Xicꞌol chaꞌan jini añoꞌ bʌ ti Sardis
3
Jesucristo, jiñʌch jini tsaꞌ bʌ quilʌ cheꞌ bʌ bajcheꞌ quixtyañu yilal tiꞌ subon: Tsꞌijbubeñob jun jini añoꞌ bʌ i yeꞌtyel tiꞌ tyojlel ochemoꞌ bʌ tic tꞌan yaꞌ ti Sardis. Maꞌ subeñob: Chʌꞌʌch mi yʌleꞌ jini am bʌ i chaꞌan Chꞌujul bʌ i Chꞌujlel Dios yicꞌot am bʌ i chaꞌan jini siete ecꞌ tiꞌ cꞌʌb. Ti lajoñel jini siete ecꞌ yom i yʌleꞌ jini añoꞌ bʌ i yeꞌtyel tiꞌ tyojlel siete mujchꞌlelob ochemoꞌ bʌ tic tꞌan. Cujil isujm bajcheꞌ mi laꞌ wajñel. Cujil isujm an jini muꞌ bʌ i lolon ñaꞌtyañob chaꞌan wen xucꞌuletla ti jini muꞌ bʌ laꞌ chꞌujbin. Pero mach cheꞌiqui.2 Qꞌuele laꞌ bʌ. Chaꞌlenla wersa chaꞌan laꞌ más xucꞌchocon laꞌ bʌ ti jini muꞌ bʌ laꞌ chꞌujbin como colel laꞌ cʌy laꞌ chꞌujbiñon. Tsaꞌix quilʌ maꞌix tyoj laꞌ melbal bajcheꞌ yom Dios.
3 Chaꞌ cꞌajtisan jini tsaꞌ bʌ laꞌ ñaxan ubi tsaꞌ bʌ laꞌ ñaxan chꞌujbi. Mach laꞌ saj cʌyeꞌ. Qꞌuextyan laꞌ pensal. Cʌyʌ laꞌ mul. Mi maꞌ mi laꞌ chʌc qꞌuel laꞌ bʌ, mi quejel c tyʌlel yaꞌ baꞌ añetla cheꞌ bajcheꞌ ajxujchꞌ. Maꞌan mi quejel laꞌ ñaꞌtyan baqui bʌ ora mi quejel c tyʌlel.
4 Yaꞌan chaꞌtiquil uxtiquil yaꞌ ti Sardis machꞌʌ baꞌan tiꞌ bibiꞌtisʌ i pislel yubil como machꞌan tiꞌ chaꞌleyob machꞌʌ wen bʌ i chaꞌlibal. Jiñob mi quejel i yajñel quicꞌot ti sʌc bʌ i pislel chaꞌan tsiquil tyoj añob. Chʌꞌʌch yom chaꞌan wen tiꞌ chaꞌleyob.
5 Jini muꞌ bʌ quejel i ganariñob chaꞌan maꞌan mi sʌt i bʌ mi quej i xojeꞌ sʌsʌc bʌ i pislel. Maꞌix mi quejel c yʌpbeñob i cꞌabaꞌ ti jun baꞌ tsꞌijbubil ti pejtyelel jini am bʌ i cuxtyʌlel machꞌʌ yujil jilel. Mi quejel c sub i cꞌabaꞌ yaꞌ tiꞌ tyojlel c Tyat yicꞌot ti tyojlel ajtroñelob i chaꞌan Dios chꞌoyol bʌ ti panchan.
6 Jini yom bʌ i yoque chꞌʌmben isujm laꞌ i wen ñʌchꞌtyan i tꞌan jini Chꞌujul bʌ c Chꞌujlel muꞌ bʌ i subeñob jini ochemoꞌ bʌ tic tꞌan yaꞌ ti jujunmujchꞌlelob. Chʌꞌʌch ti xijqꞌui Juan i tsꞌijbubeñob jini añoꞌ bʌ ti Sardis.
Xicꞌol chaꞌan jini añoꞌ bʌ ti Filadelfia
7 Joñon Juañon. Jesucristo tiꞌ subon: Tsꞌijbubeñob jun jini am bʌ i yeꞌtyel tiꞌ tyojlel ochemoꞌ bʌ tic tꞌan yaꞌ ti Filadelfia. Maꞌ subeñob: Chʌꞌʌch mi yʌleꞌ jini chꞌujul bʌ, jini yoque ñoj melel bʌ, jini más ñuc bʌ yumʌl am bʌ i pꞌʌtyʌlel i yotsan majchical jach yom i yotsan yaꞌ ti panchan yicꞌot an i pꞌʌtyʌlel jeꞌel chaꞌan i tiqꞌueꞌ majchical jach chaꞌan mach ochic yaꞌ ti panchan yicꞌot.
8 Cujil isujm bajcheꞌ mi laꞌ wajñel. Cujil isujm maꞌan cabʌletla tsaꞌ bʌ qꞌuejli ti ñuc pero tsaꞌix laꞌ chꞌujbi c tꞌan. Machꞌan ti laꞌ wʌlʌ chaꞌan mach laꞌ cʌñʌyon. Jini chaꞌan chʌncol cʌqꞌueñet a wen subeꞌ majlel c tꞌan baꞌan cabʌl yom bʌ i yubiñob. Maꞌan majch chꞌujbi i tiqꞌuetla.
9 An jini muꞌ bʌ i lolon cuyob i bʌ ti yalobilob Dios. Miꞌ lolon alob chꞌujbibilobix i chaꞌan Dios. Pero xlotyob. I chaꞌañoꞌ bʌ Satanás. Mi quejel cʌqꞌueñob i chꞌujbin jini tꞌan muꞌ bʌ a subeꞌ chaꞌan mi quejel i yoque chꞌʌmbeñob isujm chaꞌan jatyetla calobiletla. Mi quejel i yoque chꞌʌmben isujm chaꞌan tic pꞌuntyʌyetla.
10 Tsaꞌix laꞌ lotyo ti laꞌ pusicꞌal jini tꞌan aunque an cabʌl laꞌ tyʌcꞌlʌntyel, pero ti laꞌ cuchu laꞌ wocol ti wen chaꞌan ti laꞌ chꞌujbiyon. Jini chaꞌan mi quejel c cʌñʌtyañetla cheꞌ mi tyʌlel jini ñoj wocol bʌ tyʌcꞌlʌntyel yicꞌot yilpusicꞌlentyel muꞌ bʌ i tyʌlel ti pejtyelel mulawil chaꞌan miꞌ tsictisan majchqui an i mul yicꞌot majchqui mi quejel i yochel ti xotꞌmulil.
11 Mi quejel c tyʌlel ti ora jach. Xucꞌchocon laꞌ pusicꞌal ti jini tsaꞌ bʌ laꞌ chꞌujbi chaꞌan maꞌan majch chꞌujbi i chilbeñetla laꞌ majtyan muꞌ bʌ i yʌqꞌuentyel jini muꞌ bʌ i yajñel ti tyoj.
12 Jini muꞌ bʌ quejel i ganariñob chaꞌan maꞌan miꞌ sʌt i bʌ mi quejel c xucꞌchocon yaꞌ ti panchan yaꞌ baꞌan lac Dios. Maꞌan baꞌ bʌ ora mi quejel i chaꞌ loqꞌuel. Mi quejel c tsictisan chaꞌan i yalobilobʌch lac Dios. Mi quejel cʌqꞌuen i chaꞌlen chumtyʌl yaꞌ baꞌan lac Dios ti lum muꞌ bʌ i pejcʌntyel ti tsijiꞌ bʌ Jerusalén, jini tyʌlem bʌ ti panchan baꞌan lac Dios. Mic tsictisan chaꞌan calobilobʌch.
13 Jini yom bʌ i yoque chꞌʌmben isujm laꞌ i wen ñʌchꞌtyan i tꞌan Chꞌujul bʌ c Chꞌujlel muꞌ bʌ i suben ochemoꞌ bʌ tic tꞌan. Chʌꞌʌch ti xijqꞌui Juan i tsꞌijbubeñob jini anoꞌ bʌ ti Filadelfia.
Xicꞌol chaꞌan jini añoꞌ bʌ ti Laodicea
14 Joñon Juañon. Jesucristo tiꞌ subon: Tsꞌijbubeñob jun jini am bʌ i yeꞌtyel tiꞌ tyojlel ochemoꞌ bʌ tic tꞌan yaꞌ ti Laodicea. Maꞌ subeñob: Chʌꞌʌch mi yʌleꞌ jini yoque ñoj melel bʌ, jini xucꞌul bʌ tsaꞌ bʌ yilʌ chʌ bʌ ti ujti, muꞌ bʌ i yʌleꞌ yoque melelʌch, jini yaꞌ bʌ an yicꞌot Dios cheꞌ tiꞌ mele pejtyelel chʌ bʌ ti mejli.
15 Cujil isujm bajcheꞌ mi laꞌ wajñel. Cujil maꞌan mi laꞌ wen pꞌuntyañon cheꞌ bajcheꞌ jini yoque xucꞌuloꞌ bʌ. Pero jeꞌel maꞌix ti laꞌ ñoj cʌyʌ laꞌ pꞌuntyañon cheꞌ bajcheꞌ jini machꞌʌ baꞌan miꞌ saj pꞌuntyañon como machꞌʌ baꞌan miꞌ chꞌujbiñoñob. Mi mux a pꞌuntyañon, pꞌuntyañon ti jumpꞌej a pusicꞌal. Pero mi maꞌix mi laꞌ yoque pꞌuntyañon cʌyʌx laꞌ pꞌuntyañon ti junyajlel.
16 Mi mach ti jumpꞌejlic laꞌ pusicꞌal laꞌ wom laꞌ pꞌuntyañon, mach com j qꞌueletla. Mux c choquetla loqꞌuel baꞌañon.
17 Pero aunque mi laꞌ lolon aleꞌ: Wen xucꞌul mic chꞌujbin Dios, an c wenlel ti Dios, wen tsꞌʌcʌl mic chaꞌliben i troñel, lolon cheꞌetla. Pero mic subeñetla: Maꞌan mi laꞌ ñaꞌtyan bajcheꞌ añetla, chaꞌan yoque pꞌumpꞌuñetla como maꞌix xucꞌul chʌncol laꞌ chꞌujbin Dios. Chacaletla yubil como maꞌix laꞌ wenlel ti Dios. Xpotsꞌetla yubil como maꞌix mi laꞌ chꞌʌmben isujm bajcheꞌ añetla tiꞌ tyojlel Dios chaꞌan maꞌan tsꞌʌcʌl chʌncox laꞌ chꞌujbin Dios.
18 Pero mic subeñetla: Laꞌ baꞌañon chaꞌan mi cʌqꞌueñetla oro yubil. Yoque laꞌ ricojlel am bʌ i cꞌʌjnibal, jiñʌch tsijiꞌ bʌ laꞌ pusicꞌal yicꞌot mi cʌqꞌueñet sʌsʌc bʌ laꞌ pislel chaꞌan mi laꞌ xojeꞌ chaꞌan maꞌan mi laꞌ quisnin chaꞌan maꞌan chacaletla yubil. Ti jini sʌsʌc bʌ laꞌ pislel tsiquil chʌncox laꞌ wajñel ti sʌc. Maꞌix laꞌ tsuculel. Mi cʌqꞌueñetla tsꞌac chaꞌan laꞌ wut chaꞌan jajmic laꞌ wut yubil, chaꞌan mi laꞌ ñaꞌtyan bajcheꞌ añetla tiꞌ tyojlel Dios.
19 Jini muꞌ bʌ c pꞌuntyan mic tiqꞌueꞌ, mic tyoj isan chaꞌan mij cotyan. Jin chaꞌan cheꞌ mic tiqꞌuetla chꞌujbin ti pejtyelel laꞌ pusicꞌal ti ora jach. Qꞌuextyan laꞌ pensal. Cʌyʌ laꞌ mul.
20 Qꞌuele laꞌ wilan, waꞌalon ti tiꞌ otyot yubil. Chʌncol c pejcañet. Mi an majch mi yubibeñon c tꞌan, muꞌ bʌ i jambeñon i tiꞌ otyot, mux cochel yaꞌ baꞌan. Mux c chaꞌlen uchꞌel yicꞌot. Mux i chaꞌlen uchꞌel quicꞌot jeꞌel. Weñʌch mi quejel lac motin ajñel.
21 Jini muꞌ bʌ quejel i ganariñob chaꞌan maꞌan miꞌ sʌt i bʌ mux cʌqꞌuen buchtyʌl quicꞌot yaꞌ baꞌ mic chaꞌlen yumʌl ti panchan. Joñon tic ganari sajtyel cheꞌ ñac ti tyejchiyon loqꞌuel baꞌan sajtyemoꞌ bʌ. Ti buchleyon quicꞌot c Tyat yaꞌ baꞌ muꞌ ti yumʌl yaꞌ ti panchan.
22 Jini yom bʌ i yoque chꞌʌmben isujm laꞌ i wen nʌchꞌtyan i tꞌan jini Chꞌujul bʌ c Chꞌujlel muꞌ bʌ i suben jini ochemoꞌ bʌ tic tꞌan yaꞌ ti jujunmujchꞌlelob. Chʌꞌʌch ti xijqꞌui Juan i tsꞌijbubeñob jini anoꞌ bʌ ti Laodicea.