Nuñerepa Jo'yaohua'i Peocohua'i
5
Jo'yaohua'i peocohua'i pa'ija̱'cohua'i a'ë caquë Cristopi sa̱i de'huapi.
Ja̱je pa'iye sëte jo'yaohua'i peocohua'i pa'iyere pa'ijë̱'ë,
cui'naohua'ipi cua̱ñese'ere neñu'u cajë yo'ojë jo'yaohua'i pa'iyena po̱nëma'pë pa'ijë̱'ë.
2 Asajë̱'ë,
yë'ë Pablopi cayë,
mësarute.
Mësarupi ca̱'ni tëaye pa'iji cajë yo'ocohua'i pa'ito,
Cristo yo'o do'i mësarute co̱caiye peoji.
3 Ti̱jupë ca co̱ñe yëyë,
ca̱'nihuë tëa cua̱ñosiquë pani si'aye Moisés cua̱ñese'e cayere yo'oye pa'iji.
4 Ja̱je pa'ina,
mësaru Moisés cua̱ñese'ere,
nuñe pa'icohua'i de'oñu'u cajë,
yo'ojë pa'icohua'ipi,
Cristore hua saijë cui'ne Maija'quë mësarute oiye yo'oyere peocohua'i de'ohuë.
5 Ja̱je pa'ina,
mai cato Maija'quë joyoja̱'a Maija'quë maire necai ja̱'ñere cuasa do'ipi uteyë,
nuñerepa de'ocohua'i pa'ija̱'cohua'i a'ë,
cajë.
6 Ja̱je pa'ina,
maipi Cristo Jesús ja̱'re tsioni pa'ito ca̱'ni tëaye cui'ne pa̱ñe co̱caiye peoye a'ë.
Ja̱je pa'ina,
maipi necaiquëre pare i̱te cuasajëna,
ja̱ cuasayepi pa̱ire oicohua'ire necaina,
pa'iye a'ë,
do'i quë'ye.
7 Mësaru de'oye yo'ojë paë'ë.
¿Ja̱je pa'isicohua'ire nepi mësarute nuñerepa cocare yo'oma'pë ca ta̱to̱re'ni?
8 Ja̱ caye cato Maija'quë mësarute soisiquë tse̱ peoji.
9 Ja̱je pa'ina,
case'e pa'iji,
a'ri o'sa së̱pëpi huajëcona co̱'merena si'a së̱pë o'sa huesëyeje̱ pa'iji.
10 Ja̱je pa'ina,
Ëjaëpi mësarute co̱caina,
ti̱ñe pa'ye cuasaye paja̱'cohua'i a'ë cuasayë.
Ja̱je pa'iquëta'are mësarute jo̱sa ca co̱'me huesoquëre cato Maija'quëpi si'seja̱'quë api,
i̱quei pa'itoje̱.
11 Ja̱je pa'ina,
Maija'quë do'ijë,
yë'ëpi ja̱ yë'ta'a ca̱'ni tëayere pa'iji ye'yaquë pa'ito,
judío pa̱i huajo yëye pa̱ra'huë.
Ja̱je yo'oye pani Cristo cruz ju̱'isi cocapi sa̱ñope i̱ohua'ire yo'oye peora'pi.
12 Mësarute jo̱sa ca co̱'me huesoroja̱icohua'ipi,
¡i̱ohua'ija̱'a co'ye te'ere papi peo hue̱'ña tëasicohua'i pa'itota'a de'oji!
13 Mësaru cato Maija'quë do'ijë jo'ya nesicohua'i peoyë.
Coa de'oye pa'ija̱'cohua'ini soisicohua'i a'ë.
Ja̱je pa'ina,
ë̱seye peo do'ire ca̱pë yëyere yo'oma'pë pa'ijë̱'ë.
Coa ai jerepa pa̱ire oijë,
sa̱'ñe de'oye necaijë pa'ijë̱'ë.
14 Ja̱je pa'ina,
si'aye Moisés cua̱ñese'e iye cayena to̱meji:
“Më'ëja'a co'ye oiyeje̱ pa'ye oijë̱'ë,
yecohua'i.”
Ja̱ cayere yo'oni si'aye cua̱ñese'ere sehuo ti̱'añë.
15 Ja̱je pa'iquëta'are mësarupi sa̱'ñe se co'aye cajë cui'ne sa̱'ñe cue'cuejë yo'oni,
sa̱'ñe a̱ni huesëyeje̱ pa'ye yo'ojë caraja̱ija'cohua'i a'ë,
de'hua ñajë pa'ijë̱'ë.
Ca̱pë Yëye Cui'ne Maija'quë Joyo Pa'iye
16 Cayë,
mësarute.
Maija'quë joyo cuayepi pa'ijë̱'ë.
Ja̱je pa'ijë mësaru ca̱pë yëye yo'oye pa̱ja'cohua'i a'ë.
17 Ja̱je pa'ina,
pa̱ise'e yëyepi Maija'quë joyo yëyere sa̱ñope yo'oji.
Yo'oquëna,
cui'ne Maija'quë joyopi sa̱ñope yo'oji,
ca̱pë yëyere.
Ja̱je sa̱'ñe yo'o do'ire mësaru yëye yo'o ti̱'añe peoji.
18 Ja̱je pa'ina,
Maija'quë joyopi mësarute cuaquë pa'ito,
mësaru ja̱ maca cua̱ñese'ere sehuocaijë pa'iye pa̱ja'cohua'i a'ë.
19 Huesëma'pë a̱'jiñe ñañe pa'iji,
i̱ti yo'oyena,
pa̱i co'aye yëyere yo'ocohua'ire.
Ja̱ohua'ipi ñeje pa'iyë,
huejama'cohua'ipi coa paroja̱icohua'i pa'iye.
Tsi'sire yo'ocohua'ipi cui'ne co'ayena sëo measicohua'i pa'iyë.
20 De'huase'ere Maija'quë api cajë se̱cohua'ipi cui'ne dahuë necohua'i pa'iyë.
Pa̱ire coecohua'ipi te'e cuasama'cohua'ipi cui'ne i̱ohua'i yëyese'e yo'oja̱jë ë̱secohua'i cajë pa'iyë.
Esa pë̱titecohua'i pa'iyë,
yecohua'ipi ti cuasama'cohua'ipi ¿nepi ai jerepa de'oye neñe'ni?
cajë yo'ocohua'i pa'iyë.
Ti̱ohua'i a'ë cajë tsëcapë̱ase'e huasicohua'i pa'iyë.
21 Co'amañare ëa ñajë pë̱ti ëaye cuasacohua'i pa'iyë.
Pa̱ire huani je̱ocohua'i pa'iyë.
Co̱no cuepeohua'i pa'iyë,
cui'ne jai a̱ohua'ipi jaiye yequeje̱ co'aye yo'ocohua'i pa'iyë.
Ja̱'në case'ere mësarute cayë.
Ja̱je pa'ye yo'ocohua'i cato,
Diusu cua̱ñe te̱'te pa'iye ti peoji.
22 Ja̱je pa'iquëta'are,
Maija'quë joyo maina neñe iye a'ë:
Pa̱ire oiye,
sihuaye,
jo'cua de'oye pa'iye,
yo'o jujama'pë quëcojë yo'oye,
yecohua'ire coa ñama'pë de'oye necaiye,
de'oye yo'ocaiye,
ca nëose'ere de'hue ne ti̱'añe,
23 jerepa pa'i a'ë cuasa ma'ñe,
cui'ne i̱ yëyere co'ye quëco ti̱'añe.
Ja̱je pa'iye cato cua̱ñese'epi sa̱ñope yo'oye ti peoji.
24 Ja̱je pa'ina,
Jesucristo tse̱cohua'i cato ai hua̱nou,
co'a ë̱më ja̱'re te'e i̱ ëa ñaquë pasi'i caquë pa'ise'e,
cui'ne co'aye yëse'e co̱ni que̱ je̱osicohua'i a'ë.
25 Ja̱je pa'ina,
yure Maija'quë joyo pa'iyepi pa'ini,
i̱na i̱siñu'u mai pa'iyeje̱,
i̱pi cuaja̱'quëre.
26 Ja̱je pa'ina,
jerepa pa'iohua'i a'ë cuasaye pa̱ñu'u,
cui'ne ¿nepi jerepa de'oye yo'oye'ni?
cuasayeje̱ pa̱ñu'u,
cui'ne mai acohua'i de'oye yo'oyere ëa ñajë,
sa̱'ñe pë̱ti ëaye ñañeje pa̱ñu'u.