Jini yajcʌbiloꞌ bʌ ti jiñʌjlel Israel
7
Joñon Juañon. Cheꞌ ñac ti ujti j qꞌueleꞌ jini tsaꞌ bʌ cʌlʌ, cheꞌ bajcheꞌ tic ñajal ti quilʌ chʌntiquil ajtroñelob i chaꞌan Dios chꞌoyol bʌ ti panchan. Jujuntiquil yaꞌ waꞌal ti chʌmpꞌej i yajnib mulawil. Chʌncol i ticꞌob jini chʌnchajp icꞌ am bʌ ti mulawil chaꞌan mach saj ñumic ti mulawil mi ti colem jaꞌic mi ti juntyejquic tyeꞌ.2 Ti quilʌ yambʌ ajtroñel i chaꞌan Dios chꞌoyol bʌ ti panchan. Chʌncol i loqꞌuel tyʌlel yaꞌ baꞌ miꞌ pasel qꞌuin. Chucul i chaꞌan tiꞌ cꞌʌb i sello i chaꞌan bʌ jini cuxul bʌ Dios. Ti cꞌam bʌ tꞌan tiꞌ pejcʌyob jini chʌntiquil ajtroñelob i chaꞌan Dios chꞌoyol bʌ ti panchan tsaꞌ bʌ aqꞌuentiyob i pꞌʌtyʌlel chaꞌan i tyʌcꞌlan jini mulawil yicꞌot colem jaꞌ.
3 Tiꞌ subeyob: Maꞌ mi laꞌ tyʌcꞌlan jini mulawil, mi colem jaꞌic mi tyeꞌic jintyo mi lac ñaxan cotsʌben i sello Dios tiꞌ pam jini ajtroñelob i chaꞌan lac Dios. Cheꞌ ti yʌlʌ jini ajtroñel i chaꞌan Dios chꞌoyol bʌ ti panchan.
4 Ti cubi i númerojlel jini tsaꞌ bʌ aqꞌuentiyob i sellojlel. An ciento cuarenta y cuatro milob. Loqꞌuemoꞌ ti jujunchajp i jiñʌjlel Israel.
5 Ti aqꞌuentiyob i sellojlel doce mil loqꞌuemoꞌ bʌ tiꞌ jiñʌjlel Judá, doce mil loqꞌuemoꞌ bʌ tiꞌ jiñʌjlel Rubén, doce mil loqꞌuemoꞌ bʌ tiꞌ jiñʌjlel Gad,
6 doce mil loqꞌuemoꞌ bʌ ti jiñʌjlel Aser, doce mil loqꞌuemoꞌ bʌ tiꞌ jiñʌjlel Neftalí, doce mil loqꞌuemoꞌ bʌ ti jiñʌjlel Manasés,
7 doce mil loqꞌuemoꞌ bʌ tiꞌ jiñʌjlel Simeón, doce mil loqꞌuemoꞌ bʌ ti jiñʌjlel Leví, doce mil loqꞌuemoꞌ bʌ tiꞌ jiñʌjlel Isacar,
8 doce mil loqꞌuemoꞌ bʌ tiꞌ jiñʌjlel Zabulón, doce mil loqꞌuemoꞌ bʌ ti jiñʌjlel José, yicꞌot doce mil loqꞌuemoꞌ bʌ tiꞌ jiñʌjlel Benjamín.
Jini yaꞌ bʌꞌan cabʌl sʌsʌcoꞌ bʌ i pislel
9 Ti wiꞌil ti quilʌ yoque yonlel quixtyañu loqꞌuemoꞌ bʌ ti jujunchajp quixtyañujob, ti jujunchajp tꞌan tyac, ti jujumpꞌej pañimil tyac yaꞌ waꞌalob tiꞌ tꞌejl jini buchlibʌl yicꞌot yaꞌ tiꞌ tyojel jini muꞌ bʌ i pejcʌntyel ti i Tiñʌmeꞌ Dios. Chaꞌan ti caj yoque yonlelob maꞌan majch chꞌujbi i tsicob. Lʌpʌl i chaꞌañob sʌsʌc bʌ i pislel. Chucul i chaꞌañob i yopol xan tiꞌ cꞌʌb.
10 Ti luꞌ alʌyob ti cꞌam bʌ tꞌan:
Tyʌlem laj cotyʌntyel ti Dios
yaꞌ bʌ buchul tiꞌ buchlib
yicꞌot ti Jesucristo jini muꞌ bʌ i pejcʌntyel ti i Tiñʌmeꞌ Dios.
Cheꞌ ti yʌlʌyob.
11 Ti quilʌ ti pejtyelel jini ajtroñelob i chaꞌañob Dios am bʌ ti panchan yaꞌ waꞌalob yaꞌ ti suttyʌlel jini buchlibʌl yicꞌot ti suttyʌlel jini ancianojob, yicꞌot jini chʌntiquil cuxul bʌ chʌ bʌ yes. Ti ñocleyob yaꞌ tiꞌ tꞌejl i buchlib Dios. Tiꞌ chꞌujutisʌyob Dios.
12 Ti yʌlʌyob:
Chʌꞌʌch yom. Laꞌ sujbic i yutslel yicꞌot i ñuclel lac Dios ti beleꞌ ora. Laꞌ tsictiyic i ñaꞌtyʌbal, laꞌ subentic wocox i yʌlʌ,
laꞌ qꞌuejlic ti ñuc, laꞌ tsictiyic i pꞌʌtyʌlel
chaꞌan ti pejtyel qꞌuin. Amén.
Cheꞌ ti yʌlʌyob.
13 Cheꞌ jini juntiquil jini ancianojob tiꞌ cꞌajtibeyon: ¿A wujil ba majchqui jini añoꞌ bʌ sʌsʌc bʌ i pislel? ¿A wujil ba isujm baqui chꞌoyolob? Cheꞌ tiꞌ cꞌajtibeyon, cheꞌen Juan.
14 Tic jacꞌbe jini anciano: C yum, joñon mach cujil isujm. Pero jatyet a wujil isujm, choꞌon tic sube. Jini anciano tiꞌ subeyon: Jiñobʌch jini tsaꞌ bʌ i cuchuyob ti wen jini ñoj ñuc bʌ wocol. Ñusʌbilobix i mul. Tiꞌ wutsꞌuyob i pislel tiꞌ chꞌichꞌel yubil jini muꞌ bʌ i pejcʌntyel ti i Tiñʌmeꞌ Dios. Cheꞌ tiꞌ subeyon jini anciano.
15 Jini anciano tiꞌ más subeyon. Ti yʌlʌ: Jin chaꞌan yaꞌañob tiꞌ tyojel i buchlib Dios chaꞌan miꞌ beleꞌ chaꞌliben i troñel ti qꞌuiñil yicꞌot ti acꞌbʌlel. Jini buchul bʌ tiꞌ buchlib miꞌ cʌñʌtyan como yaꞌan yicꞌotyob.
16 Maꞌan baꞌ bʌ ora mi quejel i chaꞌ ubin wiꞌñal, mi tyʌquin tiꞌ. Maꞌan baꞌ bʌ ora mi quejel i pulob i bʌ ti qꞌuin. Maꞌan baꞌ bʌ ora mi quejel i chaꞌ ubiñob ticwal.
17 Como jini muꞌ bʌ i pejcʌntyel ti i Tiñʌmeꞌ Dios yaꞌ tiꞌ tyojel buchlibʌl mi quejel i cʌñʌtyañob cheꞌ bajcheꞌ juntiquil ajcʌñʌtya oveja. Mi quejel i pʌyob majlel yaꞌ baꞌan cuxul bʌ jaꞌ chaꞌan maꞌan baꞌ bʌ ora mi quejel i yubin tyʌquin tiꞌ. Chʌꞌʌch jeꞌel quixtyañujob i chaꞌan bʌ lac Yum mi quejel i yʌqꞌuentyel i tijicñiyel. Dios mi quejel i sujcubeñob i yaꞌlel i wut. Cheꞌ tiꞌ subeyon jini anciano.