2 Dios lac Tyat ti yajcʌyetla chaꞌan mi laꞌ chꞌujbin cheꞌ bajcheꞌ tiꞌ wʌ ñaꞌtyʌ cꞌʌlʌ ti ñoj oniyix. Chaꞌan ti Chꞌujul bʌ i Chꞌujlel ti yajcʌyetla chaꞌan mi laꞌ wajñel ti i chaꞌañetla chaꞌan mi laꞌ chꞌujbiben i tꞌan yicꞌot chaꞌan mi laꞌ sʌc isʌntyel ti i chꞌichꞌel Jesucristo. Laꞌ bej oqꞌuisʌbentiquetla i yutslel yicꞌot i ñʌchꞌtyʌlel laꞌ pusicꞌal ti lac Yum Jesucristo.

3 Laꞌ lac subeꞌ i ñuclel Dios i tyat lac Yum Jesucristo. Chaꞌan tiꞌ cabʌl pꞌuntyʌyonla ti yʌqꞌueyonla lac chaꞌ chꞌoc an yubil chaꞌan ti chaꞌ tyejchi loqꞌuel Jesucristo baꞌan sajtyemoꞌ bʌ. Jiñʌch mi yʌqꞌueñonla lac pijtyan chaꞌan mi quej i tyejchonla loqꞌuel baꞌan sajtyemoꞌ bʌ jeꞌel.

4 Dios mi quej i yʌqꞌueñetla jini ñoj wen bʌ wʌ lotyol bʌ yicꞌot ti panchan. Mach chꞌujbi i jisʌntyel. Mach chꞌujbi i bibiꞌsʌntyel. Mach chꞌujbi i tsuculiyel cheꞌ bajcheꞌ i nich pimel.

5 Chaꞌan chʌncol laꞌ chꞌujbin Dios miꞌ cʌñʌtyañetla chaꞌan ti i pꞌʌtyʌlel cꞌʌlʌ jintyo mi tsꞌʌctiyel laꞌ cotyʌntyel am bʌ laꞌ chaꞌan wale. Jiñʌch yaꞌ bʌ wʌ chajpʌbil muꞌ bʌ quej i yʌqꞌueñetla ti jini cojix bʌ qꞌuin.

6 Jin chaꞌan wen cꞌajacña laꞌ woj mi laꞌ wubin aunque wersa mi laꞌ poj ñusan ti chajp ti chajp laꞌ wocol wale iliyi.

7 Ti laꞌ wilpusicꞌlentyel ti wocol muꞌ bʌ laꞌ cucheꞌ ti wen mi tsictiyel mi xucꞌulʌch mi laꞌ chꞌujbin cheꞌ bajcheꞌ mi tsictiyel mi yoqꞌue orojʌch jini oro cheꞌ mi ticwisʌntyel ti cꞌajc. Pero oro mi quejel i jilel. Más cꞌʌjnibal cheꞌ xucꞌul mi laꞌ chꞌujbin bajcheꞌ i cꞌʌjnibal oro. Cheꞌ tsaꞌix tsictiyi mi xucꞌulʌch mi laꞌ chꞌujbin mi quej i sujbel weñʌch ti laꞌ chꞌujbi. Mi quej la wʌqꞌuentyel laꞌ ñuclel yicꞌot mi quej laꞌ qꞌuejlel ti ñuc cheꞌ mi tsictiyel Jesucristo.

8 Aunque max tyo ti laꞌ wilʌ Jesucristo ti laꞌ wut, pero mi laꞌ pꞌuntyan. Mi laꞌ chꞌujbin aunque machꞌan mi laꞌ wilan. Pero mach chꞌujbi la cʌl bajcheꞌ cꞌamel i tijicñʌyel laꞌ pusicꞌal chaꞌan ti laꞌ chꞌujbi Jesucristo.

9 Ñoj cꞌajacña laꞌ woj mi laꞌ wubin cheꞌ chʌncox i tsꞌʌctisʌntyel majlel laꞌ cotyʌntyel chaꞌan ti laꞌ chꞌujbi.

10 Ti ñoj oniyix jini tsaꞌ bʌ i xiqꞌui yʌleꞌ Dios tiꞌ bej jopꞌo i ñaꞌtyan i sujmlel chaꞌan laj cotyʌntyel. Tiꞌ wʌ subeyob i bʌ chaꞌan laꞌ cotyʌntyel muꞌ bʌ i yʌqꞌueñetla Dios ti i yutslel.

11 Jini Chꞌujul bʌ i Chꞌujlel Cristo ti yʌqꞌueyob i wʌ ñaꞌtyan jini tsaꞌ bʌ i xiqꞌui i yʌleꞌ Dios chaꞌan mi quej i ñusan wocol jini yajcʌbil bʌ i chaꞌan Dios. Tiꞌ wʌ ñaꞌtyʌyob chaꞌan i ñuclel jini yajcʌbil bʌ muꞌ bʌ quej i tsicityel ti wiꞌil tyo. Tiꞌ cꞌʌmbentiyob i tiꞌ, pero tiꞌ jopꞌoyob i ñaꞌtyan majchqui jini muꞌ bʌ quej i ñusan wocol yicꞌot baqui bʌ ora mi quej i yujtyel jini tsaꞌ bʌ wʌ pʌsꞌentiyob chaꞌan ti jini Chꞌujul bʌ i Chꞌujlel.

12 Pero Dios ti yʌqꞌueyob i ñaꞌtyan jini tsaꞌ bʌ i xiqꞌui i yʌleꞌ Dios chaꞌan mach i bajñel i chaꞌañobic jini tꞌan tsaꞌ bʌ wʌ alʌyob. Pero ti wiꞌil tyo joñonla mi quej lac ñaꞌtyan. Wale jiñʌch jini tꞌan chaꞌan laj cotyʌntyel chʌncol bʌ laꞌ subentyel ti jini tsaꞌ bʌ i chaꞌleyob subtꞌan chaꞌan tiꞌ pꞌʌtyʌlel Chꞌujul bʌ i Chꞌujlel Dios tsaꞌ bʌ chojqui tyʌlel ti panchan. Jini ajtroñelob i chaꞌan Dios chꞌoyolob ti panchan wersa yom i chꞌʌmꞌeñob i sujmlel jeꞌel.

13 Jin chaꞌan wen ñaꞌtyanla chʌ bʌ mi quej laꞌ chaꞌlen. Ajñenla ti xucꞌul. Wen pijtyanla muꞌ bʌ i yʌqꞌueñetla Dios ti i yutslel yaꞌ bʌ mi tsictiyel Jesucristo.

14 Yom ajniquetla cheꞌ bajcheꞌ yalobilob muꞌ bʌ i wen jacꞌ tꞌan. Mach yom mi laꞌ beleꞌ meleꞌ chʌ bʌ ti bajñel mulʌ i chaꞌlen laꞌ pusicꞌal cheꞌ max tyo ti laꞌ cʌñʌ Dios.

15 Pero yom mi laꞌ wajñel ti chꞌujul ti pejtyelel laꞌ chaꞌlibal como chꞌujul Dios tsaꞌ bʌ i pʌyʌyetla.

16 Jini Tsꞌijbubil bʌ i Tꞌan Dios mi yʌl: Ajñenla ti chꞌujul como chꞌujulon, cheꞌen.

17 Mi chʌncol laꞌ wʌl ti laꞌ tyat Dios muꞌ bʌ quej i melonla ti junlajal yom mi laꞌ bej bʌcꞌñan Dios cheꞌ wʌꞌ tyo añetla wʌꞌ ti mulawil.

18 Como Dios tiꞌ mʌñʌyetla loqꞌuel ti jini machꞌʌ wen yaꞌ baꞌ ti ajniyetla ti yambʌ ora cheꞌ bajcheꞌ ti laꞌ cʌñʌ laꞌ wajñel ti laꞌ yumob ti oniyix. Wen laꞌ wujil isujm mach mʌmbileticla chaꞌan ti jini muꞌ bʌ i jilel cheꞌ bajcheꞌ mi ti oro o mi ti sʌsʌc bʌ tyaqꞌuin.

19 Pero mʌmbiletla chaꞌan ti ñoj wen bʌ i chꞌichꞌel Cristo tsaꞌ bʌ yʌcꞌʌ i bʌ ti sajtyel cheꞌ bajcheꞌ juncojt tiñʌmeꞌ ñoj tsꞌʌcʌl bʌ, machꞌʌ baꞌan i cꞌamꞌan, machꞌʌ baꞌan i lojwel.

20 Ti wʌ ñaꞌtyʌnti cheꞌ max tyo ti mejli ili mulawil chaꞌan Cristo mi quej i yʌcꞌ i bʌ chaꞌan laj cotyʌntyel. Pero ti tyʌli ti ili wiꞌilix bʌ qꞌuin chaꞌan lac wenlel.

21 Mi laꞌ chꞌujbin Dios chaꞌan ti Cristo tsaꞌ bʌ i tyejchisʌ loqꞌuel baꞌan sajtyemoꞌ bʌ. Tsaꞌix i yʌqꞌue Cristo i ñuclel. Jin chaꞌan tsaꞌix laꞌ chꞌujbi Dios. Mi laꞌ pijtyan muꞌ bʌ i yʌqꞌueñonla Dios.

22 Wale iliyi chaꞌan ti laꞌ chꞌujbibe jini melel bʌ tꞌan chaꞌan ti jini Chꞌujul bʌ i Chꞌujlel Dios tsaꞌix sʌc isʌnti laꞌ pusicꞌal chaꞌan mi laꞌ yoque pꞌuntyan hermañujob ti melel bʌ pꞌuntyaya. Yom mi laꞌ wen pꞌuntyan laꞌ bʌ ti pejtyelel laꞌ pusicꞌal yicꞌot ti pejtyelel laꞌ pꞌʌtyʌlel.

23 Tsaꞌix chaꞌ chꞌocꞌʌyetla yubil. Machꞌan ti chaꞌ chꞌocꞌʌyetla chaꞌan ti laꞌ tyat laꞌ ñaꞌ muꞌ bʌ i sajtyel. Pero ti chaꞌ chꞌocꞌʌyetla chaꞌan ti cuxul bʌ i tꞌan Dios. Jini tꞌan mi yajñel ti beleꞌ ora.

24 Como jini Tsꞌijbubuil bʌ i Tꞌan Dios mi yʌleꞌ: