2 Jini ecꞌ bʌ yilal tiꞌ jambe i tiꞌ jini chꞌen. Ti loqꞌui tyʌlel butsꞌ. Cʌlʌxix ti letsi i butsꞌil cheꞌ bajcheꞌ i butsꞌil colem cꞌajc. Ti icꞌʌ qꞌuin yicꞌot chan chaꞌan i butsꞌil tsaꞌ bʌ loqꞌui tyʌlel ti chꞌen.

3 Ti loqꞌui tyʌlel cabʌl sajcꞌ tiꞌ butsꞌ chaꞌan mi yajñel ti mulawil. Ti aqꞌuenti i pꞌʌtyʌlel i chaꞌlen cꞌux cheꞌ bajcheꞌ xtyaꞌ chʌb miꞌ chaꞌlen cꞌux.

4 Ti subenti chaꞌan maꞌan miꞌ tyʌcꞌlan jam, mi chʌ bʌyic jach bʌ yʌyʌx bʌ i yopol pimel mi tyeꞌic. Jin jach miꞌ cꞌuxob jini quixtyañu machꞌʌ baꞌan i chaꞌañob i sellojlel Dios tiꞌ pam.

5 Maꞌan ti aqꞌuenti i yoque tsʌnsʌntyelob jini quixtyañujob ti sajcꞌ. Cheꞌ jach ti aqꞌuentiyob i tyʌcꞌlʌntyelob cꞌʌlʌ jopꞌej uw. Jini tyʌcꞌlʌntyel tsaꞌ bʌ aqꞌuenti i ñusañob quixtyañu jiñʌch cheꞌ bajcheꞌ mi cꞌuxtyʌlob ti xtyaꞌ chʌb.

6 Cheꞌ chʌncol i yubiñob ili tyʌcꞌlʌntyel mi quejel i sʌclañab bajcheꞌ chꞌujbi i sajtyelob. Pero mach i tyajax. Mi quejel i mulañob i sajtyel. Mach chꞌujbi sajticob.

7 Ti quilʌ cheꞌ bajcheꞌ tic ñajal jini sajcꞌ cheꞌ bajcheꞌ caballo chajpʌbilix bʌ chaꞌan loqꞌuic ti guerra. Ti quilʌ cheꞌ bajcheꞌ an i corona melel bʌ ti oro tiꞌ jol. I ñiꞌ i wutyob cheꞌ bajcheꞌ i ñiꞌ i wut quixtyañu ti qꞌuelol yilal.

8 I tsutsel i jol cheꞌ bajcheꞌ i tsutsel i jol xꞌixic yilal. I yej cheꞌ bajcheꞌ i yej chʌchʌc bʌ bajlʌm.

9 An i sujl wechlajtic ti tajn lajal bajcheꞌ melel ti tsucul tyaqꞌuin yilal. Lajal i tꞌan i wichꞌ bajcheꞌ cabʌl carreta muꞌ bʌ i tyujcꞌan majlel caballo cheꞌ ajñel mi majlel ti guerra.

10 An i ñej cheꞌ bajcheꞌ i ñej xtyaꞌ chʌb chaꞌan i cꞌuxeꞌ quixtyañu. An i pꞌʌtyʌlel tiꞌ ñej chaꞌan i yʌqꞌuen i ñusan wocol quixtyañu cꞌʌlʌ jopꞌej uw.

11 I jefe jini sajcꞌ jiñʌch i yum jini chꞌen machꞌʌ lac tyajbe i yebal. I cꞌabaꞌ tiꞌ tꞌañob hebreojob jiñʌch Abadón. Tiꞌ tꞌan griegojob jiñʌch Apolión. Ti lac tꞌan jiñʌch i cꞌabaꞌ Ajisaya.

12 Tsaꞌix ñumi jini ñaxan bʌ wocol. Qꞌuele laꞌ wilan tyal tyo yambʌ chaꞌpꞌej.

13 Ti quilʌ cheꞌ bajcheꞌ tic ñajal tiꞌ yuꞌtisʌ i trompeta jini seislel bʌ ajtroñel i chaꞌan Dios chꞌoyol bʌ ti panchan. Ti cubi ajtꞌan loqꞌuem bʌ tiꞌ tyojlel jini chʌmpꞌej bʌ i xulub tyac jini yajnib puloꞌ pom melel bʌ ti oro yaꞌ tiꞌ tyojel Dios.

14 Jini ajtꞌan tiꞌ pejcʌ jini seislel bʌ ajtroñel i chaꞌan Dios chꞌoyol bʌ ti panchan am bʌ i trompeta. Tiꞌ sube: Tiqui jini chʌntiquil ajtroñelob i chaꞌan Dios chꞌoyol bʌ ti panchan cʌchʌloꞌ bʌ yaꞌ ti tiꞌ jini colem jaꞌ Eufrates bʌ i cꞌabaꞌ. Cheꞌ ti yʌlʌ jini ajtꞌan.

15 Tiꞌ tiquiyob jini chʌntiquil ajtroñelob i chaꞌan Dios chꞌoyol bʌ ti panchan chaꞌan miꞌ tsʌnsañob juntiquil loqꞌuem bʌ ti uꞌuxtiquil quixtyañujob. Ti wʌ chajpʌntiyob jini chʌntiquilob chaꞌan chʌꞌʌch miꞌ chaꞌleñob cheꞌ ti mero i yorojlel.

16 Ti cubi jaytiquil soldadojob cꞌʌchʌloꞌ bʌ ti caballo añob tiꞌ wenta jini chʌntiquil ajtronelob i chaꞌan Dios chꞌoyol bʌ ti panchan. Añob doscientos millones.

17 Chʌꞌʌch yilal jini caballo tyac yicꞌot jini cꞌʌchʌloꞌ bʌ tiꞌ pat tsaꞌ bʌ quilʌ cheꞌ bajcheꞌ tic ñajal. An i mʌjquil i tajn jini cꞌʌchʌloꞌ bʌ ti caballo. Chʌchʌc, yʌyʌx, yicꞌot cꞌʌncꞌʌn yilal. I jolob jini caballo tyac cheꞌ bajcheꞌ i jol chʌchʌc bajlʌm yilal. Yaꞌ tiꞌ tiꞌ caballo ti loqꞌui cꞌajc yicꞌot butsꞌ yicꞌot azufre.

18 Ti tsʌnsʌntiyob juntiquil loqꞌuem bʌ ti uꞌuxtiquil quixtyañu chaꞌan ti jini uxchajp bʌ wocol. Jiñʌch cꞌajc yicꞌot butsꞌ yicꞌot azufre tsaꞌ bʌ loqꞌui tiꞌ tiꞌ jini caballo tyac.

19 Como tiꞌ tiꞌ yicꞌot tiꞌ ñej an i pꞌʌtyʌlel chaꞌan chꞌujbi i tyʌcꞌlan quixtyañu jini caballo. Jini i ñej cheꞌ yilal bajcheꞌ lucum. An i jol bajcheꞌ i jol lucum muꞌ bʌ i loweꞌ quixtyañujob.

20 Pero jini quixtyañujob machꞌʌ baꞌan ti tsʌnsʌntiyob ti jini wocol tyac bʌ tsaꞌ bʌ ñumi, machꞌan tiꞌ qꞌuextyʌyob i pensal, machꞌan tiꞌ cʌyʌyob i mul. Maꞌan tiꞌ cʌyʌyob i chaꞌlen machꞌʌ wen bʌ i chaꞌlibal. Maꞌan tiꞌ cʌyʌyob i chꞌujutisañob xibajob yicꞌot i dios tyac melel bʌ ti oro mi ti plata mi ti bronce mi ti tyun mi ti tyeꞌ. Machꞌan mi cꞌotyel i wut jini i diosob. Machꞌan mi yubin tꞌan. Mach yujil xʌmbal.

21 Pero jini quixtyañujob machꞌan tiꞌ qꞌuextyʌyob i pensal machꞌan tiꞌ cʌyʌyob i mul. Maꞌan tiꞌ cʌyʌyob i chaꞌlen tsʌnsa, mi wujtic mi i tsuculelic mi xujchꞌic.