Maija'quë Oi Do'ire Huasosicohua'i Pa'iye
2
Ja̱'në mësaru co'aye yo'oyena cui'ne cua̱ñese'e tayo yo'oyena ju̱'isicohua'ipi paë'ë.
2 Pa'ijë iye yeja pa̱i yo'oyere,
iye de'otose'e cua̱ñequë,
Maija'quëre sa̱ñope yo'ocohua'ire cuaquë yëyere yo'ohuë.
3 Ja̱je mai si'aohua'i ja̱'në mai ca̱pë yëyere co'ayere yo'ohuë,
iye yeja pa̱i coa noni yo'ojë pa'iyere,
mai cuasayere.
Ja̱je coa noni yo'ojë pa'i do'ire Maija'quëni nejo cua̱ño ja̱'ñe pa'iohua'ipi paë'ë.
4 Ja̱je pa'iquëta'are,
Maija'quë pa̱ire teaye ñani co̱caiquëpi maire ai oi,
5 ja̱ yë'ta'a mai co'aye yo'oyena ju̱'isicohua'ipi pa'ijëna,
pa'iyere i̱sipi Cristo do'ipi.
Ja̱je pa'ina,
mësaru Maija'quë oi de'oye yo'o do'ire huaso cua̱ñosicohua'i pa'iyë.
6 Ja̱je pa'ina,
Maija'quëpi maire ju̱'isicohua'ini Cristo Jesús ja̱'re huëoni i̱ ja̱'re te'e ñopi,
Maija'quë cua̱ñe te̱'tena.
7 Iye cato yo'opi Cristo Jesús do'ipi maire i̱ ai oiyere,
cui'ne i̱ de'oye maire yo'ocaise'ere yequë mu'seña maire i̱ñosi'i caquë.
8 Ja̱je pa'ina,
mësaru Maija'quëpi de'oye oi yo'o do'ire huaso cua̱ñosicohua'i pa'iye payë,
necaiquëre pare i̱te cuasa do'ipi.
Iye mësarupi yo'ojë ti̱'ase'e peoji,
coa Maija'quëpi mësarute i̱sise'e a'ë,
9 cui'ne mësaru yo'o do'ipi etase'e peoji.
Ja̱je pa'ina,
te'ije̱ yë'ëpi nehuë,
ca ti̱'añeje peoji.
10 Maija'quë co'amaña'ë,
mai i̱ nesicohua'i a'ë.
Ja̱je pa'ina,
Maija'quë tsoe hue̱'ña ne de'huacaise'eje̱ pa'ye Cristo do'ija̱'a de'o co'amaña yo'oja̱'cohua'ire nesicohua'i a'ë.
De'oye Pa'iye Cristo Do'ipi
11 Cuasajë̱'ë,
ja̱'në mësarute pa̱i tëase'ere hue'ecohua'ipi judío pa̱ipi ca̱'ni tëama'cohua'ire hue'yose'ere judío pa̱i peo do'ire.
12 Ja̱'në cato mësaru Cristore peocohua'ipi,
Israel pa̱i peocohua'ipi,
Maija'quë ca nëose'ere peocohua'ipi,
yequë mu'se pa ja̱'ñere uteye peocohua'ipi.
Diusureje̱ peocohua'ipi te'ohua'i iye yejana ne huesësicohua'ipi paë'ë.
13 Ja̱je pa'iquëta'are yure mësaru Cristo Jesús tsie do'ipi i̱na tsioni ja'yere pa'iyë,
ja̱'në i̱te so'ore pa'isicohua'ipi.
14 Cristo api,
mai jo'cua de'oye pa'iye.
I̱pi judío pa̱ire cui'ne judío pa̱i peocohua'ireje̱ te'e tsëcapëna nepi.
Tsoe nejopi,
ta̱'tëpo,
yecohua'i a'ë cajë pa'ise'e.
15 Ja̱je pa'ina,
Cristo mai tayo do'ire sa̱i de'huani i̱ ca̱pëpi Moisés cua̱ñeñe coa pa'iye nepi,
caya pa̱i tsëca pa'ise'ere te'e huajë pa̱i tsëcapë pa'ija̱'quë caquë.
Ja̱je neni jo'cua de'oye pa'iye nepi.
16 Ja̱je Cristo i̱ cruz ju̱'i do'ipi caya tsëca pa'ijë uihuayere nejoni te'e pa̱ire nepi.
Neni Maija'quë ja̱'re jo'cua de'oye pa'iye necaji'i,
maire.
17 Mësaru so'ore Maija'quëre pa'icohua'ire cui'ne judío pa̱ire,
i̱te ja'ye pa'icohua'ire si'aohua'ire jo'cua de'oye pa'iyere,
de'o cocare quëasi'i caquë Cristo daji'i.
18 Ja̱je pa'ina,
yureta'a Cristo do'ija̱'a si'aohua'i judío cui'ne judío pa̱i peocohua'ije̱ Maija'quëna tsioja̱iñe pa'iji,
maipi te'e joyore hue'e do'ire.
19 Ja̱je pa'ina,
mësaru ti̱o hua'i peoyë,
yecohua'i yejare pa'icohua'ije̱ pa'iohua'i pa'iyë.
Ja̱je pa'ina,
yure mësaru cato Maija'quë pa̱i ja̱'re co̱ni te'e pa'iyë,
Maija'quë do'ijë acohua'i de'osicohua'ipi.
20 Mësaru jai huë'eje̱ pa'iohua'i a'ë.
Ja̱je pa'iohua'ipi i̱ jëjo saocohua'i cui'ne Maija'quëre quëacaicohua'i nesicona,
mëñe nesicohua'ipi pa'iyë,
Jesucristo cato ne huëojë du'ru macarepa o̱asi quë̱na pëje̱ pa'i api.
21 Cristona si'a huë'e quëco paco i̱na tsiosicorepa pa'io,
jerepa jaico ai de'oja̱'co,
Ëjaërepa de'o huë'erepa pasi'i caco.
22 Ja̱je cui'ne mësaruje̱,
si'aohua'i Cristona tsioni pa'ijë,
Maija'quë joyo pa'i huë'e pa'iyë.