Ajcʌñʌtya i chaꞌan ochemoꞌ bʌ tiꞌ tꞌan Dios
5
Wale mic suben ancianojob yaꞌ baꞌ añetla muꞌ bʌ laꞌ muchꞌquin laꞌ bʌ como ancianojon jeꞌel cheꞌ bajcheꞌetla. Ti quilʌ bajcheꞌ tiꞌ ñusʌ wocol Cristo. Joñon jeꞌel, mi quej cʌqꞌuentyel c ñuclel muꞌ bʌ quej i tsictiyel ti wiꞌil.2 Cʌñʌtyañob i chaꞌañoꞌ bʌ Dios cheꞌ bajcheꞌ tiñʌmeꞌob i chaꞌan am bʌ ti laꞌ wenta. Cʌñʌtyanla, pero chaꞌan cheꞌ yom laꞌ pusicꞌal, mach chaꞌanic xiqꞌuiletla. Mach yom mi laꞌ cʌñʌtyan chaꞌan jach laꞌ wom laꞌ ganarin tyaqꞌuin. Pero chaꞌlenla laꞌ troñel ti pejtyelel laꞌ pusicꞌal.
3 Mach yom mi laꞌ xicꞌob jini muꞌ bʌ laꞌ cʌñʌtyan cheꞌ bajcheꞌ mi i yumetla. Pʌsʌla ti laꞌ chaꞌlibal bajcheꞌ yom miꞌ melob ti wen bʌ pʌsoñel.
4 Cheꞌ jini, cheꞌ mi tsictiyel jini ñuc bʌ Ajcʌñʌtya Tiñʌmeꞌ mi quej laꞌ wʌqꞌuentyel wen bʌ laꞌ majtyan machꞌʌ yujil jilel. Mach cheꞌic bajcheꞌ jini corona melel jach bʌ ti yopol tyeꞌ muꞌ bʌ i jilel bajcheꞌ jini muꞌ bʌ i yʌqꞌuentyelob xꞌalasob ti oniyix.
5 Chʌꞌʌch jeꞌel alobet bʌ la, acꞌʌ laꞌ bʌ tiꞌ wenta jini ancianojob. Yom mi laꞌ luꞌ acꞌ laꞌ bʌ tiꞌ wenta laꞌ piꞌʌlob ti i pecꞌlel laꞌ pusicꞌal como:
Dios miꞌ contrajin jini muꞌ bʌ i chan isan i bʌ tiꞌ tyojlel i piꞌʌlob,
pero miꞌ cotyan ti i yutslel jini muꞌ bʌ i juꞌsan i pusicꞌal.
6 Jin chaꞌan juꞌsan laꞌ bʌ tiꞌ tyojlel Dios am bʌ i pꞌʌtyʌlel chaꞌan Dios mi quej i yʌqꞌueñetla laꞌ ñuclel cheꞌ ti yorojlel.
7 Aqꞌuenla tiꞌ wenta Dios ti pejtyelel laꞌ pensal tyac como Dios miꞌ bej pensalin i cotyañetla.
8 Yom bej xucꞌuletla. Yom bej pꞌixiletla yubil como jini laꞌ contra, jini xiba, muꞌ ti pam xʌmbal ñumel cheꞌ bajcheꞌ colem bajlʌm chʌncol bʌ ti cʌrʌcñʌyel ñumel. Miꞌ sʌclan majchqui chꞌujbi i jisan.
9 Pʌsʌ laꞌ bʌ tiꞌ contra xiba. Yom xucꞌuletla ti jini muꞌ bʌ laꞌ chꞌujbin. Ñaꞌtyanla chaꞌan lajal miꞌ ñusan wocol ti pejtyelel laꞌ wermañujob ti pejtyelel mulawil.
10 Pero cheꞌ tsaꞌix laꞌ poj ñusʌ wocol, Dios mi quej i tsꞌʌctisan i xucꞌtyʌlel laꞌ pusicꞌal. Miꞌ pꞌʌtyʌlisañetla. Miꞌ xucꞌchocoñetla chaꞌan machꞌan mi laꞌ nijcʌyel. Jiñʌch jini Dios muꞌ bʌ i yʌqꞌueñonla ti pejtyelel chʌ bʌ wen. Tiꞌ pʌyʌyonla chaꞌan mi lac tyem chꞌʌm i ñuclel machꞌʌ baꞌan mi jilel cheꞌ añonla yicꞌot Jesucristo.
11 An i ñuclel yicꞌot i pꞌʌtyʌlel ti beleꞌ ora. Amén.
Cojix bʌ saludo tyac
12 Silvano muꞌ bʌ j qꞌuel ti xucꞌul bʌ hermano tiꞌ cotyʌyon c tsꞌijbubeñetla ili saj jun baꞌ tic tsꞌijbubeyetla chaꞌan mi laꞌ más cʌñeꞌ Dios muꞌ bʌ i pꞌuntyañetla. Mi tsictiyel chaꞌan ti cabʌl wen tyac bʌ tsaꞌ bʌ aqꞌuentiyetla. Bej ajñenla ti ili tꞌan chʌncol bʌ laꞌ chꞌujbin.
13 Jini ochemoꞌ bʌ muꞌ i muchꞌquiñob i bʌ yaꞌ ti Babilonia miꞌ chocbeñetla tyʌlel saludos. Yajcʌbiloꞌ bʌ ti Dios lajal bajcheꞌ yajcʌbiletla jeꞌel. Marcos, jini calobil bʌ yubil, miꞌ chocbeñetla tyʌlel saludos jeꞌel.
14 Wen aqꞌuen laꞌ bʌ saludos cheꞌ bajcheꞌ i tyʌlel mi laꞌ chaꞌlen ti pꞌuntyaya. Laꞌ ajnic laꞌ wicꞌot i ñʌchꞌtyʌlel laꞌ pusicꞌal ti pejtyeleletla i chaꞌañet bʌ la Jesucristo. Amén.