2 Laꞌ bej más oqꞌuisʌbentiquetla cabʌl i yutslel i pusicꞌal Dios yicꞌot i ñʌchꞌtyʌlel yicꞌot i pꞌuntyaya Dios.

3 Pꞌuntyʌbilet bʌ la hermañujob, ti pejtyelel c pusicꞌal com c tsꞌijbubeñetla ti cubi chaꞌan laj cotyʌntyel. Pero wale cꞌʌjnibal mic waꞌ tsꞌijbubeñetla chaꞌan mic subeñetla chaꞌan laꞌ chaꞌlen wersa chaꞌan jini tsꞌʌcʌl bʌ yom mi chꞌujbintyel. Jiñʌch jini tꞌan tsaꞌ bʌ junyajlel aqꞌuentiyob i chaꞌañoꞌ bʌ Dios.

4 Como chaꞌan tiꞌ lotiyetla tsaꞌix i lolon otsʌ i bʌ laꞌ wicꞌot chaꞌtiquil uxtiquilob cheꞌ bajcheꞌ jini tsaꞌix bʌ wʌ tyajle ti tꞌan ti Tsꞌijbubil bʌ i Tꞌan Dios cꞌʌlʌ oniyix bajcheꞌ mi quejel i xotꞌeꞌ i mul. Simaroñob. Chaꞌan yujil isujm uts Dios, miꞌ lolon acꞌ i bʌ ti melol chʌ bʌ bajñel yom i tsucul pusicꞌal. Machꞌan miꞌ chꞌujbiñob chaꞌan Diosʌch jini cojach bʌ lac Yum yicꞌot lac Yum Jesucristo.

5 Com c chaꞌ cꞌajtisʌbeñetla aunque laꞌ wujilix isujm lac Yum tiꞌ ñaxan pʌyʌyob loqꞌuel yaꞌ ti pañimil Egipto bʌ i cꞌabaꞌ pejtyelel jini israelob, pero ti wiꞌil tiꞌ jisʌyob mach bʌ baꞌan tiꞌ chꞌujbiyob chaꞌan Dios mi quej i bej cotyan.

6 An ajtroñelob i chaꞌan Dios chꞌoyoloꞌ bʌ ti panchan tsaꞌ bʌ i cʌyʌyob i chumlib baꞌan Dios cheꞌ ñac tiꞌ cʌyʌyob i melob cheꞌ bajcheꞌ yom Dios. Dios ti yotsʌ ti cʌchol ti icꞌtꞌojñal. Cʌchʌl ti cadena yubil cꞌʌlʌ jintyo baꞌ bʌ ora mi tyʌlel jini ñuc bʌ qꞌuin cheꞌ mi quejel i chaꞌlen melojel Dios.

7 Cheꞌ jeꞌel lajal tiꞌ chaꞌleyob i tsuculel jini añoꞌ bʌ ti Sodoma yicꞌot Gomorra bʌ i cꞌabaꞌob yicꞌot jini yambʌ lum tyac yaꞌ bʌ an lʌcꞌʌl yaꞌ baꞌañob. Lajal tiꞌ chaꞌleyob bajcheꞌ jini ajtroñelob i chaꞌan Dios chꞌoyoloꞌ bʌ ti panchan tsaꞌ bʌ i chaꞌle i tsuculel. Tiꞌ chaꞌleyob i tsuculel jini mach bʌ baꞌan baꞌ bʌ ora miꞌ chaꞌleñob. Jini añoꞌ bʌ ti Sodoma yicꞌot Gomorra mi cʌytyʌl ti ajpʌsoñel cheꞌ bajcheꞌ ti jili ti cꞌajc. Chʌꞌʌch mi quej i yujtyel ti pejtyelel muꞌ bʌ i ñusañob wocol ti cꞌajc ti caj i mul. Jiñʌch cꞌajc mach bʌ baꞌan mi yajpel.

8 Chʌꞌʌch jeꞌel ili xlot bʌ ajcʌntisajob. Miꞌ ñaxan bajñel pensalin chʌ bʌ ti simaronlel yom i chaꞌleñob chaꞌan miꞌ bibiꞌsañob i bʌ ti i tsuculel. Miꞌ michꞌqꞌuel i pꞌʌtyʌlel i tꞌan lac Yum. Miꞌ wajlen jini añoꞌ bʌ i ñuclel.

9 Jini ñoj ñuc bʌ ajtroñel i chaꞌan Dios chꞌoyol bʌ ti panchan Miguel bʌ i cꞌabaꞌ cheꞌ tiꞌ contra i bʌ yicꞌot jini xiba tiꞌ cʌlʌx pejcʌyob i bʌ chaꞌan i bʌcꞌtyal Moisés. Pero machꞌan tiꞌ chan isʌ i bʌ jini Miguel chaꞌan i yʌlꞌen jini xiba. Tsaꞌ jach i yʌlʌ: Laꞌ i tiqꞌuet lac Yum. Cheꞌ yʌlol jini xiba.

10 Pero jini xlot bʌ ajcʌntisajob miꞌ lolon tyajeꞌ ti mach bʌ wen bʌ tꞌan chʌ bʌ jach mach bʌ baꞌan miꞌ chꞌʌmbeñob isujm. Pero aunque an jini muꞌ bʌ i bajñel cʌñob quixtyañu cheꞌ bajcheꞌ mi bajñel cʌn animal, pero jiñʌch jini muꞌ bʌ i pʌyeꞌ majlel baꞌ mi majlel i ñusan wocol ti caj i mul.

11 Pꞌumpꞌuñob. Mi quejel i ñusan wocol como tsaꞌix i tsʌcle majlel i chaꞌlibal Caín tsaꞌ bʌ i chaꞌle i simaronlel. Chaꞌan jach wersa yom i ganarin tyaqꞌuin, ti junyajlel yʌcꞌʌyob i bʌ i lotin quixtyañujob cheꞌ bajcheꞌ tiꞌ chaꞌle ti ñoj oniyix jini Balaam bʌ i cꞌabaꞌ jeꞌel. Mi quej i jilelob chaꞌan chʌꞌʌch miꞌ contrajiñob Dios cheꞌ bajcheꞌ Coré tsaꞌ bʌ tsʌnsʌnti chaꞌan tiꞌ chaꞌle contrajiya tiꞌ tyojlel Moisés.

12 Quisintic bajcheꞌ miꞌ chaꞌlen jini xlot bʌ ajcʌntisajob. Miꞌ motin chaꞌlen uchꞌel laꞌ wicꞌot cheꞌ mi laꞌ motin chaꞌlen uchꞌel baꞌ mi tsictiyel mi laꞌ pꞌuntyan laꞌ bʌ. Wen tijicña miꞌ chaꞌlen uchꞌel laꞌ wicꞌot. Como machꞌan miꞌ saj chaꞌlen bʌqꞌuen cheꞌ miꞌ chaꞌlen jini uchꞌel. Lajalob xlot bʌ ajcʌntisajob bajcheꞌ ajcʌñʌtya tiñʌmeꞌ muꞌ jach bʌ i lolon bajñel cʌñʌtyañob i bʌ. Lajalob bajcheꞌ tyocal muꞌ jach bʌ i pʌjyel majlel ti icꞌ mach bʌ baꞌan mi yʌcꞌ jaꞌel. Lajalob bajcheꞌ tyeꞌ tyac mach bʌ baꞌan miꞌ yʌcꞌ i wut ti yorojlel. Junyajlel tyʌqꞌuinix yubil. Tsaꞌix bojqui loqꞌuel yubil.

13 Lajalob jini xlot bʌ ajcʌntisajob bajcheꞌ bʌbʌqꞌuen bʌ witslaw bʌ jaꞌ ti mar cheꞌ mi yʌcꞌ bibajax bʌ i lojc. Jini quisintic bʌ i chaꞌlibal lajal bajcheꞌ jini bibajax bʌ i lojc jaꞌ. Lajalob jini xlot bʌ ajcʌntisajob bajcheꞌ ecꞌ tyac tsaꞌix bʌ i sʌtyʌ i bijlel yubil. Tsaꞌix wʌ ajli mi quej i ñusan wocol jini xlot bʌ ajcʌntisajob ti icꞌtꞌojñal chaꞌan ti beleꞌ ora.

14 Cheꞌ jeꞌel Enoc bʌ i cꞌabaꞌ jiñʌch i sietejlelix bʌ i jiñʌjlel Adán. Tiꞌ tyajayob ti tꞌan jini quixtyañujob. Ti yʌlʌ chaꞌan ti xijqꞌui ti Dios i yʌleꞌ jini Enoc: Ti quilʌ lac Yum ti tyʌli yicꞌot ti mil ti mil i chaꞌañoꞌ bʌ.

15 Ti tyʌli chaꞌan i melob ti pejtyelel quixtyañujob yicꞌot chaꞌan i choc majlel baꞌ miꞌ ñusan wocol ti pejtyel jini simaroñoꞌ bʌ chaꞌan ti caj pejtyelel mach bʌ wen bʌ tsaꞌ bʌ i chaꞌleyob yicꞌot chaꞌan ti pejtyelel mach bʌ wen bʌ tꞌan tsaꞌ bʌ i yʌlʌyob tiꞌ contra Dios. Cheꞌ ti yʌlʌ Enoc.

16 Jini xlot bʌ ajcʌntisa miꞌ bej chaꞌlen tꞌan chaꞌan machꞌan miꞌ mulan chʌ bʌ mi yujtyel. Miꞌ bej aleꞌ chʌ bʌ jach mi yujtyel. Mucꞌ jach i bej sʌclan bajcheꞌ miꞌ mel chʌ bʌ yom i bajñel tsucul pusicꞌal. Miꞌ chan isan i bʌ ti i tꞌan. Miꞌ lolon suben ti wen bʌ tꞌan quixtyañu chaꞌan jach yom miꞌ bajñel tyaj i ñuclel ti caj.

17 Pero jatyetla pꞌuntyʌbilet bʌ la quermañujob, cꞌajtisanla chʌ bʌ ti yʌlʌ jini yajcʌbiloꞌ bʌ ajsubtꞌañob ñumel i chaꞌan lac Yum Jesucristo.

18 Tiꞌ subeyetla: Ti jini cojix bʌ qꞌuin tyac mi quej i yajñel quixtyañujob mucꞌ jach bʌ i wajlen i chaꞌan tyac bʌ Dios. Mi quej i bajñel ajñel bajcheꞌ miꞌ mulan i chaꞌlen ti tsucul bʌ i pusicꞌal.

19 Jin xlot bʌ ajcʌntisa mi yʌqꞌuen i tꞌoxob i bʌ hermañujob. Miꞌ chaꞌleñob chʌ bʌ jach yom i bajñel i pusicꞌal. Maꞌix Chꞌujul bʌ i Chꞌujlel Dios yicꞌotyob.

20 Pero jatyetla pꞌuntyʌbilet bʌ la quermañujob, xucꞌchocon laꞌ bʌ ti jini chꞌujul bʌ tꞌan muꞌ bʌ laꞌ chꞌujbin. Chaꞌlenla oración chaꞌan ti i pꞌʌtyʌlel Chꞌujul bʌ i Chꞌujlel Dios laꞌ wicꞌot.

21 Bej ajñenla ti i pꞌuntyaya Dios. Bej pijtyanla i yorojlel cheꞌ mi yʌqꞌueñonla laj cuxtyʌlel machꞌʌ yujil jilel ti lac Yum Jesucristo chaꞌan ti i pꞌuntyaya.

22 Cotyan ti laꞌ tꞌan jini max tyo baꞌan miꞌ wen chꞌujbin.

23 Cotyan yañoꞌ bʌ cheꞌ bajcheꞌ mi chʌncol laꞌ chuqueꞌ loqꞌuel ti cꞌajc yubil. Pꞌuntyanla chaꞌan laꞌ cotyan, pero xucꞌuletla. Chaꞌlenla bʌqꞌuen ame miꞌ bibiꞌtisañetla i pislel yubil ti machꞌʌ wen bʌ i chaꞌlibal.

24 Dios jini cojach bʌ am bʌ i ñaꞌtyʌbal, Ajcotyayajʌch lac chaꞌan. An i pꞌʌtyʌlel chaꞌan i cʌñʌtyañetla chaꞌan machꞌan mi laꞌ yajlel ti mulil. Añʌch i pꞌʌtyʌlel chaꞌan i yʌqꞌueñetla ti i tyojlel cheꞌ maꞌix sajlic laꞌ mul. Cꞌajacña laꞌ woj mi laꞌ wubin tiꞌ tyojlel cꞌotyajax bʌ i ñuclel.

25 Laꞌ tsictiyic i cꞌotyajlel yicꞌot i ñuclel yicꞌot i pꞌʌtyʌlel yicꞌot i wersajlel i tꞌan Dios chaꞌan ti lac Yum Jesucristo, am bʌ cꞌʌlʌ ti ñoj oniyix, am bʌ wale iliyi yicꞌot ti pejtyelel ora. Amén.