2 Cꞌoꞌojlʌch ti ochi baꞌ muchꞌquilbiletla juntiquil am bʌ sortija tiꞌ cꞌʌb melel bʌ ti oro. [Sortija yom i yʌleꞌ mʌpcꞌaꞌ.] Lʌpʌl i chaꞌan wen bʌ i pislel. Cꞌoꞌojlʌch ti ochi jeꞌel juntiquil pꞌumpꞌun bʌ lʌpʌl bʌ i chaꞌan tsucul bʌ i pislel.

3 Cꞌoꞌojlʌch ti laꞌ subeꞌ am bʌ wen bʌ i pislel: Buchiꞌ wʌꞌi ti wen bʌ buchlibʌl, cheꞌetla. Pero jini pꞌumpꞌun bʌ mi laꞌ suben: Waꞌi wʌꞌi o buchiꞌ wʌꞌ ti lum, cheꞌetla.

4 Mach junlajal chʌncol laꞌ qꞌuelob ti uts. Cheꞌ bajcheꞌ melojel muqꞌuetla yubil chaꞌan ti machꞌʌ wen bʌ laꞌ pensal cheꞌ maꞌan junlajal mi laꞌ qꞌuel ti uts laꞌ piꞌʌlob.

5 Pꞌuntyʌbilet bʌ la hermañujob, ubinla: Dios ti yajcʌ jini pꞌumpꞌun bʌ wʌꞌ ti mulawil chaꞌan mi yochel ti rico yubil cheꞌ miꞌ wen chꞌujbin tiꞌ pusicꞌal. Ti yajcʌ jeꞌel chaꞌan mi yʌqꞌuentyel i yochel baꞌ miꞌ chaꞌlen yumʌl Dios. Tsaꞌix i wʌ alʌ Dios mi quej i yʌqꞌueñonla muꞌ bʌ lac pꞌuntyan Dios.

6 Pero chʌncox laꞌ wʌcꞌ ti quisnil jini pꞌumpꞌuñoꞌ bʌ. ¿Machꞌa jinic ricojoꞌ bʌ muꞌ bʌ i tyʌcꞌlañetla muꞌ bʌ i pʌyetla baꞌan jini am bʌ i yeꞌtyel? ¿Chucoch maꞌ más qꞌuel ti wen cheꞌ jini?

7 ¿Mach ba jinic jini ricojoꞌ bʌ muꞌ bʌ i contrajin i tꞌan Cristo yom bʌ qꞌuejlel ti ñuc? Pero mi laꞌ pejcʌntyel ti i chaꞌañoꞌ bʌ Cristo.

8 Weñʌch mi laꞌ chaꞌlen cheꞌ mi laꞌ yoque jacꞌ jini más ñuc bʌ mandar am bʌ ti Tsꞌijbubil bʌ i Tꞌan Dios muꞌ bʌ yʌleꞌ: Pꞌuntyan a piꞌʌlob cheꞌ bajcheꞌ maꞌ bajñel pꞌuntyan a bʌ, cheꞌen.

9 Pero mi mach junlajal mi laꞌ qꞌuel chʌncol laꞌ wotsan laꞌ mul. Mi laꞌ wʌjlel ti xmulil chaꞌan ti mandar Dios.

10 Como mi an juntiquil muꞌ bʌ i luꞌ jacꞌ pejtyel jini mandar, pero mi tiꞌ ñusʌ jumpꞌej mi yʌjlel ti xmulil. Como lajalʌch cheꞌ bajcheꞌ tiꞌ luꞌ ñusa ti pejtyel i mandar, Dios.

11 Jini jach bʌ Dios tsaꞌ bʌ yʌlʌ: Mach a chaꞌlen a tsuculel, ti yʌlʌ jeꞌel: Mach a chaꞌlen tsʌnsa, cheꞌen. Cheꞌ jini mi machꞌan miꞌ chaꞌlen i tsuculel, pero miꞌ chaꞌlen tsʌnsa tsaꞌix i ñusʌbe i mandar Dios.

12 Yom mi laꞌ chaꞌlen wen bʌ tꞌan. Yom mi laꞌ wajñel ti wen. Como mi quej lac mel lac bʌ chaꞌan ti mandar. Jiñʌch jini mandar muꞌ bʌ i colonla.

13 Dios maꞌix mi quej i pꞌuntyañob ti yorojlel melojel jini machꞌʌ baꞌan tiꞌ pꞌuntyʌyob yañoꞌ bʌ. Pero jini tsaꞌ bʌ i pꞌuntyʌyob yañoꞌ bʌ mi quej i ganarin ti yorojlel melojel.

14 Quermañujob, maꞌix i cꞌʌjnibal mi an majch mi yʌleꞌ: Mic chꞌujbin tic pusicꞌal, cheꞌen, pero machꞌan chʌ bʌ wen miꞌ chaꞌlen. Maꞌan mi cotyʌntyel cheꞌ mi lolon al miꞌ chꞌujbin Dios cheꞌ maꞌix miꞌ yoque chꞌujbin Dios tiꞌ pusicꞌal.

15 Laꞌ lac poj al an juntiquil hermano mi hermana mach bʌ jasʌl i pislel i weꞌel i yuchꞌel chaꞌan ti jujumpꞌej qꞌuin.

16 Laꞌ lac poj al an juntiquiletla mi laꞌ wʌleꞌ: Cucu, qꞌuelex a bijlel. Wen moso a bʌ. Wen chaꞌlen uchꞌel, cheꞌet. Pero mi machꞌan chʌ bʌ yes ti a wʌqꞌue, lolon jachix ti a wʌlʌ.

17 Chʌꞌʌch jeꞌel mi chʌncol la cʌleꞌ mi lac chꞌujbin Dios ti lac pusicꞌal, pero mi machꞌanix tsiquil ti lac melbal lolon jachix cheꞌ jini.

18 Pero mi an juntiquil muꞌ bʌ yʌleꞌ: Maꞌ chꞌujbin Dios ti a pusicꞌal, cheꞌet. Joñon mic chaꞌlen wen bʌ, cheꞌen. Pʌsꞌeñon bajcheꞌ maꞌ chꞌujbin Dios cheꞌ maꞌix maꞌ chaꞌlen wen bʌ. Joñon mic pʌsꞌeñet mic chꞌujbin Dios tic pusicꞌal chaꞌan ti wen bʌ mic chaꞌlen, cheꞌen.

19 Chʌncox a ñaꞌtyan an jach juntiquil Dios. Weñʌch maꞌ ñaꞌtyan. Jinic tyo xibajob jeꞌel miꞌ ñaꞌtyan an Dios. Tsitsiñayob ti bʌqꞌuen.

20 Jatyet machꞌanix maꞌ ñaꞌtyan mi chʌncol lac lolon aleꞌ mi lac chꞌujbin Dios ti lac pusicꞌal pero mi machꞌan tsiquil wen bʌ lac melbal lolom jach mi la cʌl cheꞌ jini.

21 Dios tiꞌ qꞌuele ti tyoj lac yum ti ñoj oniyix Abraham bʌ i cꞌabaꞌ chaꞌan ti jini tsaꞌ bʌ i chaꞌle. Abraham ti yʌqꞌue Dios i yalobil Isaac bʌ i cꞌabaꞌ chaꞌan tsʌnsʌbil bʌ i majtyan yubil.

22 Qꞌuele awilan, ti tsictiyi Abraham tiꞌ wen chꞌujbi tiꞌ pusicꞌal chaꞌan ti jini tsaꞌ bʌ i chaꞌle. Tsꞌʌcʌl bajcheꞌ ti yʌlʌ melelʌch i tꞌan Dios como ti tsictiyi cheꞌ ñac tiꞌ jacꞌbe i tꞌan.

23 Cheꞌ jini ti tsꞌʌctiyi jini tsꞌijbubil bʌ tiꞌ tꞌan Dios muꞌ bʌ yʌleꞌ: Abraham tiꞌ chꞌujbi Dios tiꞌ pusicꞌal. Jasʌl ti yubi Dios chaꞌan i qꞌuel ti tyoj Abraham. Abraham ti pejcʌnti ti i piꞌʌl Dios.

24 Wale qꞌuele awilan, Dios miꞌ qꞌuel ti tyoj quixtyañu chaꞌan ti jini muꞌ bʌ i chaꞌlen, mach chaꞌanic jach mi yʌleꞌ melelʌch i tꞌan Dios.

25 Chʌꞌʌch ti ujti yicꞌot juntiquil ꞌixic Rahab bʌ i cꞌabaꞌ tsaꞌ bʌ cabʌl chaꞌle i tsuculel cheꞌ ñac tiꞌ choño i bʌ, pero tiꞌ cotyʌyob jini ajqꞌuel pañimilob cheꞌ ñac tiꞌ pʌyʌ ochel ti cꞌaj oj yicꞌot tiꞌ chaꞌ pʌsꞌeyob yambʌ bij chaꞌan mi sujtyelob. Dios tiꞌ qꞌuele ti tyoj chaꞌan tiꞌ cotyʌyob i chaꞌañoꞌ bʌ Dios.

26 Maꞌix i cꞌʌjnibal lac bʌcꞌtyal mi loqꞌuemix lac chꞌujlel. Chʌꞌʌch jeꞌel maꞌix i cꞌʌjnibal mi lac lolon al melelʌch i tꞌan Dios cheꞌ maꞌix mi lac yoque chꞌujbin ti lac pusicꞌal cheꞌ maꞌix tsiquil wen bʌ lac chaꞌlibal.