1 Yalobilob Dios
3
Cheꞌ jini ñaꞌtyanla ñoj cabʌl miꞌ pꞌuntyañonla Dios lac Tyat. Mi lac pejcʌntyel ti yalobilonla Dios. Como melelʌch i yalobilonla. Jini añoꞌ bʌ ti mulawil machꞌan miꞌ cʌñob Dios lac Tyat. Jin chaꞌan maꞌ miꞌ ñaꞌtyañob i sujmlel mi i yalobilonla Dios.2 Pꞌuntyʌbilet bʌ la hermañujob, i yalobilonixla Dios. Pero max tyo ñoj tsiquil ti ili ora bajcheꞌ mi quej la cajñel. Pero la cujilʌch isujm cheꞌ mi chaꞌ tyʌlel Cristo mux lac yoque qꞌueleꞌ. Cheꞌ jini lajal bajcheꞌ Cristo mi quejel la cajñel.
3 Pejtyelel chʌncol bʌ i pijtyan Jesucristo chʌncolix i chʌc sʌc isan i bʌ cheꞌ bajcheꞌ yʌlo sʌc Cristo.
4 Pero jini i tyʌlelʌch bʌ am bʌ ti mulil chʌncol i ñusan i xicꞌol ti Dios. Mulilʌch cheꞌ mi lac ñusʌben i xicꞌojel Dios.
5 La cujil isujm ti tyʌli Jesucristo wʌꞌ ti mulawil chaꞌan miꞌ locꞌsʌbeñon lac mul. La cujil isujm jeꞌel mach sajlic an i mul Jesucristo.
6 Pejtyelel muꞌ bʌ i yajñelob ti Cristo machꞌanix lajal miꞌ yotsan i mul cheꞌ bajcheꞌ i tyʌlel tiꞌ chaꞌle wajali. Mi chʌncol tyo i chʌc otsan i mul machꞌan miꞌ chꞌujbin Cristo che jini.
7 Calobilob, mach yom lotintiquetla. Mi weñʌch mi laꞌ chaꞌlen, tyojix añetla cheꞌ bajcheꞌ tyojʌch Jesucristo.
8 Pero jini i tyʌlelʌch bʌ miꞌ chaꞌlen mulil cꞌʌlʌ wajali i chaꞌañʌch xiba como jini xiba cꞌʌlʌ tiꞌ tyejchibal miꞌ chaꞌlen mulil. Jin chaꞌan ti tyʌli i Yalobil Dios chaꞌan miꞌ jisʌben i chaꞌlibal xiba.
9 Mi junticlequic yalobilix bʌ Dios maꞌix bej lajal mi yotsan i mul bajcheꞌ tiꞌ chaꞌle wajali como anix i cuxtyʌlel tiꞌ pusicꞌal tsaꞌ bʌ aqꞌuenti ti Dios. Mach chꞌujbi i chʌc yajñel ti mulil bajcheꞌ i tyʌlel tiꞌ chaꞌle wajali como i yalobilʌch Dios.
10 Tsiquilʌch majchqui i yalobil Dios majchqui i yalobil xiba. Mach i chaꞌanic Dios jini machꞌʌ baꞌan miꞌ chaꞌlen chʌ bʌ tyoj, machꞌʌ baꞌan miꞌ pꞌuntyan i piꞌʌlob.
Laꞌ lac pꞌuntyan lac bʌ
11 Jini tꞌan tsaꞌ bʌ laꞌ wubi cꞌʌlʌ cheꞌ ñac ti laꞌ wubi i tꞌan Dios mi yʌleꞌ yom mi lac pꞌuntyan lac bʌ.
12 Mach yom mi lac chaꞌlen bajcheꞌ tiꞌ chaꞌle Caín como i chaꞌañʌch xiba. Tiꞌ tsʌnsʌ i yijtsꞌin jini Caín. ¿Chucoch tiꞌ tsʌnsʌ? Tiꞌ tsʌnsʌ i yijtsꞌin chaꞌan ti caj wen tiꞌ chaꞌle pero mach wen tiꞌ chaꞌle Caín.
13 Jin chaꞌan, hermañujob, cheꞌ miꞌ tsꞌaꞌleñetla jini añoꞌ bʌ ti mulawil mach laꞌ pensalin como i tyʌlelʌch.
14 Cheꞌ mi lac pꞌuntyan la quermañujob tsiquil colemonixla tiꞌ pꞌʌtyʌlel mulil muꞌ bʌ i yʌcꞌonla ti sajtyel. Anix laj cuxtyʌlel. Pero jini machꞌʌ baꞌan miꞌ pꞌuntyan i piꞌʌlob cꞌʌlʌ sajtyem tyo yubil.
15 Majchical jach miꞌ tsꞌaꞌlen i piꞌʌlob ajtsʌnsajʌch cheꞌ jini. La cujilʌch isujm jini ajtsʌnsa machꞌan i cuxtyʌlel machꞌʌ yujil jilel.
16 Cheꞌ ñac ti yʌcꞌʌ i bʌ ti sajtyel Jesucristo chaꞌañonla, ti laj cʌñʌ pꞌuntyaya. Wale yom mi la cʌcꞌ lac bʌ ti sajtyel chaꞌan i wenlel la quermañujob jeꞌel.
17 Mi an juntiquil wen an chʌ bʌ an i chaꞌan, mi ti yilʌ juntiquil hermañu machꞌʌ baꞌan chʌ bʌ an i chaꞌan mi maꞌ miꞌ cotyan, ¿chʌncol ba i pꞌuntyan Dios cheꞌ jini? Maꞌan mi pꞌuntyan Dios tiꞌ pusicꞌal.
18 Calobilob, mach pꞌuntyaya chʌncolonla cheꞌ ti lac tiꞌ jach mi la cʌleꞌ pero melelʌch chʌncol lac chaꞌlen pꞌuntyaya cheꞌ mi laj cotyan yañoꞌ bʌ.
Machꞌan lac bʌqꞌuen tiꞌ tyojlel Dios
19 Mi chʌꞌʌch mi lac chaꞌlen pꞌuntyaya mi quej laj cʌñeꞌ mi añonla ti i sujmlel. Machꞌanix mi lac bʌcꞌñan Dios cheꞌ añonla tiꞌ tyojlel.
20 Pero mi chʌncol lac chaꞌ lolon pensalin ti lac pusicꞌal an tyo lac mul mach wen lac pensal cheꞌ jini. Mi chʌꞌʌch mi lac ñaꞌtyan, jinic tyo Dios mach muculic tiꞌ wut. Más ñumen ñuc Dios. Dios luꞌ yujilʌch isujm.
21 Pꞌuntyʌbilet bʌ la hermañujob, mi la cujilʌch isujm mi machꞌan mi bajñel al lac pusicꞌal mi an lac mul machꞌanic mi lac bʌcꞌñan Dios cheꞌ añonla tiꞌ tyojlel.
22 Cheꞌ jini cheꞌ an chʌ bʌ mi laj cꞌajtin ti oración mux i yʌqꞌueñonla cheꞌ jini. Como chʌncox lac chꞌujbiben cheꞌ bajcheꞌ miꞌ xicꞌonla. Chʌncox lac meleꞌ muꞌ bʌ i mulan.
23 Jiñʌch i xicꞌbal: Yom mi lac chꞌujbin Yalobil. Jiñʌch Jesucristo. Cheꞌ jeꞌel yom mi lac pꞌuntyan lac bʌ cheꞌ bajcheꞌ tiꞌ subeyonla.
24 Jini muꞌ bʌ i jacꞌ i xicꞌbal Dios mi wen ajñel ti Dios. Cheꞌ jeꞌel Dios mi yajñel tiꞌ pusicꞌal. La cujil isujm mi yajñel ti joñonla Dios como mi lac ñaꞌtyan chaꞌan ti caj Chꞌujul bʌ i Chꞌujlel tsaꞌ bʌ aqꞌuentiyonla.