2 Laꞌ bej oqꞌuisʌbentiquetla i yutslel i tꞌan yicꞌot i ñʌchꞌtyʌlel laꞌ pusicꞌal chaꞌan ti caj mi laꞌ cʌñeꞌ majlel Dios yicꞌot Jesús lac Yum.

3 Chaꞌan ti i pꞌʌtyʌlel Dios ti yʌqꞌueyonla ti pejtyelel cꞌʌjnibal bʌ lac chaꞌan, chaꞌan cuxul mi la cajñel yicꞌot chaꞌan lac chꞌujbin cheꞌ mi laj cʌn lac Yum Jesús. Tiꞌ pʌyʌyonla chaꞌan mi lac chꞌujbin chaꞌan tiꞌ bajñel ñuclel yicꞌot ti ñuc bʌ i chaꞌlibal.

4 Chaꞌan tiꞌ ñuclel yicꞌot i pꞌʌtyʌlel ti yʌqꞌueyonla ñoj ñuc bʌ i tꞌan am bʌ ñuc bʌ i cꞌʌjnibal. Chaꞌan ti ili tꞌan tsaꞌ bʌ wʌ yʌqꞌueyonla, chꞌujbi lac chꞌʌm lac wenlel loqꞌuem bʌ ti i wenlel Dios. Chaꞌan ti ili tꞌan chꞌujbi lac putsꞌel loqꞌuel ti jini machꞌʌ wen am bʌ ti ili mulawil chaꞌan ti caj i mulʌntyel i melol jini machꞌʌ wen.

5 Jin chaꞌan yom mi laꞌ chaꞌlen wersa chaꞌan mi yocꞌan wen bʌ laꞌ chaꞌlibal cheꞌ mi laꞌ chꞌujbin. Ti wen bʌ laꞌ chaꞌlibal yom mi yocꞌan laꞌ ñaꞌtyʌbal.

6 Cheꞌ an laꞌ ñaꞌtyʌbal yom mi yocꞌan i ticꞌol laꞌ pusicꞌal. Cheꞌ an i ticꞌol laꞌ pusicꞌal yom mi yocꞌan i cuchol lac wocol ti wen. Cheꞌ an i cuchol lac wocol ti wen yom mi laꞌ más pꞌuntyan Dios.

7 Cheꞌ mi laꞌ más pꞌuntyan Dios yom mi más ocꞌan laꞌ pꞌuntyaya tiꞌ tyojlel hermañujob. Cheꞌ más an laꞌ pꞌuntyaya tiꞌ tyojlel hermañujob yom mi más ocꞌan laꞌ pꞌuntyaya tiꞌ tyojlel yambʌ quixtyañujob.

8 Mi an laꞌ chaꞌan ili tyac, cheꞌ mi ocꞌan ili wen tyac bʌ an laꞌ cꞌʌjnibal. Mach lolomic jach ti laꞌ cʌñʌ lac Yum Jesucristo.

9 Pero jini machꞌʌ baꞌan i chaꞌan ili tyac lajalʌch bajcheꞌ mutsꞌul i wut o bajcheꞌ machꞌʌ baꞌan mi cꞌotyel i wut ti ñajt. Lajalʌch cheꞌ bajcheꞌ tsaꞌix ñajayi tiꞌ pusicꞌal chaꞌan ti ñusʌnti i mul ti yambʌ ora.

10 Jin chaꞌan hermañujob, ajñenla ti xucꞌul chaꞌan mi tsictiyel Dios tiꞌ pʌyʌyetla chaꞌan laꞌ chꞌujbin yicꞌot chaꞌan ti yajcʌyetla. Mi chʌncol laꞌ wen ñaꞌtyan, maꞌix baꞌ bʌ ora mi laꞌ yajlel ti mulil.

11 Cheꞌ jini ti tijicñʌyel i pusicꞌal mi quej i yotsañetla baꞌ miꞌ chaꞌlen yumʌl ti beleꞌ ora lac Yum Jesucristo, Ajcotyaya lac chaꞌan.

12 Jin chaꞌan mic bej cꞌajtisʌbeñetla ili tyac aunque laꞌ wujil isujm. Xucꞌuletla ti jini melel bʌ tꞌan chʌncol bʌ laꞌ chꞌujbin.

13 Pero mic ñaꞌtyan weñʌch mic bej cꞌajtisʌbeñetla jini tꞌan cheꞌ cuxulon tyo.

14 Tsaꞌix i tsictisʌbeyon lac Yum Jesucristo chaꞌan mach jalix mi quej c sajtyel.

15 Pero com c beleꞌ subeñetla chaꞌan cheꞌ sajtyemonix, chꞌujbi tyo laꞌ beleꞌ cꞌajtisan ili tꞌan tyac.

16 Ti lojon quilʌ lac Yum ti i ñuclel. Jin chaꞌan mach tꞌanic jach tsaꞌ bʌ lojon c bajñel pensali ti lojon c subeyetla chaꞌan i ñuclel yicꞌot chaꞌan mi quej i chaꞌ tyʌlel lac Yum Jesucristo.

17 Ti lojon quilʌ cheꞌ Dios i Tyat lac Yum Jesucristo tiꞌ tsictisʌ i ñuclel. Dios tiꞌ sube ti cꞌotyajax bʌ tꞌan: Jiñʌch calobil chʌncol bʌ c pꞌuntyan. Weñʌch mij qꞌueleꞌ, cheꞌen.

18 Ti lojon cubi jini ajtꞌan loqꞌuem bʌ ti panchan. Yaꞌañon lojon yicꞌot lac Yum ti jini wits muꞌ bʌ i pejcʌntyel ti chꞌujul bʌ wits.

19 An tyo jeꞌel más xucꞌul bʌ tꞌan tsaꞌ bʌ i tsꞌijbuyob jini tsaꞌ bʌ i xiqꞌui yʌleꞌ Dios ti ñoj oniyix. Weñʌch mi ti laꞌ chꞌujbi jini tꞌan cheꞌ bajcheꞌ cꞌajc muꞌ bʌ ti lejmel ti icꞌtꞌojñal jintyo mi sʌcꞌan pañimil yubil, jintyo mi tsictiyel Cristo cheꞌ bajcheꞌ ñoj ecꞌ yubil chaꞌan i yʌcꞌ i sʌclel ti laꞌ pusicꞌal.

20 Pero yom mi laꞌ ñaxan ñaꞌtyan iliyi. Maꞌan majch chꞌujbi i bajñel naꞌtyan i sujmlel ti i bajñel bʌ i ñaꞌtyʌbal jini Tsꞌujbubil bʌ i Tꞌan Dios tsaꞌ bʌ i xiqꞌui yʌleꞌ Dios ti ñoj oniyix.

21 Machꞌan tiꞌ chaꞌleyob tꞌan am bʌ tiꞌ bajñel pusicꞌal jini tsaꞌ bʌ xijqꞌuiyob i yʌleꞌ ti Dios. Pero chaꞌan i chaꞌañoꞌ bʌ Dios ti yʌlʌyob chʌ bʌ yom Dios como jini Chꞌujul bʌ i Chꞌujlel Dios tiꞌ subuyob jini tꞌan.