Sa̱'ñe Co̱caijë̱'ë
6
Maija'quë do'ijë,
yecohua'ipi co'aye yo'ojë co'a de'osicohua'i pa'ito,
mësaru Maija'quë joyopi cuaquëna,
pa'icohua'ipi co̱caijë̱'ë,
cui'naohua'ipi huëija̱'cohua'ire.
Co̱caicohua'i pani jerepa pa'i a'ë cuasama'pë co̱caijë̱'ë.
Yo'ojë i̱ti co̱caisicohua'ipi cui'ne pa'yena yo'ojë co'a de'oye.
Ja̱je pa'i do'ire pa̱i ñape co'ye mësaru pa'iyere ñajë'ë.
2 Mësaru acohua'i ai yo'ojë pa'icohua'ire co̱caijë̱'ë.
Ja̱je yo'ojë Jesucristo cua̱ñese'ere ne ti̱'aja'cohua'i a'ë.
3 Teaye pa'i macata'a,
de'hue yë'ëpi jerepa pa'i a'ë cuasani co'ye i̱ja'a coso huesëji.
4 Ja̱je pa'iquëta'a coa ai jerepa pa̱i ñape ñañe pa'iji,
me yë'ë pa'iye'ni cajë.
Si'anë ja̱je neñañe pa'iji,
më pa'iyere.
Neñaëna,
de'oye yo'oyepi pa'ina,
ja̱ yo'ose'ere sihuaye pa'iji.
Pa̱ni yecohua'i pa'iyena cue̱cue ñani.
5 Ja̱je pa'ina,
te'ohua'ise'e yo'oye pa'iji,
i̱ohua'i ayere.
6 Maija'quë coca yo'o ja̱'ñe ye'ya cua̱ñoquëpi,
i̱te ye'yaquëre i̱ de'oye payepi co̱caiye pa'iji.
7 Co'ye cosoma'pë pa'ijë̱'ë.
Maija'quëre ti coso ti̱'añe peoji,
ñama'ë pa'ija̱'quë api cajë.
Ja̱je pa'ina,
pa̱i ñape ta̱se'ere quë̱quëna tëaye pa'iji.
8 Ja̱je pa'ina,
pa̱ipi i̱ ca̱pë yëyere yo'osiquë pani co'ayere ta̱si do'ire ju̱'iñere tëaye pa'iji.
Ja̱je cui'ne Maija'quë joyo yëyere yo'osiquë pani de'oyere ta̱si do'ire ti pani huesëyere tëaye pa'iji,
Maija'quë i̱siyere.
9 Ja̱je pa'iye sëte,
jë'joye peoyerepa de'oyere yo'ojë pañu'u.
Ja̱je pa'ina,
maipi yo'o jujama'cohua'i pani tëaja̱'cohua'i a'ë,
ja̱ pa'iyere,
i̱ti mu'se ti̱'aëna.
10 Ja̱je pa'i do'ire de'oye yo'o'ñe pa'i sa'rore pa'ito coa ñama'pë si'ahua'ire de'oye necañu'u,
mai ai cuasaye ja'ye.
Cui'ne ai jerepa de'oye necañu'u,
Jesucristore cuasacohua'ire.
Yëhuoye Cui'ne Tëjiyerepa Pëpaye
11 Yure yë'ë jë̱tëre papi jai toya toyayë,
mësarupi ñajë'ë caquë.
12 Mësarute ca̱'ni tëaye pa'iji cajë ye'yacohua'i cato,
pa̱ipi de'oye caja̱'cohua'i a'ë cajë yo'oyë,
cui'ne Cristo cruz ju̱'ise'e ayere quëama'cohua'ipi jo̱sa yo'oma'cohua'ini cajë ca'rajë.
13 Ja̱je ca̱'ni tëaye yo'ocohua'ita'a cua̱ñese'e cayere si'aye yo'o ti̱'ama'cohua'i a'ë.
Ja̱je pa'iohua'ita'a mësarupi,
mësaru ca̱përe tëani hue'ejëna,
sihuaja̱'cohua'i a'ë yëquë jerepa pa'iohua'i a'ë cajë mësarupi i̱ohua'i case'ere sehuocai do'ire.
14 Ja̱je pa'ina,
yë'ë cato mai Ëjaë Jesucristo cruz ju̱'ise'ere sihuaquë quëayë.
Cristo cruz ju̱'isi do'ipi yë'ëre iye yejapi tutu de pase'e ju̱ni huesëpi.
Ju̱'ina,
yë'ëpi iye yeja yëye ayere yo'oma'quë de'ohuë,
ju̱'isiquëje̱ pa'i.
15 Cristo Jesús ja̱'re tsioni pa'icohua'ire cato ca̱'ni tëasicohua'i pa'iye,
pa̱nita'a pa̱cohua'i pa'iye co̱caiye peoji.
I̱ti do'i quë'yerepa cato maipi huajë pa̱i po̱nëni pa'iye a'ë.
16 Si'ahua'i ja̱je yo'ojë pa'icohua'ire Maija'quë oi teaye necaise'ere cui'ne jo'cua de'oye pa'iye i̱siquëna,
de'oye pa'ijë̱'ë,
ja̱je yo'ocohua'ipi,
Maija'quë pa̱ipi.