UXQꞌUEJLEL BɅ JUN TSAꞌ BɅ I TSꞌIJBU JUAN
Weñʌch miꞌ tyaj ti tꞌan Gayo
1
Joñon ancianojon. Chʌncol tsꞌijbubeñet jun pꞌuntyʌbilet bʌ c piꞌʌl Gayo bʌ a cꞌabaꞌ. Melelʌch chʌncol c pꞌuntyañet. 2 Pꞌuntyʌbilet bʌ hermañu, mic tyajet ti oración chaꞌan wen maꞌ wajñel yicꞌot chaꞌan cꞌoqꞌuet maꞌ wajñel jeꞌel. Como cujilʌch isujm wen cꞌocꞌʌch a chꞌujlel.
3 Cꞌajacñajax coj ti cubi cheꞌ ñac ti juliyob ili hermañujob como miꞌ subeñoñob chʌncox a wen chꞌujbin jini melel bʌ tꞌan.
4 Ñoj cꞌajacña coj mi cubin cheꞌ an majch miꞌ subeñon mi chʌncol i wen chꞌujbiñob ili melel bʌ tꞌan calobilob. Machꞌan yan tyac bʌ chʌ bʌ am bʌ ti mulawil muꞌ bʌ i más yʌqꞌueñon cꞌajacña bʌ coj cheꞌ mi cubin xucꞌul añetla.
5 Pꞌuntyʌbilet bʌ hermañu, weñʌch maꞌ mel cheꞌ maꞌ pʌy ochel ti a wotyot hermañujob muꞌ bʌ i cꞌotyelob. Machicʌch a cʌñʌ pero much a wotsan ti a wotyot.
6 Como jini hermañujob tsaꞌ bʌ juliyob wʌꞌi tiꞌ subeyob ili hermañujob muꞌ bʌ i muchꞌquiñob i bʌ bajcheꞌ ti a pꞌuntyʌyob. Awocolic cotyañob ti chʌ bʌ cꞌʌjnibal i chaꞌañob chaꞌan bej majlicob. Jiñʌch bajcheꞌ yom Dios.
7 Como ti caj Jesucristo ti majliyob ti subtꞌan ñumel. Maꞌan chʌ bʌ yes miꞌ saj chꞌʌmob yaꞌ baꞌañob jini max tyo bʌ i chꞌujbiñob i tꞌan Dios.
8 Jin chaꞌan joñonla yom mi laj cotyañob ti chʌ bʌ tyo jach yom i chaꞌañob chaꞌan cheꞌ jini chʌncox laj cotyan ti sub ñumel jini melel bʌ tꞌan.
Mach wen mi yajñel Diótrefes
9 Tsaꞌix c tsꞌityaꞌ tsꞌijbubeyob hermañujob yaꞌ baꞌ añetla bajcheꞌ yom i melob. Pero jini winic Diótrefes maꞌ miꞌ jacꞌbeñon lojon c tꞌan como miꞌ mulan i yotsan i bʌ ti yumʌl tiꞌ tyojlelob.
10 Jin chaꞌan cheꞌ mij cꞌotyel yaꞌi mux quej c luꞌ suben como chaꞌan mach wen jini chʌncol bʌ i meleꞌ como muꞌ ti jopꞌtꞌan tij contra. Muꞌ ti lot jeꞌel. Mach jinic jach jini pero maꞌ mi yotsañob ti yotyot jini hermañujob. Cheꞌ jeꞌel miꞌ ticꞌob jini yom bʌ i yotsañob. Mi tiꞌ wersa otsʌyob, miꞌ chocob loqꞌuel tiꞌ tyojlel hermañujob jini tsaꞌ bʌ i yotsʌ i julaꞌ.
11 Pꞌuntyʌbilet bʌ hermano, mach yom maꞌ mel jini machꞌʌ wen. Chʌc mele jini wen bʌ. Jini wen bʌ i chaꞌlibal miꞌ pʌs mi yoque i chaꞌañʌch Dios. Jini muꞌ bʌ i pʌs i simaronlel mach i cʌñʌ chʌ bʌ yom Dios.
Wen bʌ pʌsoñel i chaꞌan Demetrio
12 Ti pejtyelelob weñʌch miꞌ tyajob ti tꞌan jini winic Demetrio. Miꞌ tsictiyel ti wen bʌ i chaꞌlibal mi melelʌch. Joñon lojon cujil isujm bajcheꞌ mi yajñel ti utsꞌat. Jatyetla jeꞌel laꞌ wujil melelʌch lojon c tꞌan.
Cojix bʌ tꞌan tyac
13 Añʌch tyo cabʌl tꞌan com bʌ c subeñetla, pero mach comox c tsꞌijbun.
14 Muꞌ tyo c pijtyan jintyo mij qꞌuelet chaꞌan mic pejcañet.
15 Laꞌ ajniquet ti ñʌchꞌʌl. Ili lac piꞌʌlob wʌꞌi yom bi i chocbeñetyob tyʌlel saludos. Awocolic aqꞌueñob saludos pejtylel lac piꞌʌlob yaꞌi.