Cʌntisa chaꞌan Chꞌujul bʌ i Chꞌujlel Dios yicꞌot i contra Dios
4
Pꞌuntyʌbilet bʌ la hermañujob, mach yom laꞌ chꞌujbin majchical jach muꞌ bʌ i lolon yʌleꞌ tyʌlem ti Chꞌujul bʌ i Chꞌujlel Dios i cʌntisa. Yom wen xucꞌuletla chaꞌan mi laꞌ ñaꞌtyan mi yoque i chaꞌañʌch Chꞌujul bʌ i Chꞌujlel Dios mi mach i chaꞌanic Dios como wʌꞌ ti mulawil an cabʌl xlot bʌ ajcʌntisa muꞌ bʌ i lolon aleꞌ tyʌlem i cʌntisa ti Dios.2 Mic subeñetla bajcheꞌ mi laꞌ ñaꞌtyan mi melel i chaꞌañʌch Chꞌujul bʌ i Chꞌujlel Dios jini ajcʌntisa. Pejtyel majchical jach mi yʌleꞌ ti tyʌli ti yoque i bʌcꞌtyal Jesucristo mi cheꞌ mi yʌl, añʌch Chꞌujul bʌ i Chꞌujlel Dios yicꞌot jini ajcʌntisa, cheꞌ jini.
3 Pero mi mach cheꞌic mi yʌleꞌ, mi machꞌan mi yʌleꞌ ti tsictiyi Jesús tiꞌ bʌcꞌtyal machꞌan i chaꞌan jini Chꞌujul bʌ i Chꞌujlel Dios jini ajcʌntisa. Ajcontra Cristojʌch cheꞌ jini. Tsaꞌix laꞌ wubi mux quej i tyʌlel. Wale anix wʌꞌ ti mulawil jini ajcontra Cristo.
4 Jatyetla, calobilob, i chaꞌañetla Dios. Tsaꞌix laꞌ ganari i pꞌʌtyʌlel jini ajcontra Cristo como más pꞌʌtyʌl Dios am bʌ ti jatyetla bajcheꞌ jini xiba am bʌ ti mulawil.
5 Como jini ajcʌntisajob i chaꞌañʌch mulawil. Jin chaꞌan miꞌ tyajob ti tꞌan jini am bʌ ti mulawil. Jini añoꞌ bʌ ti mulawil miꞌ wen ñʌchꞌtyʌbeñob i tꞌan.
6 Joñonla i chaꞌañonla Dios. Mi mux i ñʌchꞌtyʌbeñonla i tꞌan Dios jini ajcʌntisa cheꞌ mi lac suben, tsiquil i chaꞌan Dios cheꞌ jini. Pero mi machꞌan miꞌ ñʌchꞌtyʌbeñonla, mach i chaꞌanic Dios. Cheꞌ jini mi quej laj cʌn mi yaꞌ tyʌlem ti Dios o mi lot jach bʌ ajcʌntisa.
Yaꞌ tyʌlem pꞌuntyaya ti Dios
7 Pꞌuntyʌbilet bʌ la hermañujob, jin chaꞌan, yom mi lac pꞌuntyan lac bʌ como yaꞌ tyʌlem ti Dios pejtyelel lac pꞌuntyaya. Pejtyelel jini muꞌ bʌ i pꞌuntyan i piꞌʌl i yalobilʌch Dios. Cʌñʌlix i chaꞌan Dios.
8 Majchical jach machꞌʌ baꞌan miꞌ pꞌuntyan i piꞌʌl mach i cʌñʌ Dios cheꞌ jini. Como yaꞌ tyʌlem pꞌuntyaya ti Dios.
9 Dios tiꞌ wen pʌsꞌeyonla bajcheꞌ miꞌ pꞌuntyañonla cheꞌ ñac tiꞌ choco tyʌlel cojach bʌ i Yalobil wʌꞌ ti mulawil chaꞌan mi lac tyaj laj cuxtyʌlel tiꞌ Yalobil.
10 Jini yoque pꞌuntyaya jiñʌch cheꞌ ñac Dios tiꞌ pꞌuntyʌyonla. Max tyo yoque pꞌuntyayajic cheꞌ ñac ti lac pꞌuntyʌ Dios joñonla. Dios tiꞌ choco tyʌlel cojach bʌ i Yalobil chaꞌan i sajtyel chaꞌan i xotꞌbeñonla lac mul.
11 Pꞌuntyʌbilet bʌ la hermañujob, cheꞌ bajcheꞌ tiꞌ pꞌuntyʌyonla Dios chʌꞌʌch yom mi lac pꞌuntyan lac bʌ jeꞌel.
12 Maꞌan majch ti yilʌ Dios pero cheꞌ mi lac pꞌuntyan lac bʌ wʌꞌʌch an la quicꞌot Dios cheꞌ jini. Mi lac chaꞌlen pꞌuntyaya cheꞌ bajcheꞌ yom.
13 La cujilʌch isujm añonla ti Dios. Dios an ti joñonla como ti yʌqꞌueyonla Chꞌujul bʌ i Chꞌujlel.
14 Ti lojon quilʌbe i Yalobil. Chʌncol c subeñet lojon Dios lac Tyat tiꞌ choco tyʌlel chaꞌan miꞌ cotyañob pejtyelel añoꞌ bʌ ti mulawil.
15 Majchical jach muꞌ bʌ i chꞌujbin, muꞌ bʌ i yʌleꞌ i Yalobilʌch Dios jini Jesús, mi yajñel ti Dios. Dios mi yajñel ti jini quixtyañu.
16 Tsaꞌix lac chꞌujbi yaꞌ tyʌlem pꞌuntyaya ti Dios. Cheꞌ mic pꞌuntyan lac bʌ añonixla ti Dios. Mi la cajñel ti Dios. Dios mi yajñel ti joñonla.
17 Cheꞌ añonla ti Dios mi lac chaꞌlen pꞌuntyaya cheꞌ bajcheꞌ yom. Cheꞌ jini, maꞌix quisintic mi la cubin cheꞌ mi laj cꞌotyel yaꞌ tiꞌ tyojel Dios tiꞌ qꞌuinil melojel como mi lac chaꞌlen pꞌuntyaya cheꞌ wʌꞌ añonla ti mulawil cheꞌ bajcheꞌ miꞌ chaꞌlen pꞌuntyaya Jesucristo.
18 Cheꞌ an majch miꞌ pꞌuntyañonla maꞌix mi lac bʌcꞌñan cheꞌ jini. Mi luꞌ lajmel pejtyel lac bʌqꞌuen chaꞌan chʌncol i pꞌuntyañonla. Mi an tyo lac bʌqꞌuen jiñʌch chaꞌan chʌncol tyo lac bʌcꞌñan lac xotꞌ lac mul. Mi chʌncolon tyo la ti bʌqꞌuen max tyo mi lac yoque chaꞌlen pꞌuntyaya.
19 Mi lac pꞌuntyan Dios chaꞌan ñaxan tiꞌ pꞌuntyʌyonla.
20 Mi an majch mi yʌl: Chʌncol c pꞌuntyan Dios, cheꞌen, pero mi chʌncol tyo i tsꞌaꞌlen i piꞌʌl, lot jach mucꞌ. Como mi maꞌan miꞌ pꞌuntyan i piꞌʌl cheꞌ mero yaꞌan tiꞌ tꞌejl jinic tyo Dios mach chꞌujbi i pꞌuntyan como machꞌan mi yilan tiꞌ wut.
21 Dios ti yʌcꞌonla ili xicꞌol chaꞌan jini muꞌ bʌ i pꞌuntyan Dios yom i pꞌuntyan i piꞌʌlob jeꞌel.