—¿Ope cycꞌame Xewbaj Xjan tej cyocslane?

Atzun cye tzaj cytzakꞌweꞌn:

—Bajx kbiye ka at Xewbaj Xjan.

3 Xitzun tmaꞌn Pablo:

—¿Alcyetzun byabl ma cycꞌame?

Tzajtzun cytzakꞌweꞌn:

—Aju byabl tuꞌn Juan,

atzunju ma kcꞌame,

che chi.

4 Xitzun tmaꞌn Pablo cye:

—Ate Juan e byan xjal tuꞌn tuj aꞌ,

ex tma tuꞌn tajtz tiꞌj cyanmi,

ex xi tmaꞌn cye tuꞌn cyocslan tiꞌj ju lepchix ttzaj tiꞌj,

atzun Jesúsju,

aju Crist aju at toclen tuꞌn Dios,

chi Pablo.

5 Tejtzun cybinte jlu,

e byantzun tuj aꞌ tuj tbi Kajaw Jesús.

6 Ex cub tkꞌoꞌn Pablo tkꞌab tibaj cywiꞌ,

cubiltzun Xewbaj Xjan cyucꞌil;

ex e yolin tuj junxitl yol,

ex e oc ten chicꞌbalte aju in tzaj tmaꞌn Dios cye.

7 Tuꞌn tcyakil balo cablaj cybet xinak.

8 Ex tuj ox xjaw cocꞌx xi aj Pablo tuj ja te cꞌulbil cye xjal judiy,

in yolintok tiꞌj tcawbil Dios,

mintiꞌ t-xobil ex in cub tiꞌj cynabl tuꞌn.

9 Pero at junjun mintiꞌ ocx tuj cywiꞌ,

ex cycꞌiꞌ txi cyocslaꞌn,

e yolin mya baꞌn tiꞌj ju Ocslabl lu cywitz xjal.

Cyjaꞌtzun el tpaꞌn tib Pablo cyiꞌj,

ax icx ke ocslal e jeꞌtz tiꞌn,

ex tcyakil kꞌij xiꞌ pacbal tuj t-scwel jun xjal Tirano tbi.

10 Axtzun pacban tuj cab abkꞌi;

cyjaꞌtzun cycyakil keju najl ke tuj txꞌotxꞌ Asia o cybi tyol Kajaw Jesús,

tzaꞌnx ke xjal judiy ax icx ke xjal mya judiy.

11 Ex o tbincha Dios tbinchben nim cyipumal nok tuꞌn Pablo;

naꞌnxtok tbinchanjtz jun maj icju,

12 porque oc cykꞌoꞌn xjal ke tal cꞌalbil ex gavach tiꞌj t-ximlal Pablo,

ex xi cyiꞌn tuꞌn tcub cykꞌoꞌn cyibaj ke yab ex biꞌx in che banixtok,

ex ke juꞌẍ in che etztok tuj cyanmi xjal.

13 Pero at junjun xjal judiy nok jachak in che bet,

oc tilil cyuꞌn tuꞌn tajben tbi Kajaw Jesús cyuꞌn tuꞌn cyetz ke juꞌẍ tuj cyanmi xjal,

ex in cymaꞌn cyjaꞌ:

—Akeye juꞌẍ,

cyetze tuꞌn tipumal tbi Jesús aju in pacbanjtz tuꞌn Pablo.

14 Entons at jun xjal judiy Eseva tbi,

nejenel cye pal,

at wuk tcyꞌajal in cybinchaꞌn jlu.

15 Pero tej t-xi cymaꞌn te juꞌẍ tuꞌn tetz tuj tanmi xjal,

tzaj ttzakꞌweꞌn juꞌẍ cyjaꞌ:

—Ojtzkiꞌn Jesús wuꞌne;

ex baꞌn wuꞌne alcye Pablo;

yajtzun cyeye,

¿alcyetzun keye?

Chi juꞌẍ.

16 Atzunte xinak aju attok juꞌẍ tuj tanmi,

xi tzokpaj cyiꞌj,

ex cub cyiꞌj tuꞌn tuꞌnju at-xix tipun cywitz;

cyjaꞌtzun e jeꞌtz ok tuja,

mintiꞌ cyxbalun ex otok che cꞌixbi.

17 Cycyakiltzun keju najl tuj Efeso,

o cybi jlu,

tzaꞌnx ke xjal judiy ax icx ke xjal mya judiy;

cyjaꞌtzun tzaj nimxix cyxobil cycyakil ex in jaw cynimsaꞌntok tbi Kajaw Jesús.

18 Ex nimcu xjal otok che ocslan in che ul,

in jatz cypaꞌn cyil ex in cymaꞌn aju cybinchben mya baꞌn.

19 Ex nimcu xjal baꞌn mañ cyuꞌn nej,

tzaj cyiꞌn cylibro,

cub cypatun cywitz cycyakil xjal;

ex jaw cyiꞌn tajlal twiꞌ,

japuntzun tajlal twiꞌ 50 mil sak pwak.

20 Ex cyjaꞌtzun tten o chꞌiy tyol Kajaw ex ocxix tipumal.

21 Tbajlenxitzun jlu,

cub t-ximan Pablo tuꞌn t-xiꞌ tuj Jerusalén ticꞌlenxi aj tuj txꞌotxꞌ Macedonia ex tuj txꞌotxꞌ Acaya,

ex tma:

—Nponlenxitzune tuj Jerusalén,

ax icx ilxix tiꞌj tuꞌn nxiꞌye tuj tnam Rom.

22 E jeꞌxtzun t-samaꞌn Pablo cab erman tuj Macedonia,

akeju in che onin tucꞌil,

atok Timotey tucꞌix Erasto;

atzun te cyaj ten cabe kꞌijtl tuj txꞌotxꞌ Asia.

23 Atxtok Pablo tuj tnam Efeso,

e jaw tilj nimcu xjal tuꞌn tlaj in che ocslan xjal tiꞌj tyol Dios.

24 Porque at jun xjal txꞌinol sak pwak Demetrio tbi in binchantok cyiꞌj ke tal ja sak pwak cytxꞌotxꞌil,

tal chꞌin ke,

ic che queꞌyin ic tzaꞌn tja ju dios Diana tbi,

ex tuꞌnju negosyo lu nim pwak in cycambaꞌn keju in che onin tucꞌil.

25 E baj tchmoꞌn Demetrio ke tucꞌil cyucꞌix mastl ax cyakꞌun lu,

ex xi tmaꞌn cye:

—Akeye tat,

baꞌn cyuꞌne,

tiꞌj ju akꞌuntl lu in cnet kkꞌinumabl;

26 pero in cyqueꞌyine ex in cybiꞌne aju in tbinchaꞌn Pablo,

in tmaꞌn,

mya dios keju in che binchanjtz tuꞌn cykꞌab xjal.

Cyjaꞌtzun,

nimcu xjal ma cub tiꞌj cynabl tuꞌn ex ma che el txalpuj tuꞌn,

mya nok oꞌcx tuj Efeso,

icx tuj tcyakil txꞌotxꞌ Asia.

27 Cyjaꞌtzun mya yajcu miꞌn tzꞌajbentl kakꞌunben,

ax icx cꞌelel icꞌun tja ktxu Diana,

aju nintz dios,

ex cnajel tajwalil Diana,

aju in cꞌulunjtz cyuꞌn cycyakil xjal tuj Asia ex cyuꞌn cycyakil xjal twitz txꞌotxꞌ.

28 Tejtzun cybinte xjal ju yol lu,

tzaj nimxix cykꞌoj ex e jaw schꞌin in cymaꞌn:

—Maꞌxix toclen Diana aju cydios aj Efeso.

29 Cycyakiltzun xjal te tnam el tzpet cynabl,

ex e ocx kelan tuj lugar jatum nnoꞌc cychmon cyib tnam xjal,

tzyuꞌn Gayo cyuꞌn tucꞌix Aristarco,

aj Macedonia ke,

ex tucꞌil Pablo ke.

30 O tajbe Pablo tuꞌn tocx yolil cyxol xjal,

pero mintiꞌ xi tzokpiꞌn cyuꞌn ocslal.

31 Ax icx at junjun aj sanjelal te Asia tamiw Pablo ke,

xi cysamaꞌn jun xjal kꞌmalte te Pablo tuꞌn miꞌn tocx cyxol xjal.

32 Atzun cye xjal otok tzꞌoc cychmon cyib in che schꞌin,

junxitl in cymaꞌn junjun,

ax icx txkantl;

porque tzpetnitok taꞌ cynabl,

atzun tnimal xjal mintiꞌ el cynicꞌ tiꞌj tikuꞌn otok tzꞌoc cychmon cyib.

33 Pero at junjun cyxol xjal xi cymaꞌn te Alejandro tuꞌn tcub weꞌ yolil,

porque otok txi lamoꞌn cyuꞌn xjal judiy tuꞌn tcub ten cywitz xjal.

Xitzun tyecꞌun tkꞌab Alejandro tuꞌn cykꞌajen xjal,

o tajbe tuꞌn tyolin te tcolbil tib cywitz xjal cyucꞌix ke tucꞌil.

34 Pero tej tel cynicꞌ xjal tiꞌj ka judiy xjal,

cycyakil e jaw schꞌin junx,

balo tuj cabe or in cymaꞌn:

—Maꞌxix toclen Diana aju cydios aj Efeso.

35 Atzunte secretario te tnam,

tej cykꞌajen xjal tuꞌn,

tma:

—Akeye xinak aj Efeso,

cycyakil xjal baꞌn cyuꞌn ka ake aj Efeso cwentil tja ktxu Diana,

aju nintz dios,

ex cwentil ju tilbilal aju tzaj tzꞌak tuj cyaꞌj.

36 Ate jlu mi aꞌl jun baꞌn tmante ka mya ax toc,

cyjaꞌtzun mas baꞌn tuꞌn miꞌn cykꞌajte ex mintiꞌ tuꞌn cybinchanteye jun tiꞌxti te jurat naj.

37 Porque ma che ul cyiꞌne ke xjal lu,

mintiꞌ in che elkꞌan tuj tja kdios ex mintiꞌ in che yolin mya baꞌn tiꞌj.

38 Katzun at tkꞌoj Demetrio tiꞌj jun xjal,

cyucꞌix keju in che akꞌnan tucꞌil,

atzun til jusgad at,

ex ateꞌ ke jwes;

baꞌn tuꞌn ttzaj cymaꞌn alcye cykꞌoj at tiꞌj juntl.

39 Ex ka at juntl cyajbile,

jacu bant tiꞌj cywitz ke nacꞌul tiꞌj ley oc toc sesyon cyuꞌn.

40 Mya yajcu ko cub tzꞌak tuj kil oc tpon tkanil tucꞌil jwes tiꞌj ju ma che jaw tilje tiꞌj jaꞌlo,

porque mintiꞌ jun yol baꞌn tuꞌn t-xi kmaꞌn tikuꞌn ma tzꞌoc cychmon cyibe ex ma che jaw tilje,

chi secretario.

41 Tejtzun tbaj tmaꞌn secretario jlu,

xitzun tmaꞌn tuꞌn cyetz cycyakil keju otok tzꞌoc cychmon cyib.