Chaꞌtiquilob muꞌ bʌ i yʌcꞌob ti cʌjñel Jesucristo
11
Joñon Juañon. Jiñʌch bajcheꞌ ti quilʌ cheꞌ bajcheꞌ tic ñajal. Ti aqꞌuentiyon juntsꞌijt jalʌl cheꞌ bajcheꞌ i wentyʌlel pꞌisonibʌl. Ti subentiyon: Tyejchen. Cucu. Pꞌisi jini templo baꞌ miꞌ chꞌujutisañob Dios yicꞌot pꞌisi jeꞌel i yajñib baꞌ mi pulel i majtyan Dios. Yicꞌot yom maꞌ tsiqueꞌ jaytiquilob muꞌ bʌ i chꞌujutisañob Dios yaꞌ ti templo.2 Pero mach yom maꞌ pꞌiseꞌ jini i pam templo am bʌ ti mal corral como tsaꞌix aqꞌuentiyob jini mach bʌ israelobic. Cꞌʌlʌ cuarenta y dos meses jiñob mi quejel i tyʌcꞌlañob, mi quejel i chꞌʌmob tiꞌ wenta jini lum i chaꞌan bʌ Dios.
3 Mi quejel c choqueꞌ majlel chaꞌtiquilob chaꞌan miꞌ subeñob quixtyañu jini com bʌ i ñaꞌtyañob. Jini chaꞌtiquilob lʌpʌlob i chaꞌan iꞌicꞌ bʌ i pislel chaꞌan i señʌjlel i chꞌʌjyemlel. Chʌꞌʌch mi quejel i chaꞌleñob cꞌʌlʌ mil doscientos sesenta qꞌuin. Cheꞌ ti yʌlʌ jini ajtꞌan.
4 Jini chaꞌtiquilob muꞌ bʌ i subeñob quixtyañujob bajcheꞌ yom miꞌ ñaꞌtyañob jiñobʌch cheꞌ bajcheꞌ chaꞌtyejc olivo tyeꞌ yubil yicꞌot chaꞌtsꞌijt i yajñib vela yubil yaꞌ bʌ waꞌal tiꞌ tyojel lac Yum. Lac Yum i yumʌch mulawil jeꞌel.
5 Mi an majch yom bʌ i tyʌcꞌlañob ili chaꞌtiquilob mi quejel i chocob loqꞌuel cꞌajc ti tiꞌ muꞌ bʌ quejel i puleꞌ ti junyajlel jini ajcontrajob. Jin chaꞌan mi an majch muꞌ bʌ i tyʌcꞌlañob chʌꞌʌch mi quejel i sajtyelob.
6 Jini chaꞌtiquilob ti aqꞌuentiyob i wersajlel i tꞌan ti Dios chaꞌan miꞌ lajmisan jaꞌal chaꞌan maꞌix mi ñumel cꞌʌlʌ cheꞌ chʌncolob i subeꞌ bajcheꞌ tiꞌ xiqꞌui yʌleꞌ Dios. An i wersajlel i tꞌan jeꞌel chaꞌan miꞌ pʌntisan jaꞌ ti chꞌichꞌ yicꞌot chaꞌan miꞌ tyʌcꞌlañob añoꞌ bʌ ti mulawil ti chʌ bʌ tyac jach yes bʌ i tyʌcꞌlʌntyel. Chʌꞌʌch an i wersajlel i tꞌan i chaꞌleñob cheꞌ bajcheꞌ jayajlel yomob i chaꞌleñob.
7 Pero cheꞌ mi yujtyel jini chaꞌtiquilob i luꞌ subeꞌ bajcheꞌ yom sujbic, i yum jini chꞌen mach bʌ lac tyajben i yebal mi quejel i loqꞌuel tyʌlel ti chꞌen. Mi quejel i contrajiñob. Mi quejel i ganarin. Mi quejel i tsʌnsañob.
8 Yaꞌ mi quejel i sʌtsꞌ cʌytyʌlob jiñi sajtyemobix bʌ chaꞌtiquil yaꞌ ti i callejlel Jerusalén, jini colem bʌ lum baꞌ ti jocꞌle ti cruz lac Yum. Ti lajoñel bʌ tꞌan mi yʌjlel jini lum ti Sodoma yicꞌot ti Egipto.
9 Maꞌix mi yʌcꞌob ti chꞌujñʌntyel. Cꞌʌlʌ ti ñumi uxpꞌej qꞌuin ti tyʌli xinqꞌuinil, quixtyañujob loqꞌuemoꞌ bʌ ti jujunchajp quixtyañu, ti jujunchajp tꞌan tyac, ti jujumpꞌej pañimil miꞌ chꞌuj qꞌuelob jini chaꞌtiquil chꞌujlelʌl tsaꞌ bʌ sʌtsꞌ cʌyleyob.
10 Wen cꞌajacñayob i yoj jini añoꞌ bʌ ti mulawil chaꞌan ti tsʌnsʌntiyob jini chaꞌtiquilob, como tyʌcꞌlaya ti yubiyob chaꞌan ti caj i tꞌan mach bʌ yom i yubiñob. Miꞌ melob qꞌuin. Miꞌ qꞌuextyʌbeñob i bʌ i majtyan. Wen tijicñayob como sajtyemix jini chaꞌtiquilob tsaꞌ bʌ subeyob bajcheꞌ yom i yʌqꞌuen i ñaꞌtyañob Dios.
11 Cheꞌ ñac ti ñumi uxpꞌej qꞌuin ti tyʌli xinqꞌuinil Dios tiꞌ chaꞌ cuxtisʌyob. Tiꞌ chaꞌ aqꞌue i chꞌujlel chaꞌan chaꞌ cuxtiyic jini chaꞌtiquilob. Ti chaꞌ tyejchiyob. Ti wen quejiyob ti bʌqꞌuen pejtyelel jini cuxuloꞌ bʌ tsaꞌ bʌ yilʌyob.
12 Jini chaꞌtiquilob ti yubiyob cꞌam bʌ ajtꞌan loqꞌuem bʌ ti panchan tsaꞌ bʌ yʌlʌ: Letsenla tyʌlel wʌꞌwʌꞌi. Cheꞌ ti subentiyob. Cheꞌ jini, ti letsiyob majlel ti mal tyocal cꞌʌlʌ ti panchan yaꞌ tiꞌ cantyʌlel i wut jini i contrajob.
13 Ti jim bʌ ora ti ñumi pꞌʌtyʌl bʌ i yujquel lum. Ti jili jumpejt loqꞌuem bʌ ti lujumpejt jini colem lum. Ti sajtiyob siete mil quixtyañujob chaꞌan ti ñumi yujquel lum. Yañoꞌ bʌ tiꞌ wen chaꞌleyob bʌqꞌuen. Ti wen queji i subob i ñuclel Dios. Chʌꞌʌch ti quilʌ cheꞌ bajcheꞌ tic ñajal. Cheꞌ ti yʌlʌ Juan.
14 Chʌꞌʌch ti ñumi jini chaꞌyajlelel bʌ wocol pero ora jach mi quej i tyʌlel yuxyajlelel bʌ wocol.
Sietejlel bʌ trompeta
15 Jini sietejlel bʌ ajtroñel i chaꞌan Dios chꞌoyol bʌ ti panchan tiꞌ yuꞌtisʌ i trompeta. Ti loqꞌui cꞌam bʌ ajtꞌan tyac yaꞌ ti panchan tsaꞌ bʌ yʌlʌyob:
Wale an tiꞌ wenta lac Yum Dios yicꞌot i Cristo chaꞌan miꞌ chaꞌlen yumʌl.
Mi quejel i chaꞌlen yumʌl ti pejtyel ora.
16 Jini veinticuatro ancianojob yaꞌ bʌ buchulob ti colem tyac bʌ i buchlib yaꞌ ti suttyʌlel Dios ti ñocleyob ti lum. Tiꞌ chꞌujutisayob Dios.
17 Ti yʌlʌyob:
C Yum Dios, jatyet machꞌʌ baꞌan i pꞌisol a pꞌʌtyʌlel,
añet bʌ wale iliyi, añet bʌ cꞌʌlʌ ti tyejchibal mulawil, añet bʌ cꞌʌlʌ ti tyal tyo bʌ ora.
Mi lojon c subeñet wocox a wʌlʌ
chaꞌan ti a tsictisʌ ñuc bʌ a pꞌʌtyʌlel.
Tsaꞌix a chꞌʌmʌ a yumintyel.
18 Quixtyañujob loqꞌuemoꞌ bʌ ti pejtyelel mulawil ti michꞌqꞌueleyetyob.
Pero wale tsaꞌix cꞌoti yorojlel mi quejel a wʌqꞌuen i xotꞌob i mul.
Tsaꞌix cꞌoti yorojlel mi quejel a melob jini sajtyemoꞌ bʌ.
Mi quejel a wʌqꞌueñob i tyojol pejtyelel jini ajtroñelob a chaꞌan tsaꞌ bʌ subeyob quixtyañu bajcheꞌ a wom miꞌ ñaꞌtyañob,
yicꞌot ochemoꞌ bʌ ti a tꞌan yicꞌot pejtyelelob muꞌ bʌ i qꞌuelet ti ñuc
jiñi añoꞌ bʌ i ñuclel, yicꞌot machꞌʌ baꞌañob i ñuclel.
Tsaꞌix cꞌoti i yorojlel mi quejel i ñusañob wocol ti xotꞌmulil ti pejtyelel jini tsaꞌ bʌ i tyʌcꞌlʌyob quixtyañujob yicꞌot tsaꞌ bʌ i yʌqꞌueyob i yotsañob i mul.
Cheꞌ ti yʌlʌyob jini veinticuatro ancianojob.
19 Ti jajmi i templo Dios yaꞌ ti panchan. Yaꞌ ti qꞌuejli ti mal templo i cajajlel jini trato bʌ i tꞌan Dios. Yaꞌan ti lejmel chajc yicꞌot tꞌan tyac yicꞌot i tꞌan chajc yicꞌot yujquel lum yicꞌot pꞌʌtyʌl bʌ tyuñijaꞌ.