2 Chʌ bʌ an laꞌ chaꞌan chʌncox ti pʌcꞌmʌl. Jini wen bʌ laꞌ pislel chʌncox i jilel tiꞌ jochꞌil.

3 Laꞌ tyaqꞌuin chʌncox ti tyʌꞌiyel. I tyʌꞌil mi yʌcꞌ ti tsictiyel laꞌ mul. Jin chaꞌan laꞌ bʌcꞌtyal mi quej yilan wocol cheꞌ bajcheꞌ chʌncol i pulel ti cꞌajc. Tsaꞌix laꞌ woqꞌuisʌ laꞌ ricojlel ti ili cojix bʌ qꞌuin majlel.

4 Jini laꞌ wajtroñel machꞌʌ baꞌan tsꞌʌcʌl ti laꞌ wʌqꞌue i tyojol ti laꞌ cholel mi yʌlꞌetla yubil. Lac Yum bʌ i Yum bʌ cabʌlob tsaꞌix i yubi i tꞌan jini xcꞌajbalob cheꞌ ñac ti yʌlꞌʌyetla.

5 Tsaꞌix ajniyetla ti chʌ bʌ yes jach mi laꞌ mulan yicꞌot chʌ bʌ yes jach laꞌ wom laꞌ chaꞌlen wʌꞌ ti mulawil. Jatyetla, tsaꞌix jujpꞌiyetla yubil bajcheꞌ animal. Wale chʌncox i lʌqꞌueꞌ i yorojlel laꞌ tsʌnsʌntyel.

6 Tsaꞌix laꞌ lolon aqꞌue i xotꞌ i mul jini machꞌʌ baꞌan i mul. Tsaꞌix laꞌ tsʌnsʌ. Machꞌan tiꞌ jopꞌo i cotyañob i bʌ.

7 Jin chaꞌan hermañujob, wen pijtyanla tiꞌ ñʌchꞌtyʌlel laꞌ pusicꞌal cꞌʌlʌ jintyo mi tyʌlel lac Yum. Cheꞌ bajcheꞌ jini muꞌ bʌ ti toñel ti i cholel miꞌ wen pijtyan i wut i pʌcꞌʌb tiꞌ ñʌchꞌtyʌlel i pusicꞌal. Miꞌ pijtyan jaꞌal chaꞌan i pʌcꞌ. Mi chaꞌ pijtyan yambʌ jaꞌal chaꞌan colic i pacꞌ. Wiꞌil tyo mi quej i cꞌajben i wut ñuc bʌ i cꞌʌjnibal.

8 Wen pijtyanla tiꞌ ñʌchꞌtyʌlel laꞌ pusicꞌal jeꞌel. Xucꞌchocon laꞌ pusicꞌal como maꞌix jal mach tyal lac Yum.

9 Hermañujob, mach yom laꞌ tyaj laꞌ bʌ ti machꞌʌ wen bʌ tꞌan chaꞌan machꞌan mi quej laꞌ mel laꞌ bʌ. Diosʌch jini Juez. Añʌch ti tiꞌ otyot yubil como i yorojlelix melojel.

10 Quermañujob, tsʌclen bajcheꞌ tiꞌ yilʌyob wocol, bajcheꞌ ti cuchuyob wocol ti utsꞌat jini tsaꞌ bʌ i xiqꞌui i yʌleꞌ Dios ti ñoj oniyix. Tiꞌ chaꞌleyob tꞌan chaꞌan lac Yum tiꞌ majñʌbeyob i tiꞌ.

11 Mi laꞌ ñaꞌtyan cꞌajacña i yoj jini muꞌ bʌ i cucheꞌ i wocol ti wen. Tsaꞌix laꞌ wubi bajcheꞌ tiꞌ cuchu wocol ti utsꞌat jini winic Job bʌ i cꞌabaꞌ. Laꞌ wujilʌch bajcheꞌ tiꞌ chaꞌ wen cotyʌ lac Yum jini Job cheꞌ ujtyemix i wocol. Miꞌ wen pꞌuntyañonla lac Yum.

12 Quermañujob, mach yom mi laꞌ saj aleꞌ: Melelʌch miꞌ qꞌuelon Dios, cheꞌet. Mach yom mi laꞌ tyaj ti tꞌan Dios mi mulawilic chaꞌan laꞌ waꞌchocon laꞌ tꞌan. Mach yom laꞌ wʌleꞌ melelʌch mi yilañon ti chʌbʌyic jach yes bʌ yambʌ tꞌan tyac. Cheꞌ mi laꞌ wʌl: Chʌꞌʌchi, chʌꞌʌchi, cheꞌetla. Cheꞌ mi laꞌ wʌl: Mach cheꞌiqui, mach cheꞌiqui, cheꞌetla. Yom chʌꞌʌch mi laꞌ wʌl chaꞌan machic baꞌan mi yʌqꞌueñetla laꞌ xotꞌ laꞌ mul Dios.

13 Mi an juntiquiletla am bʌ i wocol, yom i chaꞌlen oración. Mi an majch cꞌajacña i yoj yom i cꞌʌyeꞌ i ñuclel Dios.

14 Mi an majch cꞌam, yom i pʌyeꞌ ancianojob muꞌ bʌ i cʌñʌtyan ochemoꞌ bʌ tiꞌ tꞌan Dios chaꞌan i melben oración. Mi yulben aceite jini cꞌam bʌ cheꞌ miꞌ cꞌʌñob i pꞌʌtyʌlel lac Yum.

15 Cheꞌ miꞌ chꞌujbin cheꞌ mucꞌob ti oración mi quej i cotyʌntyel jini xcꞌamꞌan. Lac Yum mi quej i tyejch isan. Mi tiꞌ chaꞌle mulil mi quej i ñusʌbentyel.

16 Jin chaꞌan cꞌajtiben laꞌ bʌ chaꞌan mi laꞌ ñusʌben laꞌ bʌ laꞌ mul cheꞌ an laꞌ mul. Tyaja laꞌ bʌ ti oración chaꞌan lajmisʌntiquetla. Pꞌʌtyʌl i yoración tyoj bʌ winic tsaꞌ bʌ i chaꞌle ti jumpꞌej i pusicꞌal.

17 Elías tsaꞌ bʌ i xiqꞌui i yʌleꞌ Dios winicʌch jeꞌel. Lajal bajcheꞌonla. Cheꞌ ñac tiꞌ cꞌajtibe Dios ti oración chaꞌan mach ñumic jaꞌal, ti lajmi jaꞌal ti mulawil uxpꞌej jab tyʌlel i xiñil jabil. Machꞌan ti saj ñumi jaꞌal.

18 Ti wiꞌil cheꞌ ñac tiꞌ chaꞌ cꞌajtibe Dios ti chaꞌ ñumi jaꞌal. Tiꞌ chaꞌ chaꞌleyob cꞌajbal.

19 Quermañujob, mi an juntiquiletla mi ti laꞌ cʌyʌ jini melel bʌ tꞌan, yambʌ yom i chaꞌ pʌyetla tyʌlel.

20 Ñaꞌtyanla jini muꞌ bʌ i chaꞌ sutquin xmulil ti tyoj bʌ bij, miꞌ cotyan jini xmulil chaꞌan i tyaj i cuxtyʌlel machꞌʌ yujil jilel. Mi quej i ñusʌbentyel cabʌl i mul.