2 Chucul i chaꞌan tiꞌ cꞌʌb jumpꞌej saj bʌlʌl bʌ jun. Jamʌlix. Acꞌʌl i chaꞌan i ñoj bʌ yoc ti pam colem jaꞌ yicꞌot i tsꞌej bʌ yoc ti pam lum.

3 Tiꞌ chaꞌle yoque cꞌam bʌ tꞌan cheꞌ bajcheꞌ yoque cꞌam bʌ i tꞌan chʌchʌc bʌ bajlʌm. Cheꞌ ñac tiꞌ chaꞌle tꞌan jini ajtroñel i chaꞌan Dios chꞌoyol bʌ ti panchan, cheꞌ bajcheꞌ siete i tꞌan chajc tiꞌ jacꞌbe i tꞌan yubil.

4 Cheꞌ ti ujti ti tꞌan jini siete i tꞌan chajc colel c tsꞌijbun jini tsaꞌ bʌ i yʌlʌyob jini chajc tyac. Pero ti cubi ajtꞌan loqꞌuem bʌ ti panchan tsaꞌ bʌ i tiqꞌuiyon. Tiꞌ subeyon: Mach a tsictisan i sujmlel jini tsaꞌ bʌ i yʌlʌ jini siete tꞌan chajc. Maꞌ maꞌ tsꞌijbun ti jun. Cheꞌ tiꞌ subentiyon.

5 Jini pꞌʌtyʌl bʌ ajtroñel i chaꞌan Dios chꞌoyol bʌ ti panchan tsaꞌ bʌ quilʌ yaꞌ xat waꞌal yicꞌot juntsꞌijt i yoc ti lum, juntsꞌijt i yoc ti jaꞌ ti letsʌ i ñoj bʌ cꞌʌb.

6 Tiꞌ xucꞌle i tꞌan tiꞌ cꞌabaꞌ jini cuxul bʌ ti pejtyelel qꞌuin, tsaꞌ bʌ i mele chan yicꞌot i bʌl yicꞌot tiꞌ mele mulawil yicꞌot i bʌl yicꞌot tiꞌ mele colem jaꞌ yicꞌot i bʌl. Tiꞌ xucꞌle i tꞌan chaꞌan maꞌix jal mi quej i yujtyel jini muꞌ bʌ i yujtyel.

7 Ti bej queji ti tꞌan jini ajtroñel i chaꞌan Dios chꞌoyol bʌ ti panchan. Ti yʌlʌ: Cheꞌ mi cꞌotyel i yorojlel mi quejel i yuꞌtisan i trompeta jini sietejlel bʌ ajtroñel i chaꞌan Dios chꞌoyol bʌ ti panchan. Mi quejel i tsꞌʌctiyel jini tsaꞌ bʌ i wʌ ñaꞌtyʌ i chaꞌlen Dios, jini tsaꞌ bʌ i wʌ sube ajtroñelob i chaꞌan yicꞌot jini tsaꞌ bʌ i xiqꞌui yʌleꞌ Dios. Cheꞌ ti yʌlʌ jini pꞌʌtyʌl bʌ ajtroñel i chaꞌan Dios chꞌoyol bʌ ti panchan yaꞌ bʌ xat waꞌal ti colem jaꞌ yicꞌot ti lum.

8 Cheꞌ jini, jini ajtꞌan tsaꞌ bʌ cubi loqꞌuem bʌ ti panchan tiꞌ chaꞌ pejcʌyon. Tiꞌ subeyon: Cucu. Chꞌʌmʌ jini jamʌlix bʌ bʌlʌl bʌ jun am bʌ tiꞌ cꞌʌb jini ajtroñel i chaꞌan Dios chꞌoyol bʌ ti panchan yaꞌ bʌ xat waꞌal ti colem jaꞌ yicꞌot ti lum. Cheꞌ tiꞌ subeyon.

9 Cheꞌ jini, yaꞌ ti majliyon baꞌan jini ajtroñel i chaꞌan Dios chꞌoyol bʌ ti panchan. Tij cꞌajtibe chaꞌan i yʌqꞌueñon jini bʌlʌl bʌ saj jun. Jini tiꞌ subon: Chꞌʌmʌ. Cꞌuxu. Tsaj mi quejel a wubin ti a tiꞌ cheꞌ bajcheꞌ i tsajel i yaꞌlel chab. Pero chꞌaj mi quejel a wubin ti a ñʌcꞌ. Cheꞌ ti subentiyon.

10 Cheꞌ jini, tic chꞌʌmʌ jini bʌlʌl bʌ saj jun am bʌ tiꞌ cꞌʌb jini ajtroñel i chaꞌan Dios chꞌoyol bʌ ti panchan. Tij cꞌuxu. Tsaj ti cubi tic tiꞌ. Lajal i tsajel bajcheꞌ i yaꞌlel chab ti cubi. Pero cheꞌ ti ujti j cꞌuxeꞌ, chꞌaj ti cubi tic ñʌcꞌ.

11 Cheꞌ jini, jini ajtroñel i chaꞌan Dios chꞌoyol bʌ ti panchan tiꞌ subeyon: Wersa yom maꞌ chaꞌ subeꞌ pejtyelel i tꞌan Dios yaꞌ baꞌan cabʌl quixtyañujob am bʌ ti cabʌl pañimil tyac, yicꞌot baꞌan cabʌl yambʌ tꞌan tyac yicꞌot baꞌan cabʌl ñuc bʌ yumʌlob. Cheꞌ ti subenti Juan.