2 Ti quilʌ juncojt sʌsʌc bʌ caballo. Jini cꞌʌchʌl bʌ tiꞌ pat caballo chucul i chaꞌan i wʌn tyeꞌ. Ti aqꞌuenti i corona. Wen chꞌejl ti loqꞌui majlel chaꞌan miꞌ ganarin cabʌl pañimil tyac.

3 Cheꞌ ñac jini muꞌ bʌ i pejcʌntyel ti i Tiñʌmeꞌ Dios tiꞌ tsili loqꞌuel jini chaꞌpꞌejlel bʌ i sellojlel lʌpꞌʌl bʌ ti jini bʌlʌl bʌ jun ti cubi i tꞌan jini chaꞌticlel cuxul bʌ chʌ bʌ yes. Ti yʌlʌ: Laꞌ. Qꞌuele, cheꞌen.

4 Ti quilʌ cheꞌ bajcheꞌ tic ñajal ti loqꞌui majlel yambʌ caballo, wen chʌchʌc bʌ. Jini cꞌʌchʌl bʌ tiꞌ pat jini caballo ti aqꞌuenti i pꞌʌtyʌlel chaꞌan miꞌ jisʌben i ñʌchꞌtyʌlel mulawil, chaꞌan miꞌ tsʌnsañob i bʌ quixtyañu. Jini cꞌʌchʌl bʌ ti caballo ti aqꞌuenti juntsꞌijt colem espada.

5 Cheꞌ ñac jini i wentyʌlel i Tiñʌmeꞌ Dios yubil tiꞌ tsili jini yuxpꞌejlel bʌ i sellojlel jini bʌlʌl bʌ jun, ti cubi i tꞌan jini yuxticlel bʌ cuxul bʌ chʌ bʌ yes. Ti yʌlʌ: Laꞌ. Qꞌuele, cheꞌen. Ti quilʌ juncojt iꞌicꞌ bʌ caballo. Jini cꞌʌchʌl bʌ tiꞌ pat an i balanza tiꞌ cꞌʌb.

6 Ti cubi ajtꞌan loqꞌuem bʌ yaꞌ tiꞌ xinil baꞌan jini chʌntiquil cuxul bʌ chʌ bʌ yes tsaꞌ bʌ yʌlʌ: Jumpꞌej jach kilo trigo i tyojol cheꞌ bajcheꞌ jumpꞌej qꞌuin bʌ troñel, uxpꞌej jach kilo i wut pimel cebada bʌ i cꞌabaꞌ i tyojol cheꞌ bajcheꞌ jumpꞌej qꞌuin troñel. Pero mach a wʌcꞌ ti asiyel jini oliva bʌ aceite mi jinic yaꞌlel uva. Chʌꞌʌch ti yʌlʌ jini ajtꞌan.

7 Cheꞌ ñac Jesucristo jiñʌch muꞌ bʌ i pejcʌntyel ti i Tiñʌmeꞌ Dios, tiꞌ tsili loqꞌuel jini chʌmpꞌejlel bʌ i sellojlel lʌpꞌʌl bʌ ti bʌlʌl bʌ jun, ti cubi i tꞌan jini chʌnticlel cuxul bʌ chʌ bʌ yes. Ti yʌlʌ: Laꞌ. Qꞌuele, cheꞌen.

8 Ti quilʌ cheꞌ bajcheꞌ tic ñajal juncojt cꞌʌncꞌʌn caballo. Jini cꞌʌchʌl bʌ tiꞌ pat i cꞌabaꞌʌch Ajsajtyel. Jini tsaꞌ bʌ i tsʌcle majlel tiꞌ pat, i cꞌabaꞌʌch I Yajnib Sajtyemoꞌ Bʌ. Ti aqꞌuentiyob i pꞌʌtyʌlel chaꞌan i tsʌnsan jujuntiquil loqꞌuem bʌ ti chʌnchʌntiquil pejtyelel quixtyañujob mi ti guerra, mi ti wiꞌñal, mi ti cꞌamꞌan o mi ti maꞌtyeꞌlel animal.

9 Cheꞌ ñac jini muꞌ bʌ i pejcʌntyel ti i Tiñʌmeꞌ Dios tiꞌ tsili loqꞌuel jini jopꞌejlel bʌ i sellojlel bʌlʌl bʌ jun ti quilʌ jumpꞌej i yajnib baꞌ miꞌ pulel i majtyan Dios. Yaꞌ ti yebal jini i yajnib ti quilʌ cuxulix pejtyelel quixtyañujob tsaꞌ bʌ tsʌnsʌntiyob chaꞌan ti caj i tꞌan Dios yicꞌot chaꞌan ti yʌlʌyob chaꞌan yoque melelʌch i tꞌan Dios.

10 Tiꞌ chaꞌleyob cꞌam bʌ tꞌan. Ti yʌlʌyob: C Yum lojon, chꞌujuletyʌch. Maꞌ beleꞌ tsꞌʌctisan tsaꞌ bʌ a wʌlʌ. ¿Jalatyoqui mi quej a wʌqꞌuen i melob i bʌ, jaypꞌej tyo qꞌuin jintyo mi quej a wʌqꞌuen i xotꞌob i mul simaroñoꞌ bʌ añoꞌ bʌ ti mulawil tsaꞌ bʌ i tsʌnsʌyon lojon? Cheꞌ ti yʌlʌyob.

11 Ti jujuntiquilob tsaꞌ bʌ tsʌnsʌntiyob chaꞌan ti caj i tꞌan Dios ti aqꞌuentiyob jujumpꞌoch sʌsʌc bʌ i pislel. Ti subentiyob chaꞌan ñʌchꞌʌl miꞌ poj pijtyan tsꞌityaꞌ jintyo miꞌ tsꞌʌctisan bajcheꞌ yonlel hermañujob tiꞌ troñel lac Yum mi quej i tsʌnsʌntyelob cheꞌ bajcheꞌ ti tsʌnsʌntiyob jeꞌel. Chʌꞌʌch ti subentiyob, ti cubi.

12 Ti quilʌ cheꞌ bajcheꞌ tic ñajal cheꞌ ñac jini muꞌ bʌ i pejcʌntyel ti i Tiñʌmeꞌ Dios tiꞌ tsili loqꞌuel jini wʌcꞌpꞌejlel bʌ i sellojlel lʌpꞌʌl bʌ ti bʌlʌl bʌ jun. Ti ñumi pꞌʌtyʌl bʌ yujquel lum. Ti wen icꞌʌ qꞌuin cheꞌ bajcheꞌ yoque iꞌicꞌ bʌ pisil. Cheꞌ ñac petsel jini uw ti sujti ti chꞌichꞌ yilal chaꞌan yoque chʌchʌc ti majli.

13 Jini ecꞌ tyac ti yajli jubel ti lum cheꞌ bajcheꞌ mi pꞌajtyel jubel i wut higuera tyeꞌ cheꞌ miꞌ ñijcan pꞌʌtyʌl bʌ icꞌ.

14 Jini chan ti sʌc lajmi cheꞌ bajcheꞌ mi bʌjlel jun. Ti sajti tic wut jini chan. Pejtyel wits tyac yicꞌot lum tyac joyol bʌ ti jaꞌ ti nijcʌntiyob loquel ti yajnib baꞌan tyac.

15 Tiꞌ motin mucuyob i bʌ ti chꞌen yicꞌot ti xajwʌlel tyac am bʌ ti colem wits jini ñuc bʌ yumʌlob ti mulawil yicꞌot winicob muꞌ bʌ i qꞌuejlelob ti ñuc, yicꞌot jini am bʌ cabʌl chʌ bʌ an i chaꞌan yicꞌot i yaj capitán soldadojob yicꞌot pꞌʌtyʌloꞌ bʌ winicob yicꞌot pejtyelel lolon ajtroñelob añoꞌ bʌ tiꞌ yum, yicꞌot winicob machꞌʌ baꞌan tiꞌ yum.

16 Tiꞌ lolon pejcʌyob jini wits yicꞌot jini xajwʌlel tyac. Ti yʌlʌyob: Yajlen ti joñon lojon. Mʌctyʌbeñon lojon chaꞌan machic i yilañon lojon jini buchul bʌ tiꞌ buchlib. Mʌctyʌbeñon lojon chaꞌan mach i tyajon lojon jini ñoj bʌbʌqꞌuen bʌ i michꞌlel jini muꞌ bʌ i pejcʌntyel ti i Tiñʌmeꞌ Dios.

17 Como tsaꞌix cꞌoti jini bʌbʌqꞌuen bʌ i qꞌuinilel chaꞌan mi quejel lojon cubin i michꞌlel. Maꞌan majch chꞌujbi i cucheꞌ i michꞌlel Dios yicꞌot jini muꞌ bʌ i pejcʌntyel ti i Tiñʌmeꞌ Dios. Cheꞌ ti yʌlʌyob.