Judío Peocohua'ire Quëaquë Api Pablo
3
Yë'ë Pablo,
Jesucristona tse̱a cua̱ñosiquë a'ë,
mësaru judío pa̱i peocohua'ini caquë.
2 Ja̱je pa'ina,
Maija'quë mësarute oi coa i̱siyere yë'ëpi quëacaija̱quë caquë i̱pi cua̱ñe nëopi cajë asayë,
cuasayë.
3 Ja̱je pa'ina,
Diusupi i̱ yahue cuasa nëose'ere yë'ëna quëa i̱ñopi.
Ja̱re yë'ëpi i̱ quëase'eje̱ pa'iye mësarute a'ri maña quëaquë toyahuë.
4 Yë'ë toyase'ere ñajë mësaru asa ti̱'aja'cohua'i a'ë,
yë'ëpi Cristo aye yahuese'ere asaquë pa'iye.
5 Iye cato cayë tsoe acohua'ire i̱ cuasa nëose'e i̱ñoma'ë yahueni pase'ere,
ja̱re yure i̱ joyopi i̱ de'ocohua'ire pare jëjo saocohua'ina,
cui'ne i̱te quëacaicohua'ina,
yo'oyeja̱'a Maija'quëpi i̱ñopi,
si'aye.
6 Iye a'ë,
i̱ti yahuese'e cato:
Cristo Jesús do'ija̱'a Maija'quë ca nëose'ere huaso coca quëayeja̱'a,
judío pa̱i peocohua'ipi,
judío pa̱i pa ja̱'ñere te'e cui'neje si'a yë'quë maca pa ja̱'ñe a'ë,
i̱ ca̱pë acohua'i pa'i do'ire.
7 Maija'quë yë'ëre oi coa i̱sise'eja̱'a Diusu tutupi iye coca quëacaiquëre nesiquë a'ë,
i̱ yëyeje̱.
8 Yë'ë,
Maija'quë tse̱cohua'i se̱ña maca huë'ehuërepa pa'iquëni,
Maija'quëpi coa i̱sipi,
judío pa̱i peocohua'ire,
jaiye de'o co'amaña cue̱cue ti̱'añe peoyerepa Cristo payere,
de'o coca quëayere.
9 Si'aye co'amaña de'huasiquëpi Diusupi yë'ëre i̱ tsoe hue̱'ña cuasase'ere yahuese'e pase'ere si'aohua'ire quëa i̱ñoja'quëre nepi.
10 Ja̱je paji'i,
yure sehuosicohua'i pa'iyeja̱'a cua̱ñecohua'ipi cui'ne ëjaohua'ipi joñoase'e pa'i hue̱'ñana Diusu ta̱'ñe yo'oyere si'aye ña ti̱'ajajë caquë.
11 I̱ cuasa nëo huesose'eje̱ pa'ye cui'ne yo'opi,
Diusu,
mai Ëjaë Jesucristo do'ija̱'a si'aye ne sao maca.
12 Ja̱je pa'ina,
Cristo do'ipi Diusuna de'hue a̱'jiñe tsioja̱iñe payë,
asajë mai,
i̱te de'hue necaiquë api cuasa do'ija̱'a.
13 Ja̱je pa'ina,
se̱ñë,
mësarute.
Yë'ë mësaruni caquë ai yo'oyere ñani yo'o jujama'pë pa'ijë̱'ë.
Yë'ë ai yo'oye cato mësaru jai do'i quë'iohua'i pa'iyere i̱ñoquë yo'oye a'ë.
Jesús Oiye
14 Iyere caquë mai Ëjaë Jesucristo pëca ja'quë ña hue̱'ñana do're ja'ruyë,
15 si'a i̱ tsëcapë ma'tëmo pa'icohua'i cui'ne yeja pa'icohua'i i̱ mamire hue'ejë pa'iquëna.
16 Do're ja'runi Maija'quëre se̱ñë,
i̱ de'o co'amañare pare mësaru joyona Maija'quë joyo yo'o do'ipi jerepa pa'yere tuture i̱sija̱quë caquë.
17 Cui'ne i̱te pa'iji cuasa do'ipi Cristopi mësaru joyore pa'ija̱'quë pa'ina,
Cristo pa̱ire oiyena jëayerepa tsita mesicohua'ipi pa'ijë.
18 Si'a sehuosicohua'i ja̱'re co̱ni Cristo pa̱ire oiye:
je̱'ñe tëcapë jaiye,
tsoaye,
hua̱iñe,
cui'ne mëñe tsoaye asa ti̱'aja'cohua'i a'ë caquë se̱ñë.
19 Se̱ñë,
cui'ne mai asaye jerepa tëto saise'ere pa̱ire oiyere asa ti̱'ajajë caquë,
ja̱je asa ti̱'ajë Diusu oiyepi ti̱mësicohua'i pa'ija̱jë caquë.
20 Yure airepa de'oquëre pa'ni Maija'quë cajë sihuañu'u,
i̱ tutupi maija'a yo'ocaiquëre pare,
si'aye mai pañu'u cajë se̱ñe maña,
pa̱nita'a mai cuasaye maña,
jerepa de'oye necai tutu paquëre.
21 De'oquëre pa'ni Diusu,
cajë sihuañu'u,
sehuosicohua'i Ëjaëre,
Cristo Jesús do'ipi.
Ja̱jese'e si'anë tsoeje̱ i̱te sihuajë pañu'u.
Ja̱je pa'ija̱quë.