2 Cheꞌ jini ti quilʌ cheꞌ bajcheꞌ tic ñajal jini siete ajtroñelob i chaꞌañoꞌ bʌ Dios chꞌoyol bʌ ti panchan. Yaꞌ waꞌalob tiꞌ tyojel Dios. Ti aqꞌuentiyob jujuntiquil i trompeta.

3 Cheꞌ jini ti tyʌli yambʌ ajtroñel i chaꞌan Dios chꞌoyol bʌ ti panchan. Yaꞌ ti waꞌle yaꞌ tiꞌ tꞌejl i yajnib baꞌ miꞌ puleꞌ pom. Chucul i chaꞌan oro bʌ i puloꞌ pom. Ti aqꞌuenti cabʌl pom chaꞌan miꞌ xʌctyun yicꞌot i yoración pejtyel i chaꞌañoꞌ bʌ Dios. Ti yʌcꞌʌ ti pulel ti pam i yajnib baꞌ miꞌ puleꞌ pom yaꞌ tiꞌ tyojel i buchlib Dios. Jini puloꞌ pom melel ti oro.

4 Ti letsi majlel yaꞌ baꞌan Dios i butsꞌil jini pom tsaꞌ bʌ i yʌcꞌʌ ti pulel jini ajtroñel i chaꞌan Dios chꞌoyol bʌ ti panchan. Lajal ti letsi i butsꞌil pom yicꞌot i yoración ochemoꞌ bʌ tiꞌ tꞌan Dios.

5 Tiꞌ quilʌ cheꞌ bajcheꞌ tic ñajal jini ajtroñel i chaꞌan Dios chꞌoyol bʌ ti panchan tiꞌ chaꞌ chꞌʌmʌ i puloꞌ pom. Tiꞌ butꞌu ti nichꞌ cꞌajc loqꞌuem bʌ ti i yajnib baꞌ miꞌ puleꞌ i majtyan Dios. Cheꞌ jini, tiꞌ choco jubel ti mulawil. Ti tyʌli i tꞌan chajc yicꞌot cꞌam bʌ tꞌan tyac yicꞌot ti lejmi chajc yicꞌot ti ñumi yujquel lum.

6 Che jini, ti quilʌ cheꞌ bajcheꞌ tic ñajal jini siete ajtroñelob i chaꞌan Dios chꞌoyoloꞌ bʌ ti panchan añoꞌ bʌ i chaꞌan i trompeta. Tiꞌ chajpʌyob i bʌ chaꞌan miꞌ wuseꞌ i trompeta.

7 Jini ñaxan bʌ ajtroñel i chaꞌan Dios chꞌoyol bʌ ti panchan tiꞌ ñaxan yuꞌtisʌ i trompeta. Ti tyʌli tyuni jaꞌ yicꞌot cꞌajc xʌcꞌtyʌbil yicꞌot chꞌichꞌ tsaꞌ bʌ chojqui jubel ti mulawil. Ti puli junchajp loqꞌuem bʌ ti uxchajp jiñi mulawil, yicꞌot juntyejc loqꞌuem bʌ ti uxtyejc tyeꞌ tyac yicꞌot ti puli junchajp loqꞌuem bʌ ti uxchajp jam muꞌ bʌ i colel.

8 Jini chaꞌticlel bʌ ajtroñel i chaꞌan Dios chꞌoyol bʌ ti panchan tiꞌ yuꞌtisʌ i trompeta. Cheꞌ jini ti chojqui ochel ti mal colem jaꞌ cheꞌ bajcheꞌ colem wits chʌncol ti pulel ti cꞌajc yilal. Junchajp loqꞌuem ti uxchajp jini colem jaꞌ tiꞌ sujti ti chꞌichꞌ.

9 Ti chʌmi juncojt loqꞌuem bʌ ti uxcojt pejtyelel chʌ bʌ yes cuxul bʌ yaꞌ ti mal colem jaꞌ. Ti jisʌnti jumpꞌej loqꞌuem bʌ ti uxpꞌej barco tyac.

10 Ti quilʌ cheꞌ bajcheꞌ tic ñajal jini yuxticlel bʌ ajtroñel i chaꞌan Dios chꞌoyol bʌ ti panchan tiꞌ yuꞌtisʌ i trompeta. Ti jubi tyʌlel colem ecꞌ ti chan. Chʌncol ti pulel cheꞌ bajcheꞌ lemlemña bʌ cꞌajc yilal. Ti yajli yaꞌ ti juntsꞌijt loqꞌuem bʌ ti uxtsꞌijt jini río tyac yicꞌot i pasiꞌ río tyac.

11 Jini ecꞌ Ajenjo i cꞌabaꞌ. Jiñʌch yom i yʌl yoque chꞌaj bʌ pimel ti lac tꞌan. Jumpꞌej loqꞌuem bʌ ti uxpꞌej jini jaꞌ chꞌaj ti majli. Cabʌl quixtyañujob ti sajtiyob chaꞌan ti chꞌajꞌʌ jaꞌ.

12 Joñon Juañon. Ti quilʌ cheꞌ bajcheꞌ tic ñajal jini chʌnticlel bʌ ajtroñel i chaꞌan Dios chꞌoyol bʌ ti panchan tiꞌ yuꞌtisʌ i trompeta. Cheꞌ jini an chʌ bʌ ti tyumbenti junsejl loqꞌuem bʌ ti uxsejl jini qꞌuin yicꞌot uw yicꞌot ecꞌ tyac. Cheꞌ jini icꞌjowan ti majli junchajp loqꞌuem bʌ ti uxchajp qꞌuinil yicꞌot acꞌbʌlel como junsejl loqꞌuem bʌ ti uxsejl maꞌan ti yʌcꞌʌ i cꞌʌcꞌal mi qꞌuin, mi uw, mi ecꞌic.

13 Cheꞌ jini ti queji j qꞌueleꞌ, ti queji cubin juntiquil ajtroñel i chaꞌan Dios am bʌ ti panchan muꞌ bʌ ti wejlel yaꞌ ti chan. Ti cꞌam bʌ tꞌan chʌncol yʌleꞌ: Yoque ñoj pꞌumpꞌuñetla añet bʌ la ti mulawil. Como más tsʌts bʌ wocol mi quejel laꞌ ñusan chaꞌan ti caj i tꞌan jini trompeta muꞌ tyo bʌ i wusob jini yambʌ uxtiquil ajtroñelob i chaꞌan Dios chꞌoyol bʌ ti panchan. Cheꞌ ti yʌlʌ.