Bʌlʌl bʌ jun yicꞌot i Tiñʌmeꞌ Dios
5
Joñon Juañon. Chʌncol c subeñet chʌ bʌ yes ti quilʌ cheꞌ bajcheꞌ tic ñajal. Ti quilʌ jumpꞌej bʌlʌl bʌ jun yaꞌ tiꞌ ñoj bʌ i cꞌʌb jini buchul bʌ tiꞌ buchlib. Luꞌ tsꞌijbubilix i mal yicꞌot i pat jini jun. Wen ñupꞌulix ti siete sello.2 Ti quilʌ juntiquil wen pꞌʌtyʌl bʌ ajtroñel i chaꞌan Dios chꞌoyol bʌ ti panchan. Tiꞌ cꞌajtibe ti cꞌam bʌ tꞌan: ¿Am ba majch an i ñuclel chaꞌan i jameꞌ jini bʌlʌl bʌ jun, chaꞌan i tsileꞌ loqꞌuel i sellojlel? Cheꞌ ti yʌlʌ jini ajtroñel i chaꞌan Dios.
3 Pero maꞌan majch an i ñuclel chaꞌan chꞌujbi i jameꞌ jini bʌlʌl bʌ jun, mi chaꞌanic i qꞌueleꞌ mi yaꞌic ti panchan, mi wʌꞌic ti mulawil, mi yaꞌic baꞌ muchꞌquibilob pejtyelel sajtyemoꞌ bʌ.
4 Chaꞌan ti caj c chꞌʌjyemlel tic wen chaꞌle uqꞌuel como maꞌan tsiquil mi an majch an i ñuclel chaꞌan i jameꞌ jini bʌlʌl bʌ jun chaꞌan mi yilan chʌ bʌ yes yaꞌ tsꞌijbubil.
5 Cheꞌ jini, juntiquil jini ancianojob tiꞌ subeyon. Mach a bej chaꞌlen uqꞌuel, cheꞌen. An juntiquil tsaꞌ bʌ i jotbe pejtyelel i pꞌʌtyʌlel i simaronlel mulawil. An i ñuclel chaꞌan miꞌ jameꞌ jini bʌlʌl bʌ jun chaꞌan miꞌ tsileꞌ jini siete i sellojlel. Jiñʌch jini tyʌlem bʌ ti jiñʌjlel Judá. Tyʌlem tiꞌ jiñʌjlel David. An cabʌl i pꞌʌtyʌlel cheꞌ bajcheꞌ yoque an i pꞌʌtyʌlel bajlʌm.
6 Cheꞌ jini, yaꞌ tiꞌ xinil jini chʌntiquil cuxul bʌ chʌ bʌ yes yicꞌot jini ancianojob cheꞌ bajcheꞌ tic ñajal ti quilʌ yaꞌ waꞌal juntiquil muꞌ bʌ i pejcʌntyel ti i Tiñʌmeꞌ Dios. Cheꞌ bajcheꞌ tsaꞌix tsʌnsʌnti yilal pero chaꞌ cuxulix. Jini Tiñʌmeꞌ bʌ ti quilʌ, jiñʌch lac Yum Jesucristo. An siete i xulub yicꞌot siete i wut. I sujmlel jini siete i wut yom i yʌleꞌ jini Chꞌujul bʌ i Chꞌujlel Dios tsaꞌ bʌ xijqꞌui majlel ti pejtyelel mulawil.
7 Jini lac Yum Jesucristo jiñʌch muꞌ bʌ i pejcʌntyel ti i Tiñʌmeꞌ Dios, tiꞌ lʌcꞌʌ jini am bʌ tiꞌ buchlib. Tiꞌ chꞌʌmʌ jini bʌlʌl bʌ jun chucul bʌ i chaꞌan tiꞌ ñoj bʌ i cꞌʌb.
8 Cheꞌ ñac lac Yum Jesucristo, jini muꞌ bʌ i pejcʌntyel ti i Tiñʌmeꞌ Dios, tiꞌ chꞌʌmʌ jini bʌlʌl bʌ jun jini cuatro cuxul bʌ chʌ bʌ yes yicꞌot jini veinticuatro ancianojob ti ñocleyob yaꞌ tiꞌ tyojel jini Tiñʌmeꞌ bʌ yubil. Ti jujuntiquil jini ancianojob an i chaꞌan jumpꞌej arpa bʌ música. An i chaꞌañob ti jujuntiquil jumpꞌej saj chꞌejew yilal melel bʌ ti oro. Butꞌul ti pom. I sujmlel jini pom jiñʌch i yoración jini i chaꞌañoꞌ bʌ Dios.
9 Tiꞌ cꞌʌybeyob tsijiꞌ bʌ cꞌay muꞌ bʌ i yʌleꞌ:
An a ñuclel chaꞌan maꞌ chꞌʌmeꞌ jini bʌlʌl bʌ jun, chaꞌan maꞌ tsilben loqꞌuel i sellojlel tyac
como ti tsʌnsʌntiyet. Ti a chꞌichꞌel ti a mʌñʌ quixtyañujob
loqꞌuemoꞌ bʌ ti jujunchajp quixtyañujob, ti jujunchajp tꞌan tyac, ti jujunchajp pañimil.
10 Tsaꞌix a wotsʌyon lojon ti rey yicꞌot ti cura yubil chaꞌan mic sub lojon i ñuclel Dios.
Mux c chaꞌlen lojon yumʌl ti mulawil a wicꞌot.
Cheꞌ tiꞌ cꞌʌyʌyob lac Yum.
11 Cheꞌ bajcheꞌ tic ñajal ti cubi i tꞌañob yoque yonlel ajtroñelob i chaꞌan Dios am bʌ ti panchan. Yaꞌ añob ya tiꞌ suttyʌlel i buchlib Dios yicꞌot jini cuatro cuxul bʌ chʌ bʌ yes yicꞌot jini veinticuatro ancianojob. An cabʌl jini ajtroñelob i chaꞌan Dios am bʌ ti panchan ti millon ti millon.
12 Ti cꞌam bʌ tꞌan ti yʌlʌyob:
An i ñuclel chaꞌan aqꞌuentic i yeꞌtyel jini muꞌ bʌ i pejcʌntyel ti i Tiñʌmeꞌ Dios tsaꞌ bʌ tsʌnsʌnti.
An i ñuclel chaꞌan aqꞌuentic cabʌl i ñaꞌtyʌbal yicꞌot i pꞌʌtyʌlel
yicꞌot chaꞌan wen qꞌuejlic ti ñuc yicꞌot chaꞌan wen sujbic i ñuclel yicꞌot chaꞌan wen sujbic i yutslel.
Cheꞌ ti yʌlʌyob.
13 Ti cubi muꞌ ti tꞌan pejtyelel chʌ bʌ tyac jach yes tiꞌ mele Dios, jiñi yaꞌ bʌ an ti panchan, yicꞌot wʌꞌ bʌ an ti mulawil, yicꞌot yaꞌ bʌ an baꞌ muchꞌquibilob pejtyelel tsaꞌ bʌ sajtiyob, yicꞌot an ti colem jaꞌ, yicꞌot an ti mal jaꞌ, yicꞌot an ti mal lum. Ti pejtyelelob chʌncox i luꞌ alob:
Ti pejtyel ora laꞌ sujbic i yutslel, laꞌ qꞌuejlic ti ñuc, laꞌ sujbic i ñuclel, laꞌ aqꞌuentic i wersajlel i tꞌan
jini buchul bʌ tiꞌ buchlib yicꞌot jini muꞌ bʌ i pejcʌntyel ti i Tiñʌmeꞌ Dios.
Cheꞌ ti yʌlʌyob.
14 Jini cuatro cuxul bʌ chʌ bʌ yes ti yʌlʌyob: Chʌꞌʌch yom. Cheꞌ ti yʌlʌyob. Jini veinticuatro ancianojob ti ñocleyob yaꞌ tiꞌ tyojlel. Tiꞌ chꞌujutisayob jini cuxul bʌ ti pejtyel qꞌuin.