Te'ije̱ Pa'iohua'i Pa'iyë, Te'i Joyopi Pa'i Do'ire
4
Ëjaëre tse̱a cua̱ñosiquëpi se̱ñë,
mësarute Maija'quë caquë soise'eje̱ pa'ye nuñerepa pa'ijë̱'ë caquë.
2 Ja̱je pa'ina,
jerepa pa'iohua'i a'ë cuasama'cohuaipi pa̱ire oicohua'ipi,
pa̱i ñape ti̱ñe cuasayere sa̱ñope cama'cohua'ipi quëcocohua'ipi oicohua'i pa'ijë̱'ë.
3 Ja̱je pa'ijëna,
mësaru jo'cua pa'iyepi necaina,
Maija'quë joyopi co̱caina,
si'anë tsiosicohua'ipi pañu'u cajë de'hua ñajë pa'ijë̱'ë.
4 Te'e ca̱pë cui'ne te'e joyo pa'iji,
Maija'quë mësarute te'ore utejë pa'iyena soise'eje̱ pa'ye.
5 Pa'iji,
te'e Ëjaë.
Pa'ico,
te'o Maija'quëre cuasaye,
te'e oco doye pa'iji.
6 Pa'iji,
te'e Diusu si'aohua'i pëca ja'quërepa.
Ja̱ëpi pa'iji,
si'aye ë̱mëje'e te̱'tere pare,
si'aohua'ire tsioquë yo'oquë cui'ne si'aohua'ire tsioni pa'iquërepa.
7 Ja̱je pa'iquëta'are Cristopi mai yo'oja̱'a tuture pa̱i ñapere i̱ yëyeje̱ pa'ye i̱sipi.
8 Ja̱je pa'ina,
toyase'e caji:
I̱ ma'tëmo mëi maca,
te'e i̱ ja̱'re co̱ni tse̱a cua̱ñosicohua'ireje̱ sapi.
Saquë i̱ yo'o tuture pa̱ina i̱sipi.
9 “Mëji'i” cani,
cayë du'ru yejare pana cajesiquëpi mëji'i cajë.
10 I̱ti cajesiquëpi ja̱re i̱pi mëji'i ai ë̱mërepa ma'tëmona,
si'aore i̱ pa'iyepi ti̱mësi'i caquë.
11 Ja̱re i̱pi pa̱i ñapere i̱sipi,
yo'oja̱'a tutu,
yecohua'ini i̱ jëjo saocohua'ire nepi,
yecohua'ini Maija'quë caquëna,
asase'ere quëacaicohua'ire nepi,
yecohua'ini huaso cocare quëaja̱'cohua'ire nepi.
Yecohua'ini yëi ñamare ñacaiyeje̱ pa'ye sehuosicohua'ire ñacaicohua'ire nepi.
Cui'ne yecohua'ini de'oye ye'yaja̱'cohua'ire nepi.
12 Ja̱je i̱ tse̱cohua'ire yo'oja̱'a tutu i̱sipi,
i̱ yëyere yo'oja̱jë caquë.
Yo'ojëna,
Cristo ca̱pë acohua'ipi ai de'oja̱jë caquë i̱ohua'i necai do'ipi.
13 Ja̱je pa'ina,
i̱ ne de'huasicohua'ipi necaiye pa'iji,
si'aohua'i te'i cuasayeje̱ pa'ye Maija'quëre cuasajë pa'i macaja̱'a cui'ne Maija'quë mamaquëre asa ti̱'a macaja̱'a.
Ja̱ maca yureta'a joyo aiohua'irepa de'oni Cristo ja'iohua'irepa pa'ija̱'cohua'i a'ë,
si'aohua'i.
14 Ja̱ maca tsi̱je pa'iohua'i pa'iye pa̱ja'cohua'i a'ë.
Tsi̱ cato i̱ohua'i cuasase'e esa je̱oni yeque cuasayena a̱'jiñe po̱nëcohua'i a'ë,
tayosi ma'a saicohua'i cosoyena sehuocaijë.
15 Ja̱je pa'ina,
mai cato joyopi pa̱ire oiyere nuñerepa cocare cajë ñese ai de'oye pa'iji si'aye pa'iohua'irepa,
Cristo sehuosicohua'i si̱opëna tsioni pa'ijë.
16 Ja̱je pa'ina,
Cristo do'ipi si'a ca̱pë jëayerepa sa̱'ñe si'a te̱'ña tsio huesëji,
te'oje̱ pa'iorepa.
Ja̱je tsioni si'a te̱'ña de'oye yo'ojëna,
si'a ca̱pë ai de'oji,
sa̱'ñe oiyena.
Huajë Pa'iye Cristo Do'ipi
17 Iye a'ë,
yë'ë mësarute mai Ëjaë mamipi cua̱ñequë caye:
Pa'ima'pë pa'ijë̱'ë,
ja̱ yë'ta'api Maija'quëre cuasama'cohua'i pa'iyeje̱ pa'ye.
Ja̱ohua'i cato pa'iyë,
coa noni do'i peoyere cuasajë pa'iyepi.
18 Ja̱je pa'iohua'ipi sëtama'cohua'ije̱ pa'ye de'oye cuasama'cohua'i a'ë,
Satanáspi i̱ohua'ire ñamije pa'ye necai do'ire.
De'oye cuasama'cohua'ipi nuñe coca coe do'ire huesësicohua'ipi pa'iyë.
Ja̱je pa'ijë Maija'quë pa'iye peocohua'ipi pa'iyë.
19 Ja̱je pa'ina,
huajëya'ye nëiñe peocohua'ipi si'aye co'ayere yëyena dahuëyesicohua'ipi pa'ijë,
ja'ruja̱iñe peoye,
coa si'aye si'si co'amañare yo'ojë pa'iyë.
20 Ja̱je yo'ojë pa'iyere Cristo mësarute ye'yama'ë paji'i.
21 Ja̱je pa'ina,
mësarupi nuñerepa coca paquëni,
i̱ cayere asasicohua'i pani,
cui'ne i̱ pa'iyere ye'yesicohua'i pani,
22 je̱ocojë̱'ë,
mësaru tsoe pa'ise'ere,
sehuoma'cohua'i pa'ise'ere.
Ja̱ tsoe pa'ise'e yëyepi cosoquë co'ayena sayere.
23 Je̱ocojëna,
si'a mu'seña huajë yëyere cui'ne cuasayere pa'ye pa'iji.
24 Ja̱re pajë huajë pa'iyere pajë̱'ë,
ca̱ñare su̱ñañeje pa'ye.
Iye huajë pa'iye cato Maija'quë nuñerepa pa'iyeje̱,
cui'ne Maija'quë de'oyerepa pa'iyeje̱ nese'e a'ë.
25 Ja̱je pa'ina,
ja̱ yë'ta'api cosoma'pë pa'ijë̱'ë.
Coa ai jerepa pa̱i ñape nuñerepa cocapi cajë̱'ë,
pa̱ire.
¿Si'aohua'i te'e ca̱pë acohua'i me yeque yo'oye'ni?
26 Pë̱icohua'i pani,
ti pë̱ni huesëma'pë pa'ijë̱'ë,
tayoye.
Pë̱tise'e cajë na'ijaima'pë pa'ijë̱'ë.
27 Huatire sa'ro nëocaima'pë pa'ijë̱'ë.
28 Co'amaña yahue i̱maquë pa'isiquë pani je̱ojë'ë,
ja̱ yo'oye.
Je̱oni co'amaña ne huëojë̱'ë,
më'ë jë̱tëpi,
de'oye co'amaña yecohua'ire carayere i̱sisi'i caquë.
29 Si'si cocare cama'pë pa'ijë̱'ë.
Coa ai jerepa i̱ti asacohua'ire de'oye pa'iye necaiyere,
cui'ne jerepa ñese mëiñe necaiyere cajë̱'ë.
30 Maija'quë mësaruna i̱ joyore i̱sipi,
i̱ tse̱cohua'irepa i̱ño ja̱'ñere mësarute huaso tëji mu'serepa.
Ja̱je pa'ina,
co'a coca cayepi ne oema'pë pa'ijë̱'ë,
Maija'quë joyore.
31 Je̱ocojë̱'ë,
yecohua'ire sa̱isi'i caquë oi joyo pa'iyere:
pë̱i sa̱ñope cuasayere,
pë̱i sa̱ñope yo'oyere,
sa̱ñope tutu cayere,
cui'ne yecohua'ire co'acohua'i a'ë cayere.
Coa si'aye yecohua'ire sa̱ñope yo'o ayere je̱ocojë̱'ë.
32 Je̱oni sa̱'ñe oijë co̱caijë̱'ë.
Cui'ne yecohua'ire sa̱i de'huacaijë pa'ijë̱'ë,
mësaru co'aye yo'o do'ire Cristo do'ipi Maija'quë sa̱i de'huacaise'eje̱ pa'ye.