2
Jin chaꞌan cʌyʌla ti pejtyelel laꞌ simaronlel, ti pejtyelel laꞌ lot yicꞌot i chaꞌchajplel bʌ laꞌ pensal yicꞌot cheꞌ an michꞌlel chaꞌan i wenlel yambʌ quixtyañu yicꞌot pejtyelel jopꞌtꞌan.2-3 Yom mi laꞌ wersa cꞌajtin yʌlo i tꞌan jach bʌ Dios cheꞌ bajcheꞌ miꞌ cꞌajtin i chuꞌ chꞌoc alʌl chaꞌan mi laꞌ pꞌʌtyʌliyel majlel chaꞌan laꞌ cotyʌntyel cheꞌ tsaꞌix laꞌ yoque cʌñʌ chaꞌan weñʌch lac Yum.
Cristo cheꞌ bajcheꞌ cuxul bʌ tyun
4 Lʌcꞌʌla chaꞌan mi laꞌ más cʌñeꞌ lac Yum jini cuxul bʌ tyun yubil. Jiñʌch jini tyun tsaꞌ bʌ i choco quixtyañujob. Pero jiñʌch jini tyun tsaꞌ bʌ i yajcʌ Dios. Miꞌ qꞌuel ti ñuc bʌ i cꞌʌjnibal.
5 Jatyetla jeꞌel laꞌ i cꞌʌñetla Dios cheꞌ bajcheꞌ mi cuxul bʌ tyuñetla chaꞌan mi laꞌ wajñel ti jumpꞌej bʌ i templojetla Dios yicꞌot chaꞌan mi laꞌ wajñel ti junmujchꞌ curajetla i chaꞌan bʌ Dios. Chaꞌan ti Jesucristo mi laꞌ wʌqꞌuen Dios i majtyan muꞌ bʌ i mulan.
6 Jin chaꞌan ti Tsꞌujbubil bʌ i Tꞌan Dios mi yʌl:
Yaꞌ ti Sión mic waꞌchoco juntiquil cheꞌ bajcheꞌ ñuc bʌ tyun am bʌ i cꞌʌjnibal muꞌ bʌ i yajñel ti i xujcꞌ templo yubil. Yajcʌbil jini tyun. Ñuc i cꞌʌjnibal jeꞌel.
Jini muꞌ bʌ i chꞌujbin machꞌan mi quej i quisnin.
7 Chaꞌañetla muꞌ bʌ laꞌ chꞌujbin, ñuc i cꞌʌjnibal jini tyun. Pero chaꞌan jini machꞌʌ baꞌan miꞌ chꞌujbin, mi tsꞌʌctiyel jini wʌ tsꞌijbubil bʌ baꞌ mi yʌleꞌ:
Jini tyun tsaꞌ bʌ i chocoyob xmel otyot
tsaꞌix ochi ti más ñuc bʌ i cꞌʌjnibal.
Cheꞌ mi yʌleꞌ.
8 Mi tsꞌʌctiyel jini wʌ albil bʌ i tꞌan Dios:
Jiñʌch jini tyun baꞌ miꞌ jatsꞌob i yoc. Ti caj jini tyun mi quej i yajlelob,
cheꞌen. Como tiꞌ jatsꞌʌyob i yoc yubil cheꞌ bajcheꞌ ti wʌ ñaꞌtyʌnti cheꞌ machꞌan tiꞌ chꞌujbiyob jini tꞌan chaꞌan laj cotyʌntyel.
Jini i chaꞌañoꞌ bʌ Dios
9 Pero mach cheꞌiqui añetla. Pero jatyetla yajcʌbil bʌ junmujchꞌ quixtyañujetla tsaꞌ bʌ yajcʌyetla Dios. I curajetla jini muꞌ bʌ laꞌ chaꞌliben i toñel ñuc bʌ yumʌl. Junmujchꞌ quixtyañujetla tsaꞌ bʌ laꞌ wʌcꞌʌ laꞌ bʌ ti Dios. I chaꞌañetla Dios. Chʌꞌʌch ti yajcʌntiyetla chaꞌan mi laꞌ tsictisan ñuc bʌ i chaꞌlibal Dios. Tiꞌ pʌyʌyetla loqꞌuel ti icꞌtꞌojñal chaꞌan mi laꞌ wajñel ti ñoj ñuc bʌ i sʌclel Dios.
10 Ti oniyi maꞌix ti ajniyetla ti i chaꞌañetla Dios pero wale iliyi i chaꞌañetla Dios. Ti yambʌ ora machꞌan ti laꞌ tyajbe i yutslel Dios, pero wale iliyi tsaꞌix laꞌ tyajbe i yutslel.
Chaꞌlibenla i troñel Dios
11 Pꞌuntyʌbilet bʌ la hermañujob, mij cꞌajtibeñetla ti wocol tꞌan chaꞌan machꞌan mi laꞌ meleꞌ chʌ bʌ miꞌ mulan i bajñel laꞌ pusicꞌal muꞌ bʌ i chaꞌlen contrajiya ti laꞌ pusicꞌal. Como mach wʌꞌic an laꞌ lumal wʌꞌ ti mulawil.
12 Ajñenla ti tyoj tiꞌ tyojlel jini machꞌʌ baꞌan miꞌ cʌñob Dios. Cheꞌ jini aunque miꞌ chaꞌlen tꞌan ti laꞌ contra cheꞌ bajcheꞌ mi lolon al simaroñetla, pero mi quej i yilan jini wen bʌ laꞌ chaꞌlibal. Mi quej i sub i ñuclel Dios chaꞌan ti caj jatyetla ti i yorojlel melojel.
13 Chaꞌan ti caj lac Yum, acꞌʌ laꞌ bʌ tiꞌ wenta ti pejtyelel añoꞌ bʌ yeꞌtyel tsaꞌix bʌ waꞌchoconti ti quixtyañujob. Acꞌʌ laꞌ bʌ tiꞌ wenta jini más ñuc bʌ yumʌl como ñuc i yeꞌtyel.
14 Acꞌʌ laꞌ bʌ tiꞌ wenta jini añoꞌ bʌ ñuc bʌ i yeꞌtyel muꞌ bʌ i choc tyʌlel am bʌ yeꞌtyel chaꞌan i yʌqꞌuen i xotꞌ i mul jini muꞌ bʌ i chaꞌlen simaronlel. An tiꞌ wenta añoꞌ bʌ ñuc bʌ yeꞌtyel jeꞌel chaꞌan miꞌ sub i ñuclel jini muꞌ bʌ i chaꞌleñob chʌ bʌ wen.
15 Como yom Dios chaꞌan ti wen bʌ laꞌ chaꞌlibal mi laꞌ ñʌchꞌtyʌsʌbeñob jini machꞌʌ baꞌan miꞌ ñaꞌtyañob yicꞌot tonto bʌ quixtyañujob.
16 Ajñenla ti laꞌ librejlel cheꞌ maꞌix chuculetla ti mulil, pero mach yom mi laꞌ lolon chaꞌlen mach bʌ wen bʌ chaꞌan ti caj libre añetla. Ajñenla ti wen cheꞌ bajcheꞌ ajtroñelet jach la i chaꞌan Dios.
17 Qꞌuelela ti ñuc ti pejtyelel quixtyañujob. Pꞌuntyañob la quermañujob. Bʌcꞌñanla Dios. Qꞌuele ti ñuc jini am bʌ más ñuc bʌ yeꞌtyel.
Cristo tiꞌ pʌsʌ bajcheꞌ yom mi lac ñusan wocol
18 Ajtroñelob, chꞌujbibenla i tꞌan laꞌ yum wʌꞌ ti mulawil. Qꞌuelela ti ñuc. Mach i bajñelic yom mi laꞌ qꞌuel ti ñuc jini weñoꞌ bʌ yicꞌot uts bʌ laꞌ wicꞌot, pero qꞌuele ti ñuc jeꞌel jini simaron bʌ laꞌ yum.
19 Chaꞌan ti caj la com lac mel chʌ bʌ yom Dios mi laj cuch ti wen lac wocol cheꞌ maꞌix lac mul. Weñʌch miꞌ qꞌuelonla Dios.
20 Pero mi ti caj laꞌ simaronlel mi laꞌ xotꞌ laꞌ mul, ¿am ba laꞌ ñuclel cheꞌ mi laꞌ cuch ti wen jini wocol? Machꞌan. Pero mi ti ñʌchꞌʌl ti laꞌ ñusʌ wocol chaꞌan ti caj wen bʌ ti laꞌ chaꞌle, weñʌch miꞌ qꞌueletla Dios.
21 Dios tiꞌ pʌyʌyetla laꞌ ñusan wocol. Chʌꞌʌch tiꞌ ñusʌ wocol Cristo chaꞌañetla. Tiꞌ pʌsbeyetla bajcheꞌ yom mi laꞌ ñusan chaꞌan chʌꞌʌch lajal mi laꞌ ñusan jeꞌel.
22 Machꞌan tiꞌ saj chaꞌle mulil Cristo. Maꞌix baꞌ bʌ ora tiꞌ loti quixtyañujob.
23 Cheꞌ ñac ti wajlenti machꞌan tiꞌ qꞌuextyʌbe tꞌan. Cheꞌ ñac ti yʌqꞌueyob i ñusan wocol machꞌan tiꞌ bʌcꞌtisʌyob. Pero ti yʌcꞌʌ i bʌ tiꞌ cꞌʌb Dios muꞌ bʌ i chaꞌlen tyoj bʌ melojel.
24 Cristo i bajñel tiꞌ chꞌʌmʌ tiꞌ wenta i xotꞌ lac mul ti cruz chaꞌañonla. Cheꞌ bajcheꞌ tsaꞌix sajtiyonla chaꞌan maꞌix mi lac bej chaꞌlen mulil. Chaꞌan cuxulonla mi la cajñel ti tyoj. Chaꞌan tiꞌ ñusʌ wocol tiꞌ lajmisʌyonla.
25 Como jatyetla ti ajniyetla cheꞌ bajcheꞌ tiñʌmeꞌ tsaꞌ bʌ i sʌtyʌyob i bijlel. [Tiñʌmeꞌ yom i yʌleꞌ oveja.] Pero wale iliyi tsaꞌix laꞌ sutqui laꞌ bʌ baꞌan Cristo. Jini miꞌ cʌñʌtyañetla cheꞌ bajcheꞌ ajcʌñʌtya tiñʌmeꞌ. Miꞌ chꞌʌm tiꞌ wenta laꞌ pusicꞌal.