Bajcheꞌ mi lac jotben i pꞌʌtyʌlel jini machꞌʌ wen am bʌ ti mulawil
5
Yalobilʌch Dios majchical jach muꞌ bʌ i chꞌujbin Jesús yajcʌbil bʌ i chaꞌan Dios. Jini muꞌ bʌ i pꞌuntyʌben i tyat mux i pꞌuntyʌbeñob i yalobilob jeꞌel.2 Como la cujil isujm chʌncol lac pꞌuntyañob pejtyel i yalobiloꞌ bʌ Dios mi chʌncol lac pꞌuntyan Dios mi mux lac jacꞌ lac xicꞌol ti Dios.
3 Mi chʌncol lac pꞌuntyan Dios mux lac chꞌujbin lac xicꞌol ti Dios cheꞌ jini. La cujil machꞌan wocol ti chꞌujbintyel.
4 Pejtyelel jini yalobilob Dios miꞌ ganarin i pꞌʌtyʌlel machꞌʌ wen am bʌ ti mulawil. Cheꞌ tsaꞌix lac chꞌujbi Dios mi la cʌqꞌuentyel lac pꞌʌtyʌlel chaꞌan mi lac ganarin i pꞌʌtyʌlel machꞌʌ wen.
5 Jini muqꞌuix bʌ i chꞌujbin i Yalobilʌch Dios jini Cristo, miꞌ ganarin i pꞌʌtyʌlel machꞌʌ wen ti mulawil.
Tꞌan muꞌ bʌ tsictisan chaꞌan Yalobilʌch Dios jini Jesús
6 Jesucristo tsajni wʌꞌ ti mulawil. Ti tsictiyi Jesucristojʌch chaꞌan ti jaꞌ cheꞌ ñac tiꞌ chꞌʌmʌ jaꞌ, chaꞌan tiꞌ chꞌichꞌel cheꞌ ñac ti beque i chꞌichꞌel. Mach ti jaꞌic jach pero ti jaꞌ yicꞌot tiꞌ chꞌichꞌel ti tsictiyi mi Jesucristojʌch. Chʌꞌʌch jini Chꞌujul bʌ i Chꞌujlel Dios mi yʌleꞌ jeꞌel. Como yʌlo i sujmlel miꞌ subeꞌ.
7 Uxchajb tꞌan ti panchan muꞌ bʌ pʌseꞌ mi Jesucristo. Jiñʌch i tꞌan Dios lac Tyat, yicꞌot jeꞌel Jesucristo muꞌ bʌ i pejcʌntyel ti Tꞌan yicꞌot jeꞌel Chꞌujul bʌ i Chꞌujlel. Uxchajp i pꞌʌtyʌlel pero juntiquil jach Dios.
8 Uxchajp ti mulawil muꞌ bʌ i pʌs i sujmlel mi Jesucristojʌch. Jiñʌch i chaꞌan Chꞌujul bʌ i Chꞌujlel, jini jaꞌi, jini i chꞌichꞌel. Lajalʌch mi loqꞌuel i sujmlel ti uxchajplel.
9 Chʌncol lac chꞌujbibeñob i tꞌan quixtyañu wʌꞌwʌꞌi pero más pꞌʌtyʌl i tꞌan Dios chaꞌan lac chꞌujbin. Dios miꞌ subeñonla tiꞌ tꞌan chaꞌan i Yalobilʌch Dios jini Cristo.
10 Jini muꞌ bʌ i chꞌujbin Yalobil Dios miꞌ ñaꞌtyan i sujmlel tiꞌ pusicꞌal. Jini machꞌʌ baꞌan miꞌ chꞌujbin chʌncol i cuyeꞌ ti xlot Dios como machꞌan miꞌ chꞌujbin tsaꞌ bʌ yʌlʌ Dios chaꞌan Yalobilʌch Dios jini Jesús.
11 Jiñʌch tsaꞌ bʌ ajli jiñʌch iliyi: Tsaꞌix i yʌqꞌueyonla Dios laj cuxtyʌlel machꞌʌ yujil jilel. Yaꞌ tyʌlem tiꞌ Yalobil Dios ili laj cuxtyʌlel.
12 Cheꞌ an Yalobil Dios ti lac pusicꞌal an laj cuxtyʌlel machꞌʌ yujil jilel. Jini machꞌʌ baꞌan i Yalobil Dios tiꞌ pusicꞌal machꞌan i cuxtyʌlel machꞌʌ yujil jilel.
Cojix bʌ tꞌan tyac
13 Mic tsꞌijbubeñetla ili tꞌan, jatyetla, muꞌ bʌ laꞌ chꞌujbin i Yalobil Dios, chaꞌan mi laꞌ ñaꞌtyan anix laꞌ cuxtyʌlel machꞌʌ yujil jilel.
14 Cheꞌ mi laj cꞌajtiben chaꞌan Dios miꞌ mel bajcheꞌ yom, la cujilʌch isujm miꞌ ñʌchꞌtyʌbeñonla lac tꞌan cheꞌ an chʌ bʌ mi laj cꞌajtiben.
15 Cheꞌ ñaꞌtyʌbilix lac chaꞌan chʌncol i ñʌchꞌtyʌbeñonla lac oración, la cujil isujm mux i yʌqꞌueñonla muꞌ bʌ laj cꞌajtiben.
16 Mi ti la quilʌ juntiquil hermañu chʌncox bʌ i tyaj i mul mi mach jinic muꞌ bʌ i yʌcꞌ ti sajtyel, yom mi laj cꞌajtiben Dios ti oración chaꞌan miꞌ ñusʌben i mul chaꞌan mi yʌqꞌuen i cuxtyʌlel. An mulil muꞌ bʌ i yʌcꞌonla ti sajtyel. Jin chaꞌan mi ti la quila juntiquil hermañu chʌncox i tyaj i mul muꞌ bʌ yʌcꞌ ti sajtyel machꞌan mic xiqꞌuetla laꞌ tyajeꞌ ti oración.
17 Pejtyel machꞌʌ wen miꞌ chaꞌlen luꞌ mulilʌch. Pero an mulil machꞌʌ baꞌan mi yʌcꞌ ti sajtyel.
18 La cujilʌch isujm mi lac Tyatyʌch Dios machꞌan mi lac chʌc otsan lac mul cheꞌ bajcheꞌ i tyʌlel ti lac chaꞌle wajali como yalobilonla Dios. Mux i cʌñʌtyañonla. Jini xiba mach chꞌujbi i tyʌcꞌlañonla.
19 La cujilʌch isujm i yalobilonla Dios. Pero pejtyel mach bʌ i yalobilic Dios añob tiꞌ pꞌʌtyʌlel xiba.
20 Pero la cujil isujm tsajni Yalobil Dios chaꞌan mi yʌqꞌueñonla lac ñaꞌtyʌbal chaꞌan mi laj cʌñeꞌ jini yoque Isujm bʌ. Añonla ti yoque jini i sujmlel bʌ Dios. Jiñʌch Yalobil Dios jini jesucristo. Jiñʌch jini yʌlo i sujmlel bʌ Dios. Jiñʌch laj cuxtyʌlel machꞌʌ yujil jilel.
21 Pꞌuntyʌbilet bʌ la calobilob, xucꞌuletla yom chaꞌan machꞌan mi laꞌ chꞌujutisan jini muꞌ bʌ i lolon qꞌuelob tiꞌ diosob. Amén.