2 Jesucristo ti yʌcꞌʌ i bʌ ti sajtyel chaꞌan i xotꞌbeñonla lac mul. Mach chaꞌanic jach ti lac bajñel mul joñonla, pero chaꞌan tiꞌ mulob pejtyel añoꞌ bʌ ti mulawil.

3 Mi chʌncox lac chꞌujbiben pejtyel i xicꞌojel Dios tsaꞌix laj cʌñʌ Jesús, cheꞌ jini.

4 Mi an majch mi yʌl: Tsaꞌix j cʌñʌ, cheꞌen, mi maꞌan miꞌ jacꞌben i xicꞌojel Dios, lot jach mucꞌ cheꞌ jini. Machꞌan melel i tꞌan.

5 Pero mi chʌncox lac chꞌujbiben i tꞌan chʌncox lac wen pꞌuntyan Dios. Cheꞌ jini mux lac ñaꞌtyan añonixla tiꞌ tyojlel.

6 Jini muꞌ bʌ i yʌl anix tiꞌ tyojlel Jesús, yom mi yajñel ti tyoj bajcheꞌ ti ajni Jesús.

7 Hermañujob, mach tsijibic tyo bʌ laꞌ xicꞌol chʌncol bʌ c tsꞌijbubeñetla, pero jiñʌch lac xicꞌol tsaꞌ bʌ laꞌ wubi cꞌʌlʌ ti tyejchibal cꞌʌlʌ wale chaꞌan pꞌuntyaya.

8 Pero chʌncol c chaꞌ tsꞌijbubeñetla tsijiꞌ bʌ laꞌ xicꞌol yubil chaꞌan pꞌuntyaya. Chʌꞌʌch tiꞌ chaꞌle pꞌuntyaya Cristo. Chʌꞌʌch mi laꞌ chaꞌlen pꞌuntyaya jeꞌel. Tsaꞌix tsictiyi i sʌclel Cristo ti joñonla. Chʌncolix i ñumel jini icꞌtꞌojñal.

9 Jini muꞌ bʌ i yʌleꞌ chʌncox i yajñel tiꞌ sʌclel, pero mi tsꞌaꞌ mi yilan i piꞌʌlob chʌncol tyo i yajñel ti icꞌtꞌojñal.

10 Jini chʌncol bʌ i pꞌuntyan i piꞌʌlob chʌncox i yajñel tiꞌ sʌclel Cristo. Cheꞌ jini maꞌan baꞌ mi quejel yotsan i mul.

11 Pero jini muꞌ bʌ i tsꞌaꞌlen i piꞌʌlob an tyo ti icꞌtꞌojñal. Yaꞌ tyo chʌncol ti xʌmbal cheꞌ jini. Machꞌan miꞌ chꞌʌmben isujm baqui mi quej i majlel. Como jini icꞌtꞌojñal cheꞌ bajcheꞌ mi yʌqꞌuen i mutsꞌ i wut.

12 Jatyetla alpꞌeñelob, mic tsꞌijbubeñetla ili tꞌan como Dios tiꞌ ñusʌbeyetla laꞌ mul chaꞌan tiꞌ xotꞌbeyonla lac mul Jesucristo.

13 Jatyetla tyatyʌlet bʌ la, mic tsꞌijbubeñetla ili tꞌan como tsaꞌix laꞌ cʌñʌ jini am bʌ cꞌʌlʌ tiꞌ tyejchibal mulawil. Jatyetla, alobet bʌ la, mic tsꞌijbubeñetla ili tꞌan como tsaꞌix laꞌ ganari i pꞌʌtyʌlel xiba. Jatyetla, alpꞌeñelob, mic tsꞌijbubeñetla ili tꞌan como tsaꞌix laꞌ cʌñʌ Dios lac Tyat.

14 Jatyetla, tatyʌlet bʌ la, mic tsꞌijbubeñetla ili tꞌan como tsaꞌix laꞌ cʌñʌ jini am bʌ cꞌʌlʌ tiꞌ tyejchibal mulawil. Mic tsꞌijbubeñetla ili tꞌan alobet bʌ la, como pꞌʌtyʌletixla. Yaꞌan i tꞌan Dios ti laꞌ pusicꞌal. Tsaꞌix laꞌ ganari i pꞌʌtyʌlel jini xiba.

15 Mach yom mi laꞌ chʌc mulan ili mulawil mi jinic an tyac bʌ ti mulawil. Como ili muꞌ bʌ i mulan ili mulawil maꞌ miꞌ pꞌuntyan Dios lac Tyat.

16 Como mach yaꞌic tyʌlem ti Dios lac Tyat ili i chaꞌan jach bʌ mulawil. Pero tyʌlem jach ti mulawil ili i tsuculel lac pusicꞌal. Jini lolom wen bʌ mi la quilan ti lac wut yicꞌot cheꞌ mi lac ñuc isan lac bʌ tiꞌ tyojlel lac piꞌʌlob, i chaꞌan jach ili mulawil, pejtyelel jini mach bʌ wen.

17 Chʌncox i bej lʌqꞌueꞌ tyʌlel i yujtibal mulawil yicꞌot pejtyelel machꞌʌ wen. Pero jini muꞌ bʌ i meleꞌ bajcheꞌ yom Dios mi quej i yajñel ti pejtyel ora.

18 Pꞌuntyʌbilet bʌ la calobilob, i yujtibal jachix ili qꞌuin tyac. Tsaꞌix laꞌ wubi tyal juntiquil ajcontra Cristo. Wale anix cabʌl ajcontra Cristo. Jin chaꞌan mi lac ñaꞌtyan añonixla ti lʌcꞌʌl i jilibal ili qꞌuin tyac.

19 Wʌꞌʌch ti loqꞌuiyob wʌꞌ baꞌ añonla jini ajcontrajob. Pero mach yoque lac piꞌʌlobic. Tsaꞌic yoque chꞌujbiyob bajcheꞌ mi lac chꞌujbin, cheꞌ jini tsaꞌix cʌyleyob wʌꞌ baꞌ añonla. Pero cheꞌ ñac ti loqꞌuiyob majlel ti tsictiyi cheꞌ jini machꞌan yoque chʌncox i chꞌujbiñob bajcheꞌ mi lac chꞌujbin.

20 Pero mach cheꞌic añetla bajcheꞌ jini ajcontrajob. Tsaꞌix i yʌqꞌuetla Chꞌujul bʌ i Chꞌujlel Cristo. Jin chaꞌan tsaꞌix laꞌ cʌñʌ jini mero isujm bʌ yi.

21 Mic tsꞌijbubeñetla ili tꞌan mach chaꞌanic mach laꞌ wujil isujm, pero laꞌ wujilʌch isujm. Laꞌ wujil isujm mach tyʌlemic ti melel bʌ tꞌan jini lot.

22 ¿Majchqui jini xlot? Jiñʌch xlot jini muꞌ bʌ i lolon aleꞌ mach yajcʌbilic i chaꞌan Dios jini Jesús. Jini machꞌʌ baꞌan miꞌ chꞌujbin mach jinic jach miꞌ contrajiben i Yalobil Dios, pero miꞌ contrajin Dios lac Tyat jeꞌel.

23 Pejtyel jini muꞌ bʌ i lolon aleꞌ mach i Yalobil Dios Cristo machꞌan miꞌ chꞌujbin Dios lac Tyat jeꞌel. Jini muꞌ bʌ i chꞌujbin tiꞌ pusicꞌal i Yalobilʌch Dios jini Cristo, chʌncol i chꞌujbin Dios lac Tyat jeꞌel.

24 Jin chaꞌan yom mi laꞌ chʌc chꞌujbin jini tsaꞌ bʌ laꞌ wubi cꞌʌlʌ ti ñaxan. Cheꞌ chʌncox laꞌ wen chꞌujbin ti laꞌ pusicꞌal jini tsaꞌ bʌ laꞌ wubi ti ñaxan, cheꞌ jini añetla tiꞌ tyojlel Dios lac Tyat yicꞌot i Yalobil.

25 Jini Jesucristo ti yʌlʌ chaꞌan mi quej i yʌqꞌueñonla laj cuxtyʌlel machꞌʌ yujil jilel.

26 Tic tsꞌijbubeyetla ili tꞌan como an jini yomoꞌ bʌ i lotiñetla.

27 Pero tsaꞌix ochi ti jatyetla jini Chꞌujul bʌ i Chꞌujlel tsaꞌ bʌ i yʌqꞌuetla Jesucristo. Jin chaꞌan mach yom yambʌ laꞌ ajcʌntisa como jini Chꞌujul bʌ i Chꞌujel miꞌ cʌntisañetla ti pejtyel. Como jini miꞌ sub i sujmlel. Mach tsꞌin yujil lot. Cheꞌ yom mi laꞌ wajñel ti Cristo cheꞌ bajcheꞌ miꞌ cʌntisañetla.

28 Wale calobilob, chʌc ajñenla ti Cristo chaꞌan maꞌix lac bʌqꞌuen cheꞌ mi tsictiyel Cristo. Maꞌan mi laj quisnin cheꞌ mi chaꞌ tyʌlel.

29 La cujila ñoj wen Jesucristo. Ñoj wen i melbal. Jin chaꞌan mi lac ñaꞌtyan i yalobilobʌch Dios jini muꞌ bʌ i yajñel ti tyoj.