2 Más mic pꞌuntyañetla chaꞌan ti caj isujm bʌ tꞌan am bʌ ti lac pusicꞌal. Wʌꞌʌchixi mi quej i ñoj cʌytyʌl.

3 Laꞌ i pʌsꞌeñetla i yutslel Dios lac Tyat yicꞌot Jesucristo i Yalobil bʌ Dios lac Tyat. Laꞌ i pꞌuntyañetla, laꞌ i ñʌchꞌchocobeñetla laꞌ pusicꞌal ti i sujmlel yicꞌot tiꞌ pꞌuntyaya.

4 Cꞌajacña coj mi cubin como tic tyaja ilayi an a walobilob muꞌ bʌ yajñelob ti wen ti jini melel bʌ tꞌan cheꞌ bajcheꞌ tiꞌ xiqꞌuiyonla Dios lac Tyat.

5 Wale hermana, mic subeñet ti wocol tꞌan chaꞌan lac pꞌuntyan lac bʌ. Mach tsijibic jini xicꞌol chʌncol bʌ c tsꞌijbubeñet pero jiñʌch tsaꞌ bʌ la cubi cꞌʌlʌ ti tyejchibal.

6 Mi chʌncox lac pꞌuntyan Dios mux lac wen chꞌujbiben i xicꞌojel. Jiñʌch i xicꞌojel Dios tsaꞌ bʌ laꞌ wubi cꞌʌlʌ ti tyejchibal cꞌʌlʌ wale chaꞌan yom mic pꞌuntyan lac bʌ.

7 Añob cabʌl xlot bʌ ajcʌntisa ti mulawil. Machꞌan miꞌ chꞌujbiñob mi mero ti i bʌcꞌtyal ti tyʌli Jesucristo. Jini xlot bʌ ajcʌntisa jinʌch ajcontra Cristo.

8 Xucꞌuletla ame mi laꞌ sʌt i tyojol laꞌ troñel, pero yom tsꞌʌcʌl mi laꞌ tyaj laꞌ tyojol ti lac Yum.

9 Cheꞌic bajcheꞌ anic majch miꞌ xʌꞌ otsan yambʌ tꞌan ti jini cʌntisa chaꞌan Cristo mach i chaꞌanic Dios cheꞌ jini. Pero jini muꞌ bʌ i cꞌʌlʌ sub Cristo tiꞌ cʌntisa, añʌch ti Dios lac Tyat yicꞌot ti Yalobil.

10 Mi an majch mi cꞌotyel yaꞌ baꞌ añetla mi machꞌan miꞌ sub ili bʌ cʌntisa chaꞌan Cristo mach laꞌ wotsan ti laꞌ wotyot. Maꞌ mi laꞌ suben chaꞌan weñʌch ti tyʌli.

11 Como jini muꞌ bʌ i yʌleꞌ cheꞌ bajcheꞌ jini chʌncox i yotsan i bʌ yicꞌot jini ajcontra Cristo.

12 An tyo cabʌl chʌ bʌ com c subeñetla pero mach comox c tsꞌijbun ti jun. Muꞌ tyo c pijtyan yaꞌ bʌ mij cꞌotyel baꞌ añetla chaꞌan mic pejcañetla chaꞌan ñoj tijicñayic mi lac cubin.

13 Jiñʌch yajcʌbil bʌ i chaꞌan Dios jeꞌel jini a chich. Yom bi i chocbeñet tyʌlel saludos i yalobilob a chich. Amén.