2 Cꞌajtisanla jini tꞌan tsaꞌ bʌ i wʌ alʌ jini yajcʌbiloꞌ bʌ tsaꞌ bʌ i xiqꞌui Dios i yʌleꞌ ti ñoj oniyix yicꞌot jini xicꞌojel i chaꞌan lac Yum, Ajcotyaya bʌ lac chaꞌan, tsaꞌ bʌ i cʌntisʌyetla jini yajcʌbiloꞌ bʌ ajsubtꞌañob ñumel.

3 Ñaxan ñaꞌtyanla chaꞌan ti wiꞌil bʌ qꞌuin tyac tyal quixtyañujob muꞌ bʌ wajlen jini muꞌ bʌ lac chꞌujbin. Mi quej i yajñel bajcheꞌ jach yom ti i bajñel pusicꞌal.

4 Mi quej i yʌlob: ¿Bacan tsiquil chʌncol i chaꞌ tyʌlel Cristo cheꞌ bajcheꞌ ti yʌlʌ? Como cꞌʌlʌ ti sajti lac yumob ti ñoj oniyix cꞌʌlʌ wale iliyi lajal jach chʌncol i bej ajñel ti pejtyelel chʌ bʌ an cꞌʌlʌ bajcheꞌ an ti tyejchibal cheꞌ ti mejli ili mulawil. Cheꞌ mi yʌlob xlot bʌ ajcʌntisajob.

5 Mach yom i yubiñob baꞌ mi yʌl tiꞌ tꞌan Dios chaꞌan jini chan tyac i tyʌlelʌch an cꞌʌlʌ ñoj oniyix yicꞌot jini lum tiꞌ pꞌʌtyʌlel jach i tꞌan Dios ti loqꞌui ti mal jaꞌ. Como jini lum joyol ti jaꞌ.

6 Cheꞌ jeꞌel, mach yom i yubiñob chaꞌan ti jisʌnti jini mulawil chaꞌan ti caj butꞌ jaꞌ.

7 Pero jini chan tyac yicꞌot mulawil am bʌ wale iliyi cʌñʌtyʌbil jach jeꞌel tiꞌ pꞌʌtyʌlel i tꞌan Dios chaꞌan mi quejel i pulel ti cꞌajc. Cʌñʌtyʌbil cꞌʌlʌ jintyo i yorojlel melojel cheꞌ mi jisʌntyelob jini simaroñoꞌ bʌ.

8 Cheꞌ jeꞌel pꞌuntyʌbil bʌ hermañujob, mach yom mi ñajayel laꞌ chaꞌan chaꞌan junlajal miꞌ qꞌuel jumpꞌej qꞌuin lac Yum cheꞌ bajcheꞌ mil jabil. Cheꞌ jeꞌel mil jabil lajal miꞌ qꞌuel cheꞌ bajcheꞌ jumpꞌej jach qꞌuin.

9 Mach chaꞌanic miꞌ jalitisan i tsꞌʌctisan i tꞌan lac Yum cheꞌ bajcheꞌ miꞌ lolon ñaꞌtyañob chaꞌtiquil uxtiquil. Pero jal miꞌ pijtyan. Como mach yom lac Yum chaꞌan mi junticlec mi jilel. Pero yom chaꞌan ti pejtyelel miꞌ qꞌuextyan i pensal chaꞌan i cʌyob i mul.

10 Pero mi quej i cꞌotyel i yorojlel cheꞌ mi tyʌlel lac Yum, maꞌix yʌxʌlob i yoj cheꞌ bajcheꞌ mi cꞌotyel ajxujchꞌ ti acꞌbʌlel. Jini chan tyac mi quej i jilel ti ñoj bʌbʌqꞌuen bʌ tꞌan. Mi quej i luꞌ jilel ti cꞌajc ti pejtyel an tyac ti chan. Jini mulawil yicꞌot pejtyelel i bʌl mi quej i luꞌ pulel.

11 Cheꞌ mi laꞌ ñaꞌtyan bajcheꞌ mi quej i luꞌ jilel pejtyelel chʌ bʌ an, yom mi laꞌ wen acꞌ laꞌ bʌ Dios. Yom wen xucꞌul mi laꞌ wajñel.

12 Yom mi laꞌ pijtyan ti pejtyelel laꞌ pusicꞌal cꞌʌlʌ jintyo mi tyʌlel Dios. Chaꞌlenla pejtyelel chʌ bʌ chꞌujbi laꞌ chaꞌlen chaꞌan ora mi tyʌlel. Ti jim bʌ qꞌuin jini chan tyac mi quej i jisʌntyel ti cꞌajc. Pejtyelel yicꞌot i bʌl chan mi quej i luꞌ ulmʌl ti cꞌajc.

13 Pero joñonla mi lac pijtyan tsijiꞌ bʌ chan yicꞌot tsijiꞌ bʌ mulawil tsaꞌix bʌ i wʌ alʌ Dios mi quej i yʌcꞌ. Yaꞌi luꞌ tyoj, luꞌ wen mi quejel i yajñelob.

14 Jin chaꞌan, pꞌuntyʌbilet bʌ la hermañujob, chaꞌlenla wersa cheꞌ chʌncox laꞌ pijtyan chaꞌan mi yujtyel ili tyac chaꞌan ñʌchꞌʌl miꞌ tyajetla. Maꞌix i cujquil laꞌ pusicꞌal yubil. Maꞌix laꞌ mul tiꞌ tyojlel Dios.

15 Yom mi laꞌ ñaꞌtyan chaꞌan jal miꞌ cuchbeñonla lac mul lac Yum como yom miꞌ luꞌ cotyañonla. Chʌꞌʌch jeꞌel tiꞌ tsꞌijbubeyetla pꞌuntyʌbil bʌ hermañu Pablo chaꞌan Dios ti yʌqꞌue i ñaꞌtyʌbal.

16 Ti pejtyelel i carta Pablo tiꞌ tyaja ti tꞌan ili tyac. Aunque an wocol tyac bʌ mi lac chꞌʌmben isujm ti i jun tsaꞌ bʌ i tsꞌujbu Pablo. Jini machꞌʌ baꞌan i ñaꞌtyʌbal yicꞌot jini machꞌʌ baꞌan xucꞌulob miꞌ yʌnben i sujmlel cheꞌ bajcheꞌ jeꞌel mi yʌnben i sujmlel yambʌ Tsꞌijbubil bʌ i Tꞌan Dios. Chaꞌan chʌꞌʌch miꞌ chaꞌleñob mi quej i jilelob.

17 Jin chaꞌan pꞌuntyʌbilet bʌ la hermañujob cheꞌ wʌ laꞌ wujil isujm chʌ bʌ mi quej i yujtyel, cʌñʌtyan laꞌ bʌ chaꞌan machꞌan mi laꞌ lotintyel ti simaroñoꞌ bʌ quixtyañujob. Ame mi laꞌ cʌy i xucꞌtyʌlel laꞌ pusicꞌal.

18 Yom mi laꞌ bej más cʌñeꞌ lac Yum Jesucristo, Ajcotyaya lac chaꞌan, yicꞌot yom mi yocꞌan pꞌuntyaya ti laꞌ pusicꞌal. Laꞌ sujbic i ñuclel wale iliyi yicꞌot ti pejtyelel ora. Amén.