3 De'oquëre pa'ni cañu'u,

Diusure,

mai Ëjaë Jesucristo pëca ja'quëre,

Maipi Cristo ja̱'re co̱ni tsioni pa'i do'ire,

si'aye Maija'quë cua̱ñe te̱'te aye joyo pa'iye i̱siquëre.

4 Diusupi maire ja̱ yë'ta'a yeja de'huama'në Cristo do'ija̱'a ai oi sahuapi,

i̱ ña hue̱'ñana i̱na i̱sisicohua'ipi si'si te̱'ñaje peocohua'ipi pa'ija̱jë caquë.

5 Ja̱je pa'ina,

i̱pi ai oi ja̱je yo'osi'i cuasa nëose'eje̱ pa'ye yo'oquë Jesucristo do'ija̱'a i̱ mamajëre coa huerosicohua'ire nepi,

maire.

6 Ja̱je pa'ina,

Maija'quë maire ai de'oyerepa yo'ocaise'ere cuasajë sihuañu'u.

I̱ oi mamaquëre pana tsioni pa'i do'ire de'oyerepa maire necaisiquëre.

7 I̱ ai oi do'ire Diusupi maire i̱ mamaquë tsie nejosi do'ipi mai co'aye yo'ose'ere sa̱i de'huacai huasopi.

8 Ja̱je pa'ina,

Maija'quëpi si'aye mai caraja̱iñere i̱ ta̱'ñe asayepi cui'ne maire oiye yo'oyepi maire i̱sipi.

9 I̱sini maire i̱se'e ja̱je yo'osi'i cuasa nëoquë pa'ise'ere,

i̱ yahuese'ere asa ti̱'añe necaji'i.

10 Ja̱je pa'ina,

i̱ti cuasa nëose'eje̱ pa'ye si'aye yo'o ti̱'aja'quë api,

Diusupi i̱ti yo'o maca ti̱'asi maca.

Ja̱ maca Diusupi si'a co'amaña ma'tëmo pa'iye,

cui'ne yeja pa'iye,

te'ona tsioja̱'quë api,

Cristopi meñe cua̱ñequë pa'ija̱quë caquë.

11 Cristo ja̱'re tsioni pa'i do'ire i̱ co'amaña i̱ ja̱'re co̱ni huero paja̱jë caquë tsoe hue̱'ñana Diusupi maire i̱ tse̱cohua'ire paja̱'quë a'ë cuasa nëopi,

i̱ yëyeje̱ pa'ye si'aye i̱te de'oye ña cua̱ñoñese'e yo'oquëpi.

Ja̱je nepi.

12 Nequëpi maire sahua nëopi,

Cristore du'ru macarepa necaiquë api cuasasicohua'ipi Maija'quë ai jerepa pa'i pa'iyere sihuajë pa'ija̱jë caquë.

13 Ja̱je pa'ina,

de'o coca mësarute huasoyere nuñerepa cocare asa maca tsoe mësaru Cristo ja̱'re tsiosicohua'i paë'ë.

Ja̱je pa'ijëna,

Cristore i̱re pare cuasa maca i̱ i̱sisi'i ca nëosi de'o joyore mësaruna i̱sipi.

14 Ja̱ joyo cato maire Maija'quë du'ru i̱si nëosi joyo a'ë.

Ja̱ joyore pani asayë,

mai,

i̱ tse̱cohua'ire huaso tëji maca,

si'aye Maija'quë ca nëose'ere paja̱'cohua'i a'ë cajë,

ja̱ maca Maija'quëre sihuaja̱'cohua'i a'ë,

i̱ jerepa pa'i pa'iyere.

15 Asaquë pa'iyë,

mësaru Ëjaë Jesure necaiquëre pare cuasajë pa'icohua'ipi,

si'aye Maija'quë tse̱cohua'ireje̱ oijë pa'iye.

16 Ja̱je pa'ina,

yë'ë Maija'quëre se̱ maca mësaru de'oye yo'oyere cuasaquë si'anë de'oji caquë pëpayë,

Maija'quëre.

17 Ja̱je pa'ina,

mai Ëjaë Jesucristo mëñe Diusure se̱cacaiyë,

mësaruni ta̱'ñe asa joyore i̱sija̱'quë caquë.

I̱siquëna,

mësarupi i̱ i̱ñoñe asa ti̱'ajë cui'ne jerepa nuñe asa ti̱'ajajë caquë se̱cacaiyë.

18 Se̱ñë,

cui'ne i̱pi mësaru cuasayena miañe necaina,

mësarute caquë soise'ere utejë pa'iyere nuñerepa asa ti̱'ajajë caquë,

cui'ne Maija'quë i̱ tse̱cohua'ire i̱si ja̱'ñe airepa de'oye a'ni cajë asaja̱jë caquë se̱cacaiyë.

19 Cui'ne airepa jaiye a'ni Maija'quë tutu ja'ruja̱iñe ti peoyerepa,

maire,

i̱te sehuosicohua'ire yo'ocai tutu,

cajë asa ti̱'ajajë caquë se̱cacaiyë,

ja̱re iye tutupi Maija'quë si'a tuturepa yo'o i̱ñopi.

20 Jesucristore ju̱'isiquëni huëoni i̱ ëja te̱'tena,

jeto Maija'quë cua̱ñe te̱'tena ño maca,

21 ja̱ maca si'a cua̱ñeñere,

si'aye Ëjaë pa'iyere,

si'a tuture si'a jo'ya ne tutu pa'ise'ere,

jerepa pa'ire Cristore nepi,

coa si'ayere cayë mamire hue'eyere iye yeja yure pa'iyere cui'ne si'a mu'seña pa'i ja̱'ñere ëjaëre pare nepi.

22 Neni si'a co'amaña i̱ quë̱o huë'ehuëna o̱api.

Ja̱je pa'ina,

Cristona sehuocohua'ireje̱ i̱sipi.

Ja̱je pa'ina,

sehuosicohua'i si̱opë api,

Cristo.

23 Ja̱je pa'ina,

sehuosicohua'i cato Cristo ca̱pë acohua'i a'ë.

Ja̱je pa'ina,

Cristopi si'a sehuosicohua'ire pani huesoji,

cui'ne i̱pi si'a co'amaña Ëjaërepa pa'iji.