2 chaꞌan i bej yajñel cheꞌ bajcheꞌ yom Dios cheꞌ wʌꞌ tyo an ti mulawil. Mach yom i bej mel chʌ bʌ yom i bajñel pusicꞌal.

3 Jasʌlix jini qꞌuin tyac tsaꞌ bʌ laꞌ cꞌʌñʌ ti melol machꞌʌ wen muꞌ bʌ i mulan i melob jini machꞌʌ baꞌan miꞌ cʌñob Dios. Ti jim bʌ ora ti laꞌ chaꞌle chʌ bʌ yom tsucul bʌ laꞌ pusicꞌal. Wersa laꞌ wom laꞌ chaꞌlen machꞌʌ wen. Xqꞌuixnijeletla. Ti laꞌ chaꞌle cabʌl qꞌuiñejel tyac, yicꞌot cabʌl qꞌuixnijel tyac. Ti laꞌ chaꞌle ticꞌbil bʌ quisintic bʌ i yumintyel dios tyeꞌ tyac.

4 Tyoj bʌcꞌñʌjelob miꞌ qꞌuelob cheꞌ maꞌix mi laꞌ bej tsʌcleñob ti i simaronlelob. Jin chaꞌan miꞌ tyajetla ti machꞌʌ wen bʌ tꞌan.

5 Pero muꞌ tyo quej i mel i bʌ tiꞌ tyojlel Dios jini chajpʌbil bʌ i meleꞌ cuxuloꞌ bʌ yicꞌot tsaꞌix bʌ sajtiyob.

6 Ti subentiyob i tꞌan Dios jini tsaꞌix bʌ sajtiyob. Aunque ti sajtiyob cheꞌ bajcheꞌ mi yujtyel yicꞌot pejtyelel quixtyañujob wʌꞌ ti mulawil, pero cuxul mi quej i yajñel ti i chꞌujlel cheꞌ bajcheꞌ cuxul Dios.

7 Chʌncol i lʌcꞌtiyel i jilibal ti pejtyelel chʌ bʌ an. Jin chaꞌan yom mi laꞌ wen ñaꞌtyan pañimil. Acꞌʌ laꞌ bʌ ti oración ti pejtyelel laꞌ pusicꞌal.

8 Jini más yom bʌ jiñʌch chaꞌan yom mi laꞌ wen pꞌuntyan laꞌ bʌ como chaꞌan ti laꞌ pꞌuntyaya mi laꞌ ñusʌbeñob cabʌl i mulob.

9 Pʌyʌla ochel ti laꞌ wotyot jini ñumel jach bʌ mucꞌob laꞌ piꞌʌlob. Aqꞌuenla chʌ bʌ yom ti ñʌchꞌtyʌlel laꞌ pusicꞌal.

10 Ti jujuntiquiletla yom mi laꞌ cꞌʌn laꞌ cꞌʌjnibal jiñʌch bajcheꞌ ti yʌqꞌueyetla Dios chaꞌan mi laꞌ cotyan laꞌ bʌ chaꞌan mi laꞌ cꞌʌn ti wen ti chajp ti chajp laꞌ cꞌʌjnibal tsaꞌ bʌ i yʌqꞌuetla Dios ti yutslel.

11 Majchqui jach miꞌ chaꞌlen tꞌan, laꞌ i chaꞌlen tꞌan bajcheꞌ yom chaꞌan i tꞌañʌch Dios. Majchqui jach muꞌ bʌ i cotyan i piꞌʌlob yom i cotyan tiꞌ pꞌʌtyʌlel muꞌ bʌ i yʌqꞌuentyel ti Dios. Ti pejtyelel muꞌ bʌ i chaꞌlen yom miꞌ chaꞌlen chaꞌan mi subentyel i ñuclel Dios chaꞌan ti Jesucristo. Laꞌ sujbic i ñuclel yicꞌot i pꞌʌtyʌlel chaꞌan ti beleꞌ ora. Amén.

12 Pꞌuntyʌbil bʌ hermañujob, mach yom tyoj bʌcꞌñʌjeletla chaꞌan ti caj jini ñoj tsʌts bʌ laꞌ wilpusicꞌlentyel cheꞌ bajcheꞌ mi laꞌ wilan mach bʌ yom ujtic ti qꞌuelol.

13 Pero tijicnisan laꞌ bʌ chaꞌan chʌncol laꞌ ñusan wocol jeꞌel cheꞌ bajcheꞌ tiꞌ ñusʌ Cristo chaꞌan wen cꞌajacña laꞌ woj cheꞌ mi laꞌ wilan i ñuclel cheꞌ mi chaꞌ tyʌlel.

14 Cheꞌ mi laꞌ wajlentyel chaꞌan ti caj Cristo, cꞌajacña laꞌ woj mi laꞌ wubin como jini Chꞌujul bʌ i Chꞌujlel Dios am bʌ i ñuclel an laꞌ wicꞌot. Jini muꞌ bʌ i wajleñetla miꞌ tyajob Dios ti machꞌʌ wen bʌ tꞌan, pero jatyetla mi laꞌ tsictisan i ñuclel.

15 Mi ti laꞌ ñusʌ wocol, mach yom an laꞌ mul chaꞌan ti caj tsʌnsa, mi ti caj xujchꞌ mi ti caj ti laꞌ ñusʌ mandar mi ti caj ti laꞌ wotsʌ laꞌ bʌ baꞌ mach laꞌ wentajic.

16 Pero mi an majch miꞌ ñusan wocol chaꞌan ti caj i chaꞌan Cristo, mach yom quisintic mi yubin, pero yom miꞌ sub i ñuclel Dios como i chaꞌañʌch.

17 Como i yorojlelix mi quej i melob i bʌ i chaꞌañoꞌ bʌ Dios. Mi ñaxan miꞌ melonla, ¿bajcheꞌ mi quej i yujtyel yicꞌot jini machꞌʌ baꞌan miꞌ chꞌujbibeñob i tꞌan Dios?

18 Mi wocol miꞌ tyajob i cotyʌntyel jini tyojoꞌ bʌ, ¿bajcheꞌqui mi yujtyel jini simaroñoꞌ bʌ yicꞌot xmulilob, maꞌ wʌl?

19 Jini muꞌ bʌ i ñusan wocol jiñʌch bajcheꞌ yom Dios. Yom miꞌ bej chaꞌlen wen bʌ. Yom i yʌcꞌ i bʌ tiꞌ wenta Dios tsaꞌ bʌ i mele como xucꞌulʌch Dios.