Miꞌ chꞌujutisan Dios yaꞌ ti panchan
4
Cheꞌ ñac ti ujti cubin jini tꞌan tsaꞌ bʌ tsꞌijbubeyob jini añoꞌ bʌ yeꞌtyel tiꞌ tyojlel ochemoꞌ bʌ tiꞌ tꞌan Dios, ti quilʌ cheꞌ bajcheꞌ jamʌlix jumpꞌej i tiꞌ otyot yaꞌ ti panchan. Jini ajtꞌan, cheꞌ bajcheꞌ trompeta yubil, tsaꞌ bʌ i ñaxan pejcʌyon tiꞌ chaꞌ pejcʌyon. Ti yʌlʌ: Laꞌ ti letsel ilayi. Mi quejel c pʌsꞌeñet jini muꞌ bʌ quejel i wersa ujtyel.2 Jini Chꞌujul bʌ i Chꞌujlel Dios tiꞌ pʌyʌyon letsel ti ora jach. Yaꞌi ti quilʌ jumpꞌej buchlibʌl baꞌ miꞌ chaꞌlen yumʌl Dios. Yaꞌan juntiquil buchul bʌ ti buchlibʌl.
3 I ñiꞌ i wut jini am bʌ ti buchlibʌl lajal ti qꞌuelol cheꞌ bajcheꞌ yoque cꞌotyajax bʌ lemlaw bʌ tyuni jaspe o cornalina bʌ tyun. Yaꞌ tiꞌ tyojel jini buchlibʌl an juntsꞌijt xojob muꞌ bʌ i tsꞌʌjyel cheꞌ bajcheꞌ cꞌotyajax bʌ yʌyʌx bʌ tyun esmeralda bʌ i cꞌabaꞌ.
4 Yaꞌ ti joytyʌlel jini cꞌotyajax bʌ buchlibʌl ti quilʌ yambʌ veinticuatro buchlibʌl tyac baꞌ buchulob veinticuatro ancianojob. Lʌpʌl i chaꞌañob sʌsʌc bʌ i pislel. An i coronajlel melel bʌ ti oro tiꞌ jol jujuntiquil.
5 Tiꞌ buchlib Dios ti loqꞌui cheꞌ bajcheꞌ mi lejmel chajc yicꞌot cꞌam bʌ tꞌan tyac yicꞌot i tꞌan chajc. Tiꞌ tyojel i buchlib Dios yaꞌ lemlemña siete cꞌajc. Tic ñaꞌtyʌ chaꞌan jini siete lemlaw bʌ cꞌajc jiñʌch jini Chꞌujul bʌ i Chꞌujlel Dios i wentyʌlel muꞌ bʌ ti troñel tiꞌ pusicꞌal jini añoꞌ bʌ ti siete mujchꞌlelob ochemoꞌ bʌ tiꞌ tꞌan Dios.
6 Yaꞌ tiꞌ tyojel i buchlib Dios an cheꞌ bʌ bajcheꞌ colem jaꞌ melel bʌ ti vidrio yilal. Lemlaw cheꞌ bajcheꞌ miꞌ jatsꞌeꞌ qꞌuin espejo. Ti joytyʌlel jini buchlibʌl tiꞌ chʌnwejlel an chʌntiquil cuxul bʌ chʌ bʌ yes. Cabʌl i wut tiꞌ tyojel i wut yicꞌot tiꞌ pat.
7 Cheꞌ bajcheꞌ bajlʌm yilal jini ñaxan bʌ. Cheꞌ bajcheꞌ tyat wacax yilal jini chaꞌticlel bʌ. Yuxticlel bʌ cheꞌ yilal bajcheꞌ i niꞌ i wut winic. I chʌnticlel bʌ cheꞌ bajcheꞌ águila muꞌ bʌ ti wejlel yilal.
8 Ti jujuntiquil jini chʌntiquil cuxul bʌ chʌ bʌ yes an seis tyacob i wichꞌ. Ti jujumpꞌej i wichꞌ an cabʌl i wut tyac tiꞌ pam yicꞌot tiꞌ yebal. Cꞌʌlʌ mi ñumel qꞌuin, cꞌʌlʌ mi ñumel acꞌbʌlel maꞌan baꞌ bʌ ora miꞌ cʌyob i yʌleꞌ:
Chꞌujulet, chꞌujulet, chꞌujulet,
lojon c Yum, Dios machꞌʌ baꞌan i pꞌisol a pꞌʌtyʌlel,
añet bʌ ti ñoj oniyix, añet bʌ wale iliyi, añet bʌ ti tyal tyo bʌ ora.
Cheꞌ miꞌ yʌlob.
9 Cheꞌ ti jujunyajlel jini chʌntiquil cuxul bʌ chʌ bʌ yes miꞌ subeñob i ñuclel jini buchul bʌ tiꞌ buchlib, jini cuxul bʌ cꞌʌlʌ ti beleꞌ ora, yicꞌot miꞌ qꞌuelob ti ñuc, yicꞌot miꞌ suben wocox i yʌlʌ,
10 jini veinticuatro ancianojob miꞌ ñoctyʌlob tiꞌ tyojel jini buchul bʌ tiꞌ buchlib. Miꞌ chꞌujutisañob jini cuxul bʌ ti beleꞌ ora. Miꞌ yʌcꞌob i corona yaꞌ tiꞌ tyojel i buchlib Dios chaꞌan i señʌjlel chʌncol i yoque qꞌuelob ti ñuc. Mi yʌlob:
11 Lojon c Yum, lojon c Dios. An a ñuclel
chaꞌan sujbic a ñuclel, chaꞌan qꞌuejliquet ti ñuc, chaꞌan tsictiyic a pꞌʌtyʌlel
como jatyet ti a mele pejtyelel chʌ bʌ yes an tyac.
Chaꞌan chʌꞌʌch a wom añʌch pejtyelel chʌ bʌ yes an tyac. Ti mejli chaꞌan chʌꞌʌch a wom.
Chʌꞌʌch mi yʌlob jini veinticuatro ancianojob.