2 Jini Juan tiꞌ subu yoque melelʌch i tꞌan Dios, yicꞌot jini tsaꞌ bʌ i yʌlʌ Jesucristo yicꞌot jeꞌel jini tsaꞌ bʌ i yoque ilʌ Juan.

3 Cꞌajacña i yoj jini muꞌ bʌ i qꞌueleꞌ ti cꞌam jini tꞌan aqꞌuebil bʌ ti Dios, yicꞌot cꞌajacñayob i yoj jeꞌel jini muꞌ bʌ i ñʌchꞌtyañob, muꞌ bʌ i chꞌujbiñob ili tsꞌijbubilix bʌ tꞌan. Como lʌcꞌʌlix i yorojlel mi quejel i yujtyel bajcheꞌ tsꞌijbubil wʌꞌ ti ili jun.

4 Joñon Juañon. Mic tsꞌijbubeñetla ili jun ti laꞌ siete mujchꞌlel ochemet bʌ la tiꞌ tꞌan Dios yaꞌ ti colem pañimil Asia bʌ i cꞌabaꞌ. Laꞌ ajniquetla ti i yutslel i pusicꞌal yicꞌot i ñʌchꞌtyʌlel Dios, jini am bʌ wale iliyi, am bʌ cꞌʌlʌ ti ñoj oniyix, am bʌ cꞌʌlʌ ti tyal tyo bʌ ora. Jini i yutslel i pusicꞌal Dios yicꞌot i ñʌchꞌtyʌlel tyʌlem bʌ ti Chꞌujul bʌ i Chꞌujlel, yaꞌ an tiꞌ tyojlel baꞌ miꞌ chaꞌlen yumʌl Dios. Jini Chꞌujul bʌ i Chꞌujlel Dios miꞌ chaꞌlen troñel ti laꞌ pusicꞌal jatyetla yaꞌ bʌ añetla ti siete mujchꞌ ochemet bʌ la tiꞌ tꞌan Dios.

5 Jini i yutslel i pusicꞌal Dios yicꞌot i ñʌchꞌtyʌlel tyʌlem ti Jesucristo jeꞌel. Xucꞌul Jesucristo chaꞌan chꞌujbi lac chꞌujbin jini muꞌ bʌ i yʌqꞌueꞌ ti cʌjñel. Jiñʌch jini ñaxan bʌ tsaꞌ bʌ tyejchi loqꞌuel baꞌan sajtyemoꞌ bʌ machꞌʌ baꞌan mi quejel i chaꞌ sajtyel. Cristo i yumʌch pejtyelel yumʌlob wʌꞌ ti mulawil. Miꞌ pꞌuntyañonla Cristo. Tiꞌ pocbeyonla loqꞌuel pejtyelel lac mul tiꞌ chꞌichꞌel.

6 Tsaꞌix i yajcʌyonla Jesucristo chaꞌan lac chaꞌlen yumʌl yicꞌot. Ti yotsʌyonla ti cura yubil chaꞌan mi lac bej chaꞌliben i troñel Dios i Tyat Jesucristo. Laꞌ tsictiyic i ñuclel Jesucristo yicꞌot laꞌ yumintic ti pejtyelel ora. Amén.

7 Qꞌuele laꞌ wilan. Mi quejel i tyʌlel Cristo ti mal tyocal. Mi quejel i luꞌ ilañob ti pejtyelelob jinic tyo jini tsaꞌ bʌ i lowoyob. Ti pejtyelel quixtyañu loqꞌuemoꞌ bʌ ti jujunchajp tꞌan machꞌʌ baꞌan miꞌ chꞌujbiñob mi quejel i chaꞌleñob uqꞌuel cheꞌ mi quejel i yilañob como yujilob isujm mi quejel i yʌjqꞌuelob ti xotꞌmulil. Chʌꞌʌch mi quejel i yujtyel.

8 Jini lac Yum Dios mi yʌleꞌ: Joñon añon cheꞌ ñac ti mejli pejtyelel chʌ bʌ tyac an. Chʌc añon tyo cꞌʌlʌ cheꞌ mi quejel i luꞌ jilel majlel. Joñon añon cꞌʌlʌ ti tyejchibal mulawil. Joñon añon cꞌʌlʌ ti yujtibal. Joñoñʌch jini am bʌ wale iliyi, jini am bʌ ti ñoj oniyix, jini am bʌ cꞌʌlʌ ti tyal tyo bʌ ora. Joñoñʌch jini machꞌʌ baꞌan i pꞌisol c pꞌʌtyʌlel. Cheꞌ mi yʌleꞌ lac Yum Dios.

9 Joñon Juañon laꞌ wermañujon ti Cristo. Chʌncol c motin ilan wocol quicꞌotyetla chaꞌan Jesucristo. Mi lac motin chaꞌlen yumʌl la quicꞌot Dios. Lajal mi yʌqꞌueñonla i pꞌʌtyʌlel Jesucristo ti lac pusicꞌal chaꞌan mi lac ñusan wocol ti wen. Cʌchʌlon yaꞌ ti lum joyol bʌ ti jaꞌ Patmos bʌ i cꞌabaꞌ chaꞌan ti caj tic subu i tꞌan Dios yicꞌot chaꞌan tic tsictisʌ i sujmlel chaꞌan Jesucristo.

10 Ti jumpꞌej qꞌuin tiꞌ qꞌuiñilel lac Yum jini Chꞌujul bʌ i Chꞌujlel Dios ti yʌqꞌueyon cubin cꞌam bʌ ajtꞌan tic pat. Cꞌam cheꞌ bajcheꞌ i tꞌan trompeta ti cubi.

11 Jini ajtꞌan ti yʌlʌ: Joñon jini ñaxan bʌ. Joñon jini cojix bʌ. Joñon añon cꞌʌlʌ ti tyejchibal mulawil. Joñon añon cꞌʌlʌ ti yujtibal. Tsꞌijbun ti jun pejtyelel muꞌ bʌ quejel a qꞌuel. Choco majlel ili jun yaꞌ baꞌan jini ochemoꞌ bʌ tiꞌ tꞌan Dios yaꞌ ti siete mujchꞌlelob yaꞌ ti colem pañimil Asia bʌ i cꞌabaꞌ. Choco majlel ti lum yaꞌ ti Efeso, ti Esmirna, ti Pérgamo, ti Tiatira, ti Sardis, ti Filadelfia, yicꞌot ti Laodicea. Cheꞌ tiꞌ subeyon jini ajtꞌan.

12 Tic sutqui c bʌ chaꞌan mij qꞌuel majchqui chʌncol i pejcañon. Cheꞌ ñac tic sutqui c bʌ ti quilʌ siete i yajnib vela melel bʌ ti oro.

13 Yaꞌ tiꞌ xinil jini siete i yajnib vela ti quilʌ yaꞌ waꞌal juntiquil cheꞌ bajcheꞌ quixtyañu yilal. Lʌpʌl i chaꞌan pʌl bʌ i pislel jaxʌl cꞌʌlʌ ti yoc. Cʌchʌl i tajn tiꞌ cinturón melel bʌ ti oro.

14 Ñoj sʌsʌc i tsutsel i jol cheꞌ bajcheꞌ sʌsʌc bʌ i tsutsel tiñʌmeꞌ, sʌsʌc cheꞌ bajcheꞌ i ñaꞌal tsʌñal yilal. Mi lejmel i wut cheꞌ bajcheꞌ cꞌajc yilal.

15 Cꞌʌnleman i yoc cheꞌ bajcheꞌ bronce tsaꞌ bʌ ulmisʌnti ti cꞌajc chaꞌan mi loqꞌuel i tsuculel. Chʌꞌʌch yubil i tꞌan cheꞌ bajcheꞌ pujucña bʌ jaꞌ.

16 Tiꞌ ñoj bʌ i cꞌʌb an siete ecꞌ tyac. Yicꞌot ti tiꞌ mi loqꞌuel espada wen jay bʌ ti chaꞌwejlel i yej. Chʌꞌʌch yilal i ñiꞌ i wut cheꞌ bajcheꞌ qꞌuin cheꞌ mi tsꞌʌjyel ti xinqꞌuinil.

17 Cheꞌ ñac ti quilʌ jini quixtyañu bʌ yilal ti yajliyon ti yebal yoc cheꞌ bajcheꞌ sajtyemonix ti cubi. Pero jini ti yʌcꞌʌ i ñoj bʌ i cꞌʌb tij quejlop. Tiꞌ subeyon: Mach a bʌcꞌñan. Joñon jini ñaxan bʌ. Joñon jini cojix bʌ.

18 Joñon cuxulon. Ti sajtiyon pero qꞌuele a wilan chaꞌ cuxulon chaꞌan ti pejtyelel ora. An tic wenta mic yajcan baqui bʌ ora mi quejel i sajtyel quixtyañu yicꞌot an tic wenta mi cʌleꞌ baqui mi majlel i chꞌujlel cheꞌ mi sajtyel.

19 Tsꞌijbun jini tsaꞌ bʌ ujti a qꞌueleꞌ yicꞌot jini chʌncol bʌ i yujtyel wale iliyi yicꞌot jini muꞌ tyo bʌ quejel i yujtyel.

20 Jiñʌch jini machꞌʌ baꞌan tsictiyem i sujmlel ti yambʌ ora chaꞌan jini siete ecꞌ tyac tsaꞌ bʌ a wilʌ tiꞌ ñoj bʌ j cꞌʌb yicꞌot jini siete i yajnib vela melel bʌ ti oro. Jini siete ecꞌ jiñobʌch añoꞌ bʌ i yeꞌtyel ti jini siete mujchꞌ tsaꞌ bʌ i chꞌujbiyoñob. Jini siete i yajnib vela melel bʌ ti oro jiñʌch jini ochemoꞌ bʌ tiꞌ tꞌan Dios ti jini siete mujchꞌlelob. Cheꞌ tiꞌ subon Jesucristo jini cheꞌ bʌ bajcheꞌ quixtyañu yilal. Cheꞌ ti yʌlʌ Juan.