i mel chʌ bʌ yomob. Pero i bajñelob jini xlot bʌ ajcʌntisayob chuculob tiꞌ pꞌʌtyʌlel mulil. Como jujuntiquil quixtyañu muꞌ bʌ i chʌc chaꞌlen mulil i yumʌch mi majlel jini mulil.
20 Jiñob tsaꞌix bʌ i ñaxan cʌñʌ lac Yum Jesucristo, Ajcotyaya lac chaꞌan, tsaꞌix i cʌyʌyob jini mulil tyac. Pero mi ti wiꞌil ti chaꞌ nijcʌnti i pusicꞌal ti mulil, mi ti chaꞌ acꞌʌ i bʌ i yumin jini mulil, más leco mi yujtyel ti wiꞌil bajcheꞌ ti ñaxan.
21 Más wen mi machꞌan ti ñaxan cʌñʌ jini wen bʌ tꞌan como cheꞌ nac tiꞌ cʌñʌyob tiꞌ lolon chaꞌ cʌyʌyob jini chꞌujul bʌ ticꞌojel tsaꞌ bʌ aqꞌuentiyob.
22 Pero mi tsꞌʌctiyel i sujmlel jini wʌ albil bʌ tꞌan baꞌ mi yʌleꞌ: Jini tsꞌiꞌ mi chaꞌ sujtyel i chaꞌ mʌcꞌ i xej. Jini ñaꞌ chityam tsꞌʌnsʌbil bʌ ti jaꞌ mi chaꞌ majlel ti tsꞌʌmel ti ocꞌol. Cheꞌ mi yʌl jini albil bʌ tꞌan.