2 Cʌñʌtyʌbil i chaꞌan i yalobil jini xꞌixic. Tiꞌ chaꞌle oñel cheꞌ muꞌ ti bajqꞌuel. Chʌncol i wen ubin wocol como i yorojlel mi quejel i chꞌoc an i yalobil.

3 Cheꞌ jini ti tsictiyi yambʌ i señʌjlel yaꞌ ti chan. An juncojt bʌbʌqꞌuen bʌ animal dragón bʌ i cꞌabaꞌ. Tsꞌityaꞌ lajal yicꞌot bajcheꞌ lucum pero an i yoc bajcheꞌ ajin. Yoque colem chʌchʌc bʌ animal. An siete i jol yicꞌot jumpꞌej corona ti jujumpꞌej i jol. An diez i xulub.

4 Cꞌam tiꞌ nijcʌ i ñej chaꞌan miꞌ jatsꞌeꞌ junchajp loqꞌuem bʌ ti uxchajp ecꞌ am bʌ ti chan. Ti yajli tyac jini ecꞌ ti lum. Jini dragón bʌ animal ti waꞌle yaꞌ tiꞌ tyojel jini xꞌixic muꞌ bʌ quejel i chꞌoc an i yalobil chaꞌan miꞌ waꞌ cꞌuxben i yalobil cheꞌ miꞌ chꞌoc an.

5 Tiꞌ chꞌocʌ aloꞌ bʌ i yalobil muꞌ bʌ i chaꞌlen yumʌl ti pejtyelel mulawil tiꞌ wersajlel i tꞌan. Ti waꞌ pʌjyi letsel jini i yalobil yaꞌ baꞌan Dios cꞌʌlʌ yaꞌ tiꞌ buchlib Dios.

6 Jini xꞌixic ti majli ti putsꞌel yaꞌ ti tyʌquin bʌ joch lum baꞌ tiꞌ wʌ chajpʌbe Dios yajñib chaꞌan Dios miꞌ cʌñʌtyan cꞌʌlʌ mil doscientos sesenta qꞌuin.

7 Cheꞌ jini ti queji yoque bʌbʌqꞌuen bʌ periyal yaꞌ ti chan. An juntiquil ajtroñel i chaꞌan Dios chꞌoyol bʌ ti panchan Miguel bʌ i cꞌabaꞌ. Ñuc i yeꞌtyel. Jini yicꞌot cabʌl ajtroñelob i chaꞌan Dios chꞌoyol bʌ ti panchan am bʌ tiꞌ wenta Miguel tiꞌ chaꞌleyob periyal yicꞌot jini dragón bʌ animal. Jini dragón bʌ animal yicꞌot pejtyelelob añoꞌ bʌ tiꞌ wenta tiꞌ wen chaꞌleyob wersa.

8 Pero machꞌan tiꞌ ganari jini dragón bʌ animal yicꞌot jini am bʌ tiꞌ wenta. Cheꞌ jini maꞌix chʌc an i yajnib yaꞌ ti chan.

9 Chʌꞌʌch ti chojqui loqꞌuel ti chan jini dragón bʌ animal. Jini dragón bʌ animal jiñʌch jini oniyix bʌ lucum muꞌ bʌ i pejcʌntyel ti chaꞌchajp bʌ i cꞌabaꞌ jiñʌch xiba yicꞌot Satanás. Jiñʌch jini muꞌ bʌ i lotin ti pejtyelel quixtyañu añoꞌ bʌ ti mulawil. Ti chojqui jubel cꞌʌlʌ ti lum jini dragón bʌ animal yicꞌot ti pejtyelel jini añoꞌ bʌ tiꞌ wenta.

10 Cheꞌ jini ti cubi cꞌam bʌ ajtꞌan loqꞌuem bʌ ti panchan tsaꞌ bʌ yʌlʌ: Wale tsaꞌix cotyʌntiyob quixtyañujob. Tsaꞌix tsictiyi i pꞌʌtyʌlel Dios. Mi quejel i yoque chaꞌlen yumʌl lac Dios. Miꞌ tsictiyel i wersajlel i tꞌan i Cristo. Como tsaꞌix chojqui jubel jini muꞌ bʌ i beleꞌ jopꞌben i mul lac hermañujob ti qꞌuinil ti acꞌbʌlel yaꞌ tiꞌ tyojel lac Dios.

11 Jini lac hermañujob tiꞌ jotbe i pꞌʌtyʌlel xiba chaꞌan tiꞌ chꞌichꞌel Cristo muꞌ bʌ i pejcʌntyel ti i Tiñʌmeꞌ Dios yicꞌot chaꞌan bajcheꞌ tiꞌ subeyob majlel i tꞌan. Como aunque mi quejel i tsʌnsʌntyelob maꞌan ti más mulʌ i bajñel i cuxtyʌlel cheꞌ bajcheꞌ miꞌ mulan i chaꞌliben i troñel Cristo.

12 Tijicnisan laꞌ pusicꞌal ti laꞌ pejtyelel añet bʌ la ti panchan. Pero yoque pꞌumpꞌuñetla añet bʌ la ti mulawil. Como ñoj cabʌl i michꞌlel xiba tsaꞌ bʌ chojqui jubel yaꞌ baꞌ añetla. Como yujil isujm xiba maꞌix jal mi quejel i chaꞌlen i troñel yaꞌ baꞌ añetla.

13 Jini dragón bʌ animal, cheꞌ ñac tiꞌ ñaꞌtyʌ chaꞌan ti chojqui jubel ti mulawil, ti queji i yajnisan majlel jini xꞌixic tsaꞌ bʌ chꞌocʌ aloꞌ bʌ i yalobil.

14 Pero tsaꞌix aqꞌuenti chaꞌpꞌej colem bʌ i wichꞌ jini xꞌixic cheꞌ bajcheꞌ i wichꞌ colem bʌ águila chaꞌan chꞌujbi i chaꞌlen wejlel majlel ti ñajt bʌ i yajnib ti tyʌquin bʌ joch lum baꞌ mi quejel i cʌñʌtyʌntyel cꞌʌlʌ uxpꞌej jab ti tyʌli xinil jabil chaꞌan maꞌix miꞌ tyʌcꞌlʌntyel ti dragón bʌ animal.

15 Ti quilʌ cheꞌ bajcheꞌ tic ñajal jini dragón bʌ animal. Tiꞌ xejtyʌ loqꞌuel cabʌl jaꞌ tiꞌ tiꞌ. Cheꞌ bajcheꞌ juntsꞌijt pꞌʌtyʌl bʌ jaꞌ yilal ti quilʌ. Tiꞌ choco majlel jaꞌ yaꞌ tiꞌ pat jini xꞌixic chaꞌan ochic ti butꞌ jaꞌ i wentyʌlel, jini xꞌixic.

16 Pero jini lum tiꞌ cotyʌ jini xꞌixic. Tiꞌ tsijli jiñi lum. Jini jaꞌ tsaꞌ bʌ choco loqꞌuel tiꞌ tiꞌ jini dragón bʌ animal ti ochi yaꞌ baꞌ ti tsijli jini lum.

17 Cheꞌ jini, jini dragón bʌ animal ti ñoj michꞌʌ yicꞌot jini xꞌixic. Ti majli i chaꞌlen periyal yicꞌot yambʌ i jiñʌjlel jini xꞌixic. Jiñobʌch jini muꞌ bʌ i chꞌujbiñob i xicꞌojel Dios muꞌ bʌ i xucꞌchocoñob i bʌ tiꞌ tꞌan Jesucristo.