La cacꞌ
3
Quermañujob, mach yom cabʌletla mi laꞌ wotsan laꞌ bʌ ti ajcʌntisajob. Como laꞌ wujilʌch más tsʌts mi quej i melonla Dios tiꞌ yorojlel melojel ajcʌntisajon bʌ la mi an lac mul.2 Ti lac pejtyelel mi la cotsan cabʌl lac mul. Jini machꞌʌ baꞌan mi saj otsan i mul bʌ winic chaꞌan tiꞌ tꞌan, tsꞌʌcʌlʌch i wenlel jini quixtyañu. Yujilʌch i ticꞌol pejtyel i pusicꞌal cheꞌ jini.
3 Cheꞌ mi la cotsan i tsucu tyaqꞌuinlel i yej jini caballo chaꞌan mi tyoj isʌntyel majlel baꞌ la com majlel chʌncol lac nijcan majlel pejtyel i bʌcꞌtyal cheꞌ jini.
4 Qꞌuelela awilan jini barco. Aunque wen colem aunque mi nijcʌyel ti pꞌʌtyʌl bʌ icꞌ pero jini ajnijca barcojob miꞌ choc majlel baꞌical yom chaꞌan ti saj jach bʌ i nijcʌjib.
5 Chʌꞌʌch mi yujtyel yicꞌot la cacꞌ jeꞌel. I saj jach am bʌ ti lac bʌcꞌtyal. Pero cabʌl chʌ bʌ miꞌ tyech la cacꞌ. Colem bʌ matyeꞌel mi jilel chaꞌan ti i saj jach bʌ cꞌajc.
6 Cꞌajcʌch yubil la cacꞌ. Tsꞌʌbʌl yubil ti cꞌajc cheꞌ bajche ti infierno machꞌʌ baꞌan mi saj yajpel chaꞌan tyʌlem baꞌan xiba jini machꞌʌ wen muꞌ bʌ i yʌleꞌ. Yoque simaron la cacꞌ chucul bʌ ti lac bʌcꞌtyal. Jin chaꞌan miꞌ luꞌ xaxan lac bʌcꞌtyal yubil chaꞌan simaroniyiconla. Miꞌ tyechbeñoñla lac simaronlel cꞌʌlʌ cheꞌ alʌlon tyo la cꞌʌlʌ cheꞌ ñoxonixla.
7 Quixtyañu chꞌujbi i yuts isan pejtyel chʌ bʌ tyac ti animal. Chꞌujbi i yuts isan simaron bʌ animal yicꞌot xmaꞌtyeꞌmut yicꞌot lucum tyac yicꞌot animal am bʌ ti jaꞌ. Tsaꞌix i yuts isʌ.
8 Pero machꞌan quixtyañu chꞌujbi bʌ yuts isan la cacꞌ. Jiñʌch simaron bʌ machꞌʌ baꞌan mi yʌcꞌ i bʌ ti uts isʌntyel. Butꞌulix ti veneno yubil.
9 Ti mismo jini jach bʌ la cacꞌ mi lac sub i ñuclel Dios lac Tyat yicꞌot mi la chꞌʌqueꞌ lac piꞌʌlob, Dios bʌ tiꞌ mele jeꞌel cheꞌ bajcheꞌ an Dios.
10 Ti jin jach bʌ la cacꞌ mi laj cꞌʌñeꞌ lac sub i ñuclel Dios mi lac chꞌʌqueꞌ lac piꞌʌlob. Quermañujob mach yom lac chaꞌlen cheꞌ bajcheꞌ jini.
11 ¿Mejl ba i loqꞌuel sumuc bʌ jaꞌ yicꞌot machꞌʌ sumuc ti jumpꞌej jach i pasib jaꞌ? Mach mejl.
12 Quermañujob, ¿mejl ba i yʌcꞌ aceituna bʌ i wut jini higuera bʌ tyeꞌ? ¿Mejl ba i yʌcꞌ i wut higo ti yʌqꞌuil tsꞌujsub? Mach mejl. Chʌꞌʌch jeꞌel mach locꞌ sumuc bʌ yicꞌot machꞌʌ sumuc bʌ jaꞌ ti jumpꞌej jach bʌ i pasib jaꞌ.
Jini yoque wen bʌ lac ñaꞌtyʌbal
13 Mi an juntiquil baꞌ añetla wen am bʌ i ñaꞌtyʌbal, wen niqꞌui yujil bʌ, laꞌ i tsictisan ti wen bʌ i chaꞌlibal. Machꞌan mi chan isan i bʌ jini am bʌ wen bʌ i ñaꞌtyʌbal.
14 Pero mi chʌncol jach laꞌ tsꞌaꞌqꞌuel cheꞌ an chʌ bʌ an i chaꞌan yambʌ laꞌ piꞌʌl, mi mucꞌ jach laꞌ mel chʌ bʌ yom laꞌ bajñel pusicꞌal, mach yom laꞌ lolon qꞌuel laꞌ bʌ ti ñuc cheꞌ bajcheꞌ mi an cabʌl laꞌ ñaꞌtyʌbal. Como muqꞌuet jach la ti lot. Mach melelic.
15 Como jini lac pensal cheꞌ bajcheꞌ jini, mach tyʌlemic ti Dios. Tyʌlem jach ti ili mulawil. I chaꞌan jach quixtyañu yicꞌot i chaꞌan xiba.
16 Como baꞌical an tsꞌaꞌqꞌuelol chaꞌan chʌ bʌ an i chaꞌan i piꞌʌlob yicꞌot i melol chʌ bʌ yes bajñel yom i pusicꞌal mach ñʌchꞌʌlic yaꞌi. Yaꞌan pejtyel machꞌʌ wen.
17 Pero jini tyʌlem bʌ i ñaꞌtyʌbal ti Dios sʌc mi yajñelob. Cheꞌ jini ñʌchꞌʌl mi yajñelob. Utsob. Chꞌujbi i pejcʌntyel ti wen. Miꞌ pꞌuntyañob i piꞌʌlob. Miꞌ melob chʌ bʌ wen. Machꞌan chaꞌchajp i pensal. Machꞌan miꞌ lolon pʌs i bʌ ti wen.
18 Jini chʌncol bʌ i yajñel ti ñʌchꞌʌl chʌncox i cotyan i yajñel ti ñʌchꞌtyʌlel yañoꞌ bʌ. Mi quej i yajñelob ti wen.