2 An chʌ bʌ laꞌ wom. Cheꞌ jini mi laꞌ chaꞌlen tsʌnsa cheꞌ machꞌan mi laꞌ wʌqꞌuentyel. Mi laꞌ contrajin laꞌ bʌ. Mi laꞌ chaꞌlen periyal cheꞌ an chʌ bʌ mi laꞌ tsꞌaꞌqꞌuel cheꞌ machꞌan mi laꞌ wʌqꞌuentyel. Machꞌan mi laꞌ wʌqꞌuentyel jini muꞌ bʌ laꞌ mulan como machꞌan mi laꞌ cꞌajtiben Dios.

3 Cheꞌ mi laꞌ cꞌajtiben, machꞌan mi laꞌ wʌqꞌuentyel como mach wen i cꞌʌjnibal mi laꞌ cꞌajtiben. Como laꞌ wom jach laꞌ cꞌʌñeꞌ chaꞌan chʌ bʌ jach miꞌ bajñel mulan laꞌ pusicꞌal.

4 Quixtyañujob, mach xucꞌuleticla. ¿Machꞌa baꞌan mi laꞌ ñaꞌtyan jini muꞌ bʌ i tsʌclen muꞌ bʌ i mulan i chaꞌan jach bʌ mulawil mach i chaꞌanic Dios jini quixtyañu cheꞌ jini? Majchical jach yom bʌ i tsʌclen muꞌ bʌ i mulañob jini i chaꞌan jach bʌ mulawil, mi yochel tiꞌ contra Dios.

5 Mach lolomic jach mi yʌl Tsꞌijbubil bʌ i Tꞌan Dios: Jini Chꞌujul bʌ i Chꞌujlel tsaꞌ bʌ i yʌqꞌueyonla Dios chaꞌan mi yajñel ti joñonla, i bajñel yom i yajñel ti lac pusicꞌal como miꞌ pꞌuntyañonla, cheꞌen.

6 Pero más tyo miꞌ cotyañonla Dios ti yutslel. Mi yʌl Tsꞌijbubil bʌ i Tꞌan Dios: Dios miꞌ contrajin jini muꞌ bʌ i chan isan i bʌ pero miꞌ cotyan ti yutslel jini muꞌ bʌ i juꞌsan i pusicꞌal, cheꞌen.

7 Acꞌʌ laꞌ bʌ ti Dios. Pʌsʌ laꞌ bʌ tiꞌ contra xiba. Cheꞌ jini mi quej i putsꞌtyañetla.

8 Yom laꞌ lʌcꞌ Dios. Dios miꞌ lʌqꞌuetla jeꞌel. Xmulilet bʌ la, cʌyʌx laꞌ mul chaꞌan sʌc aquetla. Jatyetla laꞌ wom bʌ laꞌ pꞌuntyan Dios cheꞌ chʌncol tyo laꞌ mulan jini machꞌʌ wen bʌ i chaꞌan jach bʌ mulawil, sʌc isan laꞌ pusicꞌal.

9 Yom chꞌʌjyemetla. Chaꞌlenla uqꞌuel. Qꞌuextyan laꞌ tseꞌñal chaꞌan uqꞌuiquetla. Qꞌuextyan laꞌ tijicñʌyel chaꞌan chꞌʌjyemeticla.

10 Peqꞌuisan laꞌ bʌ tiꞌ tyojlel lac Yum. Jini mi quej i yʌqꞌueñetla laꞌ ñuclel.

11 Hermañujob, mach yom mi laꞌ tyajeꞌ laꞌ bʌ ti machꞌʌ wen bʌ tꞌan. Jini muꞌ bʌ i tyajeꞌ ti tꞌan juntiquil hermañu o jini muꞌ bʌ i lolon jopꞌben i mul i piꞌʌl miꞌ tyaj ti machꞌʌ wen bʌ tꞌan i mandar Dios yubil. Aunque jatyet maꞌ jacꞌben i mandar Dios i wentyʌlel chʌncol jach a wʌqꞌuen i mel i bʌ i mandar Dios. Cheꞌ bajcheꞌ ñuc a weꞌtyel maꞌ lolon cuy a bʌ.

12 An juntiquil jach tsaꞌ bʌ i yʌcꞌʌ jini mandar. Jiñʌch jini am bʌ yeꞌtyel. Jiñʌch chꞌujbi bʌ i cotyañet, chꞌujbi bʌ i jisañet. Jixcu jatyet, ¿chuquiyeset chaꞌan a mel a piꞌʌl?

13 Wale ubin iliyi, jatyetla muꞌ bʌ laꞌ wʌ al: Wʌle iliyi mi ijcꞌʌl mi quej lac majlel yaꞌi o baꞌical bʌ lum. Yʌꞌʌch mi lac ñusan jumpꞌej jab ti mʌñoñel, ti choñoñel, ti ganar tyaqꞌuin, cheꞌetla.

14 Machꞌan majch yujil isujm chʌ bʌ mi quej yujtyel ijcꞌʌl. ¿Pero chuquiyes jini laj cuxtyʌlel? Lajalʌch bajcheꞌ tyocal muꞌ bʌ i poj tsictiyel. Mi chaꞌ sʌc lajmel.

15 Jiñʌch yom bʌ laꞌ wʌleꞌ: Mi chʌꞌʌch yom lac Yum mi la cajñel yaꞌi. Mi lac chaꞌlen iliyi mi ixꞌʌyi, cheꞌetla.

16 Pero jatyetla wersa mi laꞌ chan isan laꞌ bʌ ti laꞌ tꞌan. Pejtyel jini i chan isʌntyelʌch laꞌ bʌ jiñʌch machꞌʌ wen.

17 Jini yujil bʌ isujm bajcheꞌ yom i chaꞌlen wen bʌ pero machꞌan miꞌ chaꞌlen, mi yotsan i mul.