Tej tbet Pablo tuj txꞌotxꞌ Macedonia ex tuj txꞌotxꞌ Grecia
20
Tbajlenxitzun jlu,
e tzaj ttxcoꞌn Pablo ke ocslal,
ex xi tkꞌoꞌn mastl cynabl;
[entons baj cychlen cyib,]
e cyajtzun tkꞌolbeꞌn ex etztzun tuꞌn t-xiꞌ tuj Macedonia.
2 Bajtzun tbetin tuj txꞌotxꞌ Macedonia,
xi tkꞌoꞌn cynabl ocslal tuꞌnju nim o yolin cyucꞌil,
ex pontzun tuj txꞌotxꞌ Grecia.
3 Axtzun cyaj ten ox xjaw,
ex attok t-xiꞌyil tuj barc tuꞌn tpon tuj Siria,
pero tej tbinte aju otok bant tiꞌj cyuꞌn xjal judiy tuꞌn tcub byoꞌn cyuꞌn,
cubtzun t-ximan tuꞌn t-xiꞌ tuj juntl be tuꞌn ticꞌ juntl maj tuj Macedonia.
4 Akeju e jeꞌx tucꞌil Pablo,
atzun ke jlu:
Sópater aju aj Berea,
aju tcyꞌajal Pirro,
tucꞌix Aristarco ex Segundo aj Tesalónica ke,
tucꞌix Gayo aju aj Derbe,
tucꞌix Timotey,
tucꞌix Tíquico ex tucꞌix Trófimo,
aj Asia ke.
5 Atzun ke jlu e jeꞌx nej ex e ayon kiꞌje tuj tnam Troas.
6 Tbajlenxitzun ninkꞌij tuꞌn cywaꞌn xjal pan mintiꞌ t-samel tuj tuꞌn tjaw mal tcꞌuꞌj,
o etze tuj Filipos,
o tzaje tuj barc,
tuj jweꞌ kꞌij o ule cyucꞌil tuj Troas,
ex axtzun o cyaj tene wuk kꞌij.
Tej tpon Pablo visitaril cye ocslal tuj tnam Troas
7 Tujtzun tnejel kꞌij te seman,
oc kchmon kibe cyucꞌil cycyakil ocslal tuꞌn tcub ksipane pan kxolxe,
ex in che xnakꞌtzanjtztok ocslal tuꞌn Pablo.
Attok telex Pablo tuj juntl kꞌij,
ex cucxtok tyolin te tmij akꞌbil.
8 Ex nimcu candil at tuj cwart tuj toxcolin ja,
jatum cybuyintok cyib.
9 Ex at jun cuꞌxun Eutico tbi kꞌukltok ttzi ventan,
cyimni tuꞌn watl tuꞌnju nim tuj o yolin Pablo,
etztzun tzꞌak tuj toxcolin ja tuꞌnju cyimni tuꞌn watl,
cubil tzꞌak twitz txꞌotxꞌ,
ex otok cyim tej tjaw kꞌiꞌn.
10 Cubiltzun naj Pablo,
cub mutzeꞌ tibaj ju cuꞌxun lu ex jaw tchleꞌn ex xi tmaꞌn cye erman:
—Miꞌn baj cycꞌuꞌje porque itzꞌxte.
11 Jaxtzun juntl maj Pablo tuj cwart ex cub t-sipan pan cyxol ocslal ex o waꞌn,
cucxtok tyolin,
maxitzun weꞌ tyolin tej ttzaj t-xe cyaꞌj,
ex xiꞌtzun.
12 Xitzun cyiꞌn ocslal ju cuꞌxun itzꞌ tuꞌn tpon tja,
ex nimxix kꞌukbanjtz cycꞌuꞌj.
Tzaj Pablo tuj barc tuj tnam Troas pon tuj tnam Mileto
13 Atzun keye o tzaj neje twitz Pablo,
o ocxe tuj barc,
o ultzune tuj tnam Asón jatum tuꞌn kayone tiꞌj Pablo,
porque ictzun bant tiꞌj tuꞌn,
tuꞌn ttzaj bet tuꞌn tkan.
14 Tejtzun tcanun Pablo kucꞌile tuj tnam Asón,
ocxtzun kucꞌile tuj barc,
o ultzune tuj tnam Mitilene.
15 Axtzun o ocxe tuj barc,
te juntl kꞌij o ule ttxlaj txꞌotxꞌ Quío,
ex texi juntl kꞌij o ule tuj tnam Samos;
[ex o weꞌ chꞌine tuj tnam Trogilio,]
tujtzun juntl kꞌij o ule tuj tnam Mileto.
16 Porque otok cub t-ximan Pablo tuꞌn miꞌn ticꞌ tuj tnam Efeso,
ex tuꞌn miꞌn tweꞌ tuj txꞌotxꞌ Asia,
porque in txoctxon tuꞌn tpon naj tuj Jerusalén,
ka at tumel tuꞌn tpon canun tuj ninkꞌij Pentecostés.
Mancbil tyol Pablo cye ansyan aj Efeso
17 Atxtok Pablo tuj Mileto xi t-samaꞌn cabe erman tuꞌn cypon tuj tnam Efeso txcol cye ansyan te iglesi.
18 Tejtzun cyul ansyan tucꞌil Pablo,
xi tmaꞌn cye:
—Baꞌn cyuꞌne tzaꞌn tten ẍin bete cyxole tcyakil kꞌij,
atxix tuj tnejel kꞌij tej wule tuj Asia,
19 in chin ajbene te Kajaw mans kine,
ex elaꞌ maj etz taꞌl nwitze,
ex nimcu maj ma chin oque tuj joybil wiꞌje tej tbant tiꞌj cyuꞌn xjal judiy tuꞌn ncub byoꞌne cyuꞌn.
20 Pero mintiꞌ cub nxcꞌayin wibe tuꞌn t-xi nmaꞌne aju at tajben cyeye,
xi nkꞌoꞌne xnakꞌtzbil cyeye jatum nnoꞌc cychmon cyib xjal,
ax icx tuj cyjaye.
21 Xi nmaꞌne cye xjal judiy ex cye txkantl xjal mya judiy ke tuꞌn tajtz tiꞌj cyanmi ex tuꞌn cyajtz meltzꞌaj tucꞌil Dios ex tuꞌn cyocslan tiꞌj Kajaw Jesucrist.
22 Jaꞌlotzun ma chinxe tuj Jerusalén,
in tmaꞌn Xewbaj Xjan tuj wanmiye ka il tiꞌj tuꞌn nxiꞌye,
mintiꞌ baꞌn wuꞌne ti oc ncꞌulbaꞌye ma chixin;
23 nok oꞌcx in tzaj tmaꞌn Xewbaj Xjan weye oc in chin icꞌe tuj junjun tnam,
in tmaꞌn tuꞌn wocxe tuj pres ex tuꞌn nbaj yajlaꞌne.
24 Pero mintiꞌ in xi ncꞌujlaꞌne jlu;
ex mintiꞌ ma cub nximane ka maꞌxix toclen nchwinklale te wexe,
oꞌcx in chin ximane tiꞌj tuꞌn tjapun baj akꞌuntl wuꞌne tucꞌil tzalajbil,
ex tuꞌn tjapun wajbeble aju o ncꞌame te Kajaw Jesús tuꞌn t-xi npacbaꞌne tkanil baꞌn tiꞌj t-xtalbil Dios.
25 Jaꞌlotzun baꞌn wuꞌne mi aꞌl jun cyxole cycyakile cꞌoquel tqueꞌyin juntl maj nwitze,
akeye o chin bete cyxole in chin pacbane tiꞌj tcawbil Dios.
26 Cyjaꞌtzun cxel nmaꞌne cyeye jaꞌlo,
mintiꞌtl woclene cyiꞌje cycyakile ka at jun ma txiꞌ tuj najen;
27 porque mintiꞌ ma cub nxcꞌayin wibe tuꞌn t-xi nmaꞌne tcyakil tyol Dios cyeye.
28 Cyjaꞌtzun,
ten cycwente cyiꞌje ex cycwentin oque ke mastl ocslal,
porque ma che oc kꞌoꞌne tuꞌn Xewbaj Xjan te cwentil cye,
tuꞌn cypastorine cyiꞌj ke ocslal etzan tuꞌn Kajaw,
akeju ma che lakꞌet tuꞌnx ju tchcꞌel.
29 Porque baꞌn wuꞌne,
oc wexe tzalu che ul txkantl xjal xitul cye ocslal,
ic cyten xjal lu ic tzaꞌn ke xoꞌj puro jawni,
jurat in baj cychyoꞌn txkan ẍneꞌl.
30 Ex ax cyxolxe cjawil cyiꞌn cyib junjun xjal,
cxel cykꞌoꞌn jun xnakꞌtzbil mya ax toc,
nok tuꞌn cyoc lpeꞌ ocslal cyiꞌj.
31 Cyjaꞌtzun,
ten cycwente cyiꞌje,
cynaꞌntze,
tuj ox abkꞌi mintiꞌ in kꞌajene tuꞌn t-xi nkꞌoꞌne tnabl teyle junjun,
in yoline cyucꞌile kꞌijl ex konicꞌan,
ex etz taꞌl nwitze.
32 Jaꞌlotzun,
erman,
tuj tkꞌab Dios che cyjel wokxenane,
ex cyjel nkꞌoꞌne tyol Dios cyucꞌile,
aju kꞌolte xtalbil ex at tipumal tuꞌn cychꞌiye tuꞌn ex tuꞌn ttzaj kꞌoꞌn jun etzbil cyeye cyxol cycyakil keju paꞌmaj ke tuꞌn Dios tuꞌn cyajben oꞌcx te.
33 Mintiꞌ o pon ncꞌuꞌje tiꞌj sak tpwak jun xjal ex ka tiꞌj kꞌan pwak at tucꞌil ex ka tiꞌj t-xbalun.
34 Baꞌn cyuꞌne ma chin akꞌnane tuꞌn nkꞌabe tuꞌn tcnet aju at tajben weye ex cye keju ateꞌ wucꞌile.
35 Tuj tcyakil ma txi nyecꞌune cyeye tuꞌn cyakꞌnane icju,
ex tuꞌn cyonine cye keju mintiꞌ cye,
ex tuꞌn ttzaj cynaꞌne aju tyol Kajaw Jesús chi o tma:
Mas at tzalajbil cyeye ka at chꞌin ma txi cykꞌoꞌne te juntl,
ex mya akeye tuꞌn cycꞌmonteye chꞌin ctzajel kꞌoꞌn cyeye tuꞌn juntl,
chi Jesús,
chi Pablo cye.