2 Cujil isujm bajcheꞌ mi laꞌ wajñel yicꞌot bajcheꞌ mi laꞌ chaꞌlen tsʌts bʌ troñel yicꞌot bajcheꞌ mi laꞌ cucheꞌ ti wen i ñajayel tyac laꞌ piꞌʌlob. Cujil isujm mach chꞌujbi laꞌ saj cuch jini simaroñoꞌ bʌ quixtyañu. Tsaꞌix laꞌ wen qꞌuele bajcheꞌ tiꞌ chaꞌleyob jini tsaꞌ bʌ i lolon subuyob i bʌ ti ajsubtꞌañob ñumel. Tsaꞌix laꞌ tsictisʌ chaꞌan xlotyobʌch.

3 Maꞌix mi laꞌ lujbꞌan laꞌ chaꞌlen chʌ bʌ wen. Tsaꞌix laꞌ cuchu ti wen i ñajayel tyac laꞌ piꞌʌlob. Tsaꞌix laꞌ wen ñusʌ wocol yicꞌot tsaꞌix laꞌ chaꞌle cabʌl troñel chaꞌan tij caj.

4 Pero mic subeñetla an junchajp machꞌʌ wen mi laꞌ chaꞌlen mi quilan. Machꞌan mi laꞌ chʌc pꞌuntyañon cheꞌ bajcheꞌ ti laꞌ pꞌuntyʌyon cheꞌ ñac ti queji laꞌ chꞌujbiñon.

5 Jin chaꞌan cꞌajtisanla bajcheꞌ ti laꞌ ñaxan pꞌuntyʌyon. Qꞌuextyan laꞌ pensal. Cʌyʌ laꞌ mul. Chaꞌ ajñenla cheꞌ bajcheꞌ ti ajniyetla ti wajali cheꞌ ñac ti queji laꞌ chꞌujbiñon. Mi machꞌan mi laꞌ qꞌuextyan laꞌ pensal, mi machꞌan mi laꞌ cʌy laꞌ mul mi quejel c waꞌ tyʌlel ti ora. Mi quejel c locꞌsan jini i yajnib vela yaꞌ ti laꞌ tyojlel.

6 Pero aunque chʌncox laꞌ wʌctyan laꞌ pꞌuntyañon an tyo chʌ bʌ mi laꞌ chaꞌlen wen bʌ mi quilan. Mi laꞌ tsꞌaꞌqꞌuel bajcheꞌ miꞌ chaꞌleñob jini quixtyañujob nicolaítajob bʌ i cꞌabaꞌob. Mic tsꞌaꞌqꞌuelob jeꞌel.

7 Jini yom bʌ i yoque chꞌʌmben isujm laꞌ i wen ñʌchꞌtyan i tꞌan Chꞌujul bʌ c Chꞌujlel muꞌ bʌ i suben ochemoꞌ bʌ tic tꞌan. Jini muꞌ bʌ i ganarin chaꞌan maꞌan miꞌ sʌt i bʌ mi quejel cʌqꞌuen i cꞌuxeꞌ i wut jini tyeꞌ yaꞌ bʌꞌan ti paraíso muꞌ bʌ i yʌqꞌuen i cuxtyʌlel machꞌʌ yujil jilel. Chʌꞌʌch ti xijqui Juan i tsꞌijbubeñob jini añoꞌ bʌ ti Efeso.

8 Joñon Juañon. Jesucristo tiꞌ subeyon: Tsꞌijbubeñob jun jeꞌel jini am bʌ yeꞌtyel tiꞌ tyojlel ochemoꞌ bʌ tiꞌ tꞌan Dios yaꞌ ti Esmirna. Maꞌ subeñob: Chʌꞌʌch mi yʌleꞌ jini ñaxan bʌ, jini cojix bʌ. Jini tsaꞌ bʌ sajti tsaꞌ bʌ chaꞌ cuxtiyi. Jiñʌch jini muꞌ bʌ i yʌleꞌ ili tꞌan:

9 Cujil isujm bajcheꞌ mi laꞌ wajñel yicꞌot bajcheꞌ mi laꞌ ñusan wocol yicꞌot bajcheꞌ mach sajlic chʌ bʌ an laꞌ chaꞌan. Pero melelʌch ricojetla tic tꞌan. Cʌñʌl c chaꞌan jeꞌel bajcheꞌ miꞌ wajleñetla jini muꞌ bʌ i lolon cuyob i bʌ ti israelob. I yalobilob Dios mi lolon alob i bʌ. Pero mach i chaꞌañobic Dios. I chaꞌañobʌch Satanás.

10 Mach laꞌ bʌcꞌñan jini wocol muꞌ bʌ laꞌ ñusan. Xiba mi quejel i yʌqꞌueñetla ti i yotsʌntyel ti cʌchol chaꞌtiquil uxtiquiletla chaꞌan miꞌ qꞌuel mi yoque xucꞌuletla. Chaꞌpꞌej uxpꞌej qꞌuin mi quejel laꞌ ñusan laꞌ tyʌcꞌlʌntyel. Pero xucul yom mi laꞌ wajñel aunque mi laꞌ wʌjqꞌuel ti sajtyel. Cheꞌ jini mi quejel cʌqꞌueñetla jini laꞌ cuxtyʌlel machꞌʌ yujil jilel.

11 Jini yom bʌ i yoque chꞌʌmben isujm laꞌ i wen ñʌchꞌtyan i tꞌan jini Chꞌujul bʌ c Chꞌujlel muꞌ bʌ i subeñob jini ochemoꞌ bʌ tic tꞌan: Jini muꞌ bʌ i ganariñob chaꞌan maꞌan miꞌ sʌt i bʌ, muꞌ bʌ i bej ajñel ti yoque xucꞌul, cheꞌ mi sajtyel maꞌix mi quejel i yochel ti xotꞌmulil, cheꞌen. Chʌꞌʌch ti xijqꞌui Juan i tsꞌijbubeñob jini añoꞌ bʌ ti Esmirna.

12 Joñon Juañon. Jini tsaꞌ bʌ quilʌ cheꞌ bajcheꞌ quixtyañu yilal tiꞌ subon: Tsꞌijbubeñob jun jeꞌel jini am bʌ i yeꞌtyel tiꞌ tyojlel ochemoꞌ bʌ tic tꞌan yaꞌ ti Pérgamo. Maꞌ subeñob: Chʌꞌʌch mi yʌleꞌ jini am bʌ i chaꞌan espada wen jay bʌ ti chaꞌwejlel i yej:

13 Cujil isujm bajcheꞌ mi laꞌ wajñel. Cujil isujm jeꞌel chʌncol laꞌ wajñel baꞌan puro simaroñoꞌ bʌ yaꞌ baꞌ miꞌ chaꞌlen yumʌl Satanás. Aunque chʌꞌʌch mi laꞌ ñusan pero xucꞌuletyʌchla ti joñon. Maꞌan ti laꞌ cʌyʌ laꞌ chꞌujbiñon mi jinic cheꞌ ñac ti tsʌnsʌnti ti laꞌ tyojlel jini Antipas, jini xucꞌul bʌ tsaꞌ bʌ i yʌcꞌʌyon ti cʌjñel yaꞌ baꞌ miꞌ chaꞌlen yumʌl Satanás.

14 Pero aunque chʌꞌʌch ti laꞌ ñusʌ, an chaꞌchajp uxchajp machꞌʌ wen ti laꞌ chaꞌle mi quilan. Yaꞌan laꞌ wicꞌot yaꞌ ti Pérgamo jiñi machꞌʌ baꞌan miꞌ cʌyob i chꞌujbiñob i cʌntisa Balaam. Jini Balaam tiꞌ cʌntisʌ jini ñuc bʌ yumʌl Balac bʌ i cꞌabaꞌ chaꞌan i yilpusicꞌlen jini israelob chaꞌan miꞌ cꞌuxob weꞌel tsaꞌ bʌ aqꞌuenti melel jach bʌ i dios tyac yicꞌot chaꞌan miꞌ chaꞌleñob i tsuculel.

15 An laꞌ wicꞌot jeꞌel jiñi machꞌʌ yom i cʌyob i chꞌujbiñob i cʌntisa jini nicolaítajob. Tsꞌaꞌ mij qꞌuel bajcheꞌ miꞌ chaꞌleñob.

16 Jin chaꞌan qꞌuextyan laꞌ pensal. Cʌyʌ laꞌ mul. Mi machꞌan mi laꞌ cʌyeꞌ, ti ora jach mi quejel c tyʌlel yaꞌ baꞌ añetla. Mi quejel c periyaliñob ti jini espada muꞌ bʌ i loqꞌuel tic tiꞌ.

17 Jini yom bʌ i yoque chꞌʌmben isujm laꞌ i wen ñʌchꞌtyan i tꞌan jini Chꞌujul bʌ c Chꞌujlel muꞌ bʌ i subeñob ochemoꞌ bʌ tic tꞌan. Jini muꞌ bʌ i ganarin chaꞌan maꞌan miꞌ sʌt i bʌ mi quejel cʌqꞌuen pejtyelel chʌ bʌ yes yom chaꞌan weñʌch mi yajñel yaꞌ ti panchan. Mic pʌsꞌen bajcheꞌ cꞌamel mic pꞌuntyan quixtyañujob. Chʌꞌʌch ti xijqꞌui Juan i tsꞌijbubeñob jini anoꞌ bʌ ti Pérgamo.

18 Jini tsaꞌ bʌ quilʌ cheꞌ bajcheꞌ quixtyañu yilal tiꞌ subon: Tsꞌijbubeñob jun jini añoꞌ bʌ i yeꞌtyel tiꞌ tyojlel ochemoꞌ bʌ tic tꞌan yaꞌ ti Tiatira. Maꞌ subeñob: Chʌꞌʌch mi yʌleꞌ jini i Yalobil Dios am bʌ i wut cheꞌ bajcheꞌ cꞌajc muꞌ bʌ ti lejmel yilal. Jini an cꞌʌnleman bʌ yoc cheꞌ bajcheꞌ bronce tsaꞌ bʌ ulmisʌnti ti cꞌajc chaꞌan loqꞌuic i tsuculel.

19 Cujil isujm bajcheꞌ mi laꞌ wajñel, bajcheꞌ mi laꞌ chaꞌlen pꞌuntyaya, bajcheꞌ mi laꞌ chꞌujbiñon, bajcheꞌ mi laꞌ cucheꞌ ti wen chʌ bʌ yes mi yujtyel tyac. Cujil isujm más wen mi laꞌ chaꞌlen wale iliyi cheꞌ bajcheꞌ ti laꞌ chaꞌle ti wajali cheꞌ ñac ti queji laꞌ chꞌujbiñon.

20 Aunque chʌꞌʌch mi laꞌ wajñel mic subeñetla an chʌ bʌ machꞌʌ wen mi laꞌ chaꞌlen mi quilan. Mi laꞌ lolon cuchben i simaronlel jiñi quixtyañu muꞌ bʌ i lolon cuy i bʌ xiqꞌuil ti Dios i yʌleꞌ. Ti i cantisʌ miꞌ socbeñob i pusicꞌal cajtroñelob chaꞌan miꞌ chaꞌlen i tsuculel yicꞌot yambʌ winic yambʌ xꞌixic yicꞌot chaꞌan miꞌ cꞌuxob jini tsaꞌ bʌ aqꞌuenti melel jach bʌ dios tyeꞌ tyac. Miꞌ lolon chaꞌlen bajcheꞌ tiꞌ chaꞌle juntiquil xꞌixic Jezabel bʌ i cꞌabaꞌ.

21 Ti cʌqꞌue cabʌl yorojlel chaꞌan mi qꞌuexeꞌ i pensal i cʌyeꞌ i mul. Pero machꞌan miꞌ cʌyeꞌ i tsuculel.

22 Jin chaꞌan mi quejel cʌqꞌuen tsʌts bʌ cꞌamꞌan. Jini tsaꞌ bʌ i chaꞌleyob i tsuculel bajcheꞌ miꞌ cʌntisan jini xꞌixic mi quejel cʌqꞌuen i ñusan cabʌl i wocol mi maꞌix miꞌ qꞌuextyan i pensal i cʌyeꞌ i chaꞌlen i tsuculel bajcheꞌ miꞌ chaꞌlen jini xꞌixic.

23 Mi quejel c tsʌnsan jini muꞌ bʌ i chꞌujbiben i cʌntisa chaꞌan i chaꞌleñob i tsuculel. Cheꞌ jini mi quejel i ñaꞌtyañob ochemoꞌ bʌ tic tꞌan ti jujunmujchꞌlelob tyac chaꞌan joñoñʌch jini muꞌ bʌ i luꞌ qꞌuel pejtyelel chʌ bʌ jach an tiꞌ pusicꞌal an tiꞌ pensal quixtyañu. Ti jujuntiquiletla mi quejel cʌqꞌueñetla laꞌ tyojol jiñʌch bajcheꞌ ti laꞌ chaꞌle.

24 Pero jatyetla xucꞌulet bʌ la yaꞌ ti Tiatira, machꞌʌ baꞌan ti laꞌ chꞌujbibe i cʌntisa jini simaron bʌ xꞌixic yicꞌot machꞌʌ baꞌan ti laꞌ cʌñʌ jini muꞌ bʌ i lolon yʌlob ti tsʌts bʌ i cʌntisa Satanás mic subeñetla maꞌix mi quejel cʌqꞌueñetla yambʌ laꞌ ticꞌol.

25 Cheꞌ jach yom mi laꞌ chʌc ñaꞌtyan bajcheꞌ mi laꞌ pꞌuntyañon yicꞌot bajcheꞌ yom mi laꞌ chaꞌlibeñon c toñel jintyo mic chaꞌ tyʌlel.

26 Jini muꞌ bʌ quejel i ganariñob chaꞌan maꞌan miꞌ sʌt i bʌ, jini muꞌ bʌ i chaꞌlibeñon c troñel cheꞌ bajcheꞌ com cꞌʌlʌ ti yujtibal, muꞌ tyo quejel cʌqꞌuen i chaꞌlen yumʌl ti pejtyelel pañimil.

27 Mi quejel i chaꞌlen yumʌl tiꞌ wersajlel i tꞌan lajal cheꞌ bajcheꞌ c Tyat ti yʌqꞌueyon i wersajlel c tꞌan chaꞌan mic chaꞌlen yumʌl. Mi quejel i jisʌntyelob jini machꞌʌ baꞌan miꞌ chꞌujbiñon cheꞌ bajcheꞌ miꞌ xixluyel pꞌejt cheꞌ miꞌ jatsꞌeꞌ ti vara melel bʌ ti tsucul tyaqꞌuin.

28 Mi quejel cʌqꞌuen i qꞌuelob ti ñuc cheꞌ bajcheꞌ miꞌ qꞌuelon ti ñuc.

29 Jini yom bʌ i yoque chꞌʌmben isujm laꞌ i wen ñʌchꞌtyan i tꞌan Chꞌujul bʌ c Chꞌujlel muꞌ bʌ i subeñob ochemoꞌ bʌ tic tꞌan ti jujunmujchꞌlelob. Chʌꞌʌch ti xijqꞌui Juan i tsꞌijbubeñob jini añoꞌ bʌ ti Tiatira.