ÑAXAM BɅ JUN TSAꞌ BɅ I TSꞌIJBU JUAN
Cuxtyʌlelʌch jini Tꞌan
1
Chʌncol lojon c tsꞌijbubeñetla chaꞌan jini am bʌ cꞌʌlʌ ti tyejchibal, jini ubibil bʌ lojon c chaꞌan, jini qꞌuelel bʌ lojon tic wut, tsaꞌ bʌ lojon c wen qꞌuele bajcheꞌ ti ajni, jini tyʌlʌl bʌ lojon tij cꞌʌb. Jiñʌch jini muꞌ bʌ i tsictisan bajcheꞌ an Dios.2 Ti tsictiyi i cuxtyʌlel. Ti lojon quilʌ. Chʌncol lojon c sub chʌ bʌ ti lojon j qꞌuele. Chʌncol lojon c subeñet chaꞌan ili cuxtyʌlel machꞌʌ yujil jilel, jini am bʌ yicꞌot Dios lac Tyat. Jiñʌch tsaꞌ bʌ pʌsbentiyon lojon.
3 Mi lojon c subeñetla jini tsaꞌ bʌ lojon quilʌ, tsaꞌ bʌ lojon cubi chaꞌan mi lac tyem ajñel quicꞌotyetla. Como isujmʌch mi lac tyem ajñel la quicꞌot Dios lac Tyat yicꞌot i Yalobil. Jiñʌch Jesucristo.
4 Jin chaꞌan mi lojon c tsꞌijbubeñetla ili tꞌan chaꞌan ñoj tijicña mi laꞌ wubin jeꞌel.
Dios jiñʌch i sʌclel mulawil
5 Jiñʌch jini tꞌan tsaꞌ bʌ lojon c yoque ubi tiꞌ tiꞌ Jesucristo chʌncol bʌ c subeñetla. Jini mi yʌl, Dios jiñʌch i sʌclel mulawil. Machꞌan i sajlic yicꞌlel.
6 Mi ti la cʌlʌ chʌncox lac chꞌujbin pero mi chʌncol tyo la cajñel ti icꞌtꞌojñal chʌncolonla ti lot cheꞌ jini yicꞌot ti jini muꞌ bʌ lac lolon mel tyac.
7 Pero mi chʌncol la cajñel tiꞌ sʌclel Dios cheꞌ bajcheꞌ mi yajñel Dios, añonla la quicꞌot muꞌ bʌ i chꞌujbiñob. Cheꞌ jini i chꞌichꞌel Jesuscristo i Yalobil bʌ Dios miꞌ luꞌ pocꞌbeñonla loqꞌuel lac mul.
8 Mi ti la cʌlʌ maꞌan lac mul chʌncol jach c bajñel lotin lac bʌ. Mach melel jini lac tꞌan cheꞌ jini.
9 Pero mi ti lac subu an lac mul, miꞌ ñusʌbeñon lac mul Dios como chꞌujbi lac chꞌujbin chaꞌan junyajlel tyoj bajcheꞌ miꞌ chaꞌlen Dios. Miꞌ luꞌ choc loqꞌuel pejtyel machꞌʌ wen ti lac pusicꞌal.
10 Mi ti lac lolon alʌ mi maꞌan lac mul chʌncol jach lac cʌleꞌ xlot Dios. Ili tꞌan Dios machꞌan chʌncol lac chꞌujbin ti ñoj melel, cheꞌ jini.