2 como mi quej i yilan tyoj bʌ laꞌ chaꞌlibal yicꞌot chʌncol laꞌ qꞌueleꞌ ti ñuc laꞌ ñoxiꞌal.

3 Mach yom cꞌotyajetla chaꞌan jach mi laꞌ wen chꞌʌl laꞌ jol, mi chaꞌanic mi laꞌ xoj cabʌl ora mi chaꞌanic ñoj wen tyac bʌ laꞌ pislel muꞌ bʌ i qꞌuel quixtyañu wʌꞌ ti mulawil.

4 Pero yom cꞌotyajetla cheꞌ chꞌʌlʌletla chaꞌan jini am bʌ ti laꞌ pusicꞌal. I cꞌotyajlel xꞌixic machꞌʌ baꞌan mi jilel jiñʌch i yutslel yicꞌot i ñʌchꞌtyʌlel i pusicꞌal. Jiñʌch muꞌ bʌ i qꞌuel Dios ti ñuc bʌ i cꞌʌjnibal.

5 Chʌꞌʌch jeꞌel jini xucꞌul bʌ xꞌixicob ti ñoj oniyix tiꞌ chꞌujbiyob Dios yicꞌot ti yʌcꞌʌyob i bʌ ti wen tiꞌ wenta i ñoxiꞌal. Jiñʌch i chꞌʌjlil jini xꞌixicob ti ñoj oniyix.

6 Chʌꞌʌch tiꞌ chaꞌle Sara. Tiꞌ chꞌujbibe i tꞌan i ñoxiꞌal Abraham bʌ i cꞌabaꞌ. Tiꞌ sube Abraham ti i yum. Jatyetla mi laꞌ wajñel cheꞌ bajcheꞌ Sara cheꞌ mi laꞌ wajñel ti tyoj, cheꞌ maꞌix chʌ bʌ chꞌujbi i bʌcꞌtisañetla chaꞌan ti caj tyoj bʌ laꞌ melbal.

7 Jatyetla jeꞌel winicob am bʌ laꞌ wijñam, ajñenla ti tyoj laꞌ wicꞌot laꞌ wijñam. Qꞌuelela ti ñuc. Jiñʌch bajcheꞌ yom ajniquetla como mach lajal i pꞌʌtyʌlel xꞌixic bajcheꞌ winic. Cheꞌ jeꞌel junlajal an i cuxtyʌlel xꞌixic bajcheꞌ ti aqꞌuentiyetla chaꞌan ti yutslel Dios. Chʌꞌʌch yom mi laꞌ wajñel chaꞌan maꞌix mi mʌctyʌntyel laꞌ woración.

8 Cheꞌ jeꞌel yom junlajal laꞌ pensal. Yom mi laꞌ pꞌuntyan laꞌ bʌ chaꞌan laꞌ cotyan laꞌ bʌ. Yom mi laꞌ pꞌuntyan laꞌ bʌ cheꞌ bajcheꞌ laꞌ wijtsꞌin laꞌ bʌ. Yom utsetla. Yom mi laꞌ wajñel ti pecꞌ.

9 Mach yom mi laꞌ qꞌuextyan simaronlel, mi alꞌeyajic. Mach yom mi laꞌ chaꞌ wʌlꞌen jini muꞌ bʌ i yʌlꞌeñetla. Pero yom mi laꞌ wʌqꞌueñob i yutslel laꞌ tꞌan. Como Dios tiꞌ pʌyʌyetla chaꞌan mi laꞌ wʌqꞌuentyel i yutslel i tꞌan.

10 Como tsꞌijbubil:

13 Mi chʌncol laꞌ wʌcꞌ laꞌ bʌ ti melol chʌ bʌ wen, ¿machqui chꞌujbi i tyʌcꞌlañetla mi laꞌ wʌl? Machꞌan majch.

14 Pero aunque mi laꞌ ñusan wocol chaꞌan ti caj tyoj mi laꞌ wajñel, pero cꞌajacña laꞌ woj. Mach yom mi laꞌ wʌcꞌ laꞌ bʌ ti bʌcꞌtisʌntyel mi ti juntiquilic quixtyañu.

15 Pero qꞌuelela ti ñuc Cristo cheꞌ bajcheꞌ yoque laꞌ yumʌch ti laꞌ pusicꞌal. Yom bej chajpʌbiletla chaꞌan laꞌ jaqꞌueꞌ cheꞌ an majch miꞌ cꞌajtibeñetla i sujmlel muꞌ bʌ laꞌ pijtyan. Pero jacꞌʌla tiꞌ pecꞌlel laꞌ pusicꞌal. Qꞌuelela ti ñuc.

16 Ajñenla bajcheꞌ yom chaꞌan maꞌix chʌ bʌ mi yʌl laꞌ pusicꞌal chaꞌan mi quejelob ti quisin cheꞌ bajcheꞌ tiꞌ lolon tyajayetla ti machꞌʌ wen bʌ tꞌan chaꞌan ti caj wen bʌ laꞌ chaꞌlibal como chʌncol laꞌ chꞌujbin Cristo.

17 Más wen mi laꞌ ñusan wocol mi cheꞌ yom Dios, chaꞌan ti caj wen bʌ laꞌ chaꞌlibal cheꞌ bajcheꞌ mi ti laꞌ ñusʌ wocol ti caj laꞌ simaronlel.

18 Como Cristo i bajñel junyajlel jach tiꞌ ñusʌ wocol chaꞌan ti caj lac mul ti lac pejtyelel. Jini tyoj bʌ ti yʌcꞌʌ i bʌ ti sajtyel chaꞌan joñonla ajsimaronlelon bʌ la chaꞌan i pʌyonla majlel baꞌan Dios. Ti tsʌnsʌnti tiꞌ bʌcꞌtyal pero ti chaꞌ cuxtiyi chaꞌan ti Chꞌujul bʌ i Chꞌujlel.

19 Ti i chꞌujlel jeꞌel ti majli ti subtꞌan yaꞌ baꞌan jini añob jachix bʌ i chꞌujlel, jini ajcʌcholoꞌ bʌ yubil.

20 Jiñʌch i chꞌujlel jini tsaꞌ bʌ i ñusʌyob tꞌan ti ñoj oniyix ti yorojlel cheꞌ ñac Dios tiꞌ wen chaꞌle pijt chaꞌan miꞌ chꞌujbiñob cheꞌ ñac chʌncol tyo i meleꞌ jini colem barco Noé. Yaꞌ ti barco ochojob jach ti cotyʌntiyob ti jaꞌ.

21 Jini jaꞌ jiñʌch i señʌjlel chꞌʌm jaꞌ muꞌ bʌ i cotyañonla wale iliyi. Mach chaꞌanic miꞌ poc loqꞌuel laj cujquil jini chꞌʌm jaꞌ, pero miꞌ pʌseꞌ ti tyojlel Dios chaꞌan machꞌan chʌ bʌ mi yʌl lac pusicꞌal. Miꞌ cotyañonla cheꞌ mi lac chꞌujbin chaꞌan tsaꞌix tyejchi loqꞌuel Jesucristo baꞌan sajtyemoꞌ bʌ.

22 Ti letsi majlel ti panchan. Yaꞌan tiꞌ ñoj Dios chaꞌan tsiquil ñoj an i ñuclel. Ajtroñelob i chaꞌan Dios añoꞌ bʌ ti panchan yicꞌot añoꞌ bʌ yeꞌtyel ti panchan yicꞌot añoꞌ bʌ i pꞌʌtyʌlel miꞌ luꞌ yumiñob Jesucristo.