4
Pëca ja'quë co'amaña si'aye paja̱'quëta'a tsihua'ë pani jo'yaëje̱ pa'i pa'iji,
si'a co'amaña paja̱'quëta'a.
2 Ja̱je pa'ina,
yecohua'ipi i̱te ñacaijë pa'iyë,
i̱ ne'ñe pa'yere.
Ñacaijë pa'ijëna,
pëca ja'quëpi yureta'a ai de'o tëjipi caquë i̱na si'aye co'amaña i̱si macaja̱'a.
3 Ja̱je pa'ye maije tsi̱je pa'iohua'i pa'i maca iye yeja cua̱ñe tutupi jo'ya nesicohua'ire papi,
maire.
4 Ja̱je paquëna,
i̱ti yo'o maca ti̱'aëna,
Diusupi i̱ mamaquëre jëjo daopi.
Judío pa̱ije pa'i daji'i,
nomiona ai de'osiquëpi,
Moisés cua̱ñese'ere si'aye yo'oja̱'quëpi daji'i.
5 Ja̱je daji'i,
ja̱ cua̱ñeñe yo'ojë pa'icohua'ini maire huasosi'i caquë Maija'quëpi i̱ yëhuiohua'ire paja̱quë caquë.
6 Ja̱je pa'ina,
mësarupi tsoe i̱ mamajë a'ë cajë asayere i̱ñosi'i caquë Maija'quëpi i̱ mamaquë joyore jëjo daopi,
mësaru joñoana.
Ja̱ joyo pa do'ire cayë,
mai:
“yë'ë Ja'quë.”
7 Ja̱je pa'ina,
Maija'quë mamaquë a'ë,
më'ë,
jo'yaë peoye.
Ja̱je i̱ mamaquë pa'i do'ire Maija'quëpi i̱ yëyepi i̱sija̱'quë api,
i̱ ca nëosi co'amaña.
Pablopi Ai Co'a Ju̱'i Pa'ise'e Maija'quëre Sehuocohua'ire
8 Ja̱ yë'ta'a Maija'quëre asama'në,
mësaru yeque diusuohua'i pa̱i nese'e jo'ya nesicohua'ipi paë'ë.
Pa'ijëta'a nuñerepa yeque diusuohua'i peoyë.
9 Ja̱je pa'isicohua'ita'a yureta'a asare payë,
Diusuni.
Ai ti̱ña casi'i,
Diusupi mësarute i̱ tse̱cohua'ire ñaji.
Ja̱je pa'ito ¿me neni cui'naohua'ipi tutu peoyere cui'ne teaye pa'yere cuasa co̱jë,
sehuocaijë jo'ya ne cua̱ñoñe yëye'ni?
10 Mësaru ja̱ yë'ta'a Maija'quë yëyere yo'o ti̱'aja'cohua'i a'ë cuasajë judío pa̱i yo'oyere mu'se de'huajë,
ñañëohua'ire cui'ne o̱metëcare yo'oyë.
11 Ja̱je yo'ojëna,
yë'ë ca'rayë,
mësarute ai yo'oquë quëase'epi coa yo'ose'e pa'ima'quëni caquë.
12 Maija'quë do'ijë se̱ñë,
mësarute.
Yë'ëje̱ pa'iohua'i de'ojë̱'ë,
jo'yaohua'i peocohua'i,
yë'ë je̱'quë mësaruje̱ pa'i de'ohuë,
judío pa̱i cua̱ñeñe peoquë.
Yë'ëre mësaru ti co'aye yo'oma'cohua'i a'ë.
13 Tsoe mësarupi asayë,
yë'ë ju̱'i dahuë peoto quëaye pa̱'ñe pa'ipi mësarute de'o coca quëahuë,
yë'ë du'ru macarepa mësarute quëacore.
14 Yë'ë ju̱'i dahuë cato yë'ëre neñañe paji'i.
Pa'ina,
mësaru ja̱ ju̱'i dahuëre yë'ëre coejë eto saoye pa̱huë.
Pa̱jë coa ai jerepa Maija'quë hui̱ñaëre necaiyeje̱ pa̱nita'a ja̱re Jesucristopi daquëna,
necaiyeje̱ pa'yerepa yo'ohuë,
mësaru.
15 Ja̱je pa'ina,
mësarute cayë,
¿me nei'ni,
mësaru sihuajë pa'ise'e,
mësaru de'oye yo'ose'ere yë'ë co̱caiye paye?
Nuñerepa cayë,
mësaru dutaco pa'ito,
mësaru ñacoare dutani yë'ëre i̱sira'huë,
yë'ëre ai oi do'ire.
16 ¿Ja̱je yë'ë nuñerepa cocare mësarute casi do'ire mësarute sa̱ñope yo'oquë de'ore?
Pa̱ni.
17 Ja̱ohua'i mësarute,
ai de'oye ñacañu'u cajë yo'ojëta'a co'aye cuasajë yo'oyë.
I̱ohua'i yëye cato mësarupi yëquë ja̱'re pa'isicohua'ini,
ti̱ohua'ire neñu'u cuasaye a'ë,
jeteyo'je mësarupi i̱ohua'ise'ere de'oye necaijë pa'ija̱jë cuasajë yo'oye a'ë.
18 Ja̱je pa'ina,
yecohua'ire de'oye cuasajë,
mai yëyeje̱ yo'oja̱jë cajë ñacaiye de'oye a'ë.
Ja̱je pa'ina,
yë'ë mësaru ja̱'re pa'i macase'e yecohua'ipi de'oye yo'ojë,
si'anë ja̱jese'e de'oye yo'oto de'oji,
yë'ë peo macaje̱.
19 Ja̱je pa'ina,
yë'ë mamajë,
Cristo mësarute i̱je pa'iohua'ire de'o macaja̱'a mësaruni ai cuasaquë,
nomio tsi̱ co̱a huëoni a'si ju̱'iñeje pa'ye ai yo'oquë pa'iquë a'ë,
ti̱jupë.
20 Yurepi merepa yë'ë ja̱rote mësaru ja̱'re patira'ye yeque maña quëaja̱'quëpi.
Ja̱je pa'ina,
mësarute me caye'ni caquë co'a ju̱'iñë.
Agar Cui'ne Zara I̱ñoñere Quëaye
21 Moisés cua̱ñese'ere sehuocañu'u cuasacohua'ipi cajë̱'ë:
¿Mësarupi cua̱ñese'e cayere asajë pa'icohua'i a'ni?
22 Ñeje toyase'e caji:
Caya mamajëre Abraham papi,
te'ire i̱ jo'yaona,
yequëni i̱ nëjore pana papi,
jo'yao peocona.
23 I̱ jo'yaona ai de'huasiquë cato iye yeja pa̱i yo'ojë payepi parena,
co̱asiquë paji'i.
Nëjorepa mamaquë cato,
Maija'quë ca nëose'epi ti̱'a ja̱'ñere co̱asiquë paji'i.
24 Iye caya nomiohua'i i̱ñoñë,
Maija'quë maire cayaye cuasa nëose'ere.
Ja̱je pa'ina,
iye ai cuasajë asaye paji:
Agar,
Abraham jo'yaopi Arabia quë'ro acore Sinaí cu̱tihuë ayere i̱ñoco,
judío pa̱ire,
Maija'quë cua̱ñeñe i̱sisi pa'i sito.
Iye cuasa nëose'e acohua'i cato jo'yaohua'i pa'ija̱'cohua'ipi co̱a cua̱ñoñë.
25 Agar cato Sinaí cu̱tihuëre i̱ñoco,
Arabia yeja pa'iconi,
yure pa'i Jerusalénre.
Ja̱ daripë cato si'a i̱o mamajë co̱ni cua̱ñese'epi jo'ya ne cua̱ñosicopi pa'ico.
26 Ja̱je pa'iquëta'are,
ma'tëmo Jerusalén cato jo'yao peoco.
Ja̱je pa'ina,
mai i̱o mamajë a'ë.
27 Ja̱je pa'ina,
toyase'e caji:
Sihuajë̱'ë,
carao,
mamajëre peocopi.
Sihuaco cuijë̱'ë,
tsi̱ co̱aco a'si ju̱'iñe asama'copi.
Ja̱je pa'ina,
je̱oco cua̱ñosicopi jai pa̱ire mamajëre paja̱'coa,
ë̱jëre pacore jerepa.
28 Maija'quë do'ijë,
mësaru Isaacje̱ pa'iohua'i a'ë,
Diusu ca nëosi mamajë a'ë.
29 Ja̱je pa'iquëta'are pa̱i yëyepi ai de'huasiquëpi tsoe hue̱'ña,
Maija'quë joyopi yo'oquëna,
ai de'osiquëre jo̱sa yo'ose'eje̱ pa'ye maire jo̱sa yo'oye pa'iji.
30 Ja̱je pa'iquëta'are toyase'e ñeje caji:
Eto saojë̱'ë,
jo'yaore,
cui'ne i̱o mamaquëre.
Jo'yao mamaquë ja̱'re te'e jo'yao peoco mamaquë co'amaña paye peoji.
31 Ja̱je pa'ina,
Maija'quë do'ijë jo'yao mamajëje pa'iohua'i peoyë,
mai.
Jo'yao peoco mamajëje pa'iohua'i a'ë.