Tej cyjaw tilj xjal judiy tuj tnam Tesalónica
17
E icꞌxtzun tuj tnam Anfípolis ex tuj tnam Apolonia,
e pon tuj tnam Tesalónica;
atzun taꞌtok jun ja te cꞌulbil cye xjal judiy.
2 Ocxtzun Pablo tuj ja te cꞌulbil ic tzaꞌnx tmod,
ex tuj ox kꞌij te ojlabl o yolin cyucꞌil xjal judiy.
3 Xi tyecꞌun cye aju in tmaꞌn tuj Tuꞌjil ex xi tchicꞌbaꞌn ka ilxix tiꞌj tuꞌn tcyim ju Crist aju at toclen tuꞌn Dios,
ex tuꞌn tjaw ankꞌin cyxol cyimni;
ex xi tmaꞌn cye:
—Ate Jesús aju in xi nmaꞌne cyeye,
atzunte Cristju aju at toclen tuꞌn Dios.
4 Entons at junjun xjal judiy xi cyocslaꞌn,
ex oc cymojban cyib cyucꞌil Pablo ex Silas.
Ax icx e ocslan nimcu xjal grieg nimal Dios ke,
cyucꞌix nimcu xuꞌj maꞌ cyoclen.
5 Atzun cye xjal judiy akeju mya ocslal ke,
tzaj tloꞌch cycꞌuꞌj cyiꞌj Pablo,
tzaj cyucꞌin junjun xinak mya baꞌn ex cyꞌaj ke,
ex oc cychmoꞌn jun cꞌloj xjal,
ex e jaw tilj xjal cyuꞌn tuj tnam.
Ocx cypaꞌn tja Jasón,
in che jyon tiꞌj Pablo tucꞌix Silas tuꞌn cyetz cyiꞌn cywitz xjal.
6 Pero tuꞌnju mintiꞌ e cnet cyuꞌn,
ax Jasón tzaj cyjawoꞌn cyucꞌix junjun erman,
e ul cyiꞌn cywitz aj sanjelal tuj tnam,
in che schꞌin,
in cymaꞌn:
—Ke xinak lu in che txalpun cynabl cycyakil xjal twitz txꞌotxꞌ,
ax icx ma che ul tzalu;
7 ex ma che cꞌmonjtz tuꞌn Jasón tuj tja.
Cycyakil ke jlu mintiꞌ in xi cyniman tley gobierni,
porque in cymaꞌn ka at juntl rey Jesús tbi,
che chi.
8 E jawtzun tilj xjal cyuꞌn cyucꞌix ke aj sanjelal tej cybinte jlu.
9 Xitzun cykanin chꞌin pwak te Jasón ex cye mastl erman te prent,
ex e jeꞌxtzun cytzokpiꞌn.
Tej tpon Pablo tucꞌix Silas tuj tnam Berea
10 Ex jurat naj te konicꞌan e jeꞌx samaꞌn Pablo tucꞌix Silas cyuꞌn erman tuꞌn cypon tuj tnam Berea.
Ex tej cypon Pablo,
e ocx tuj ja te cꞌulbil cye xjal judiy.
11 Mas baꞌn ke xjal judiy lu cywitz ke aj Tesalónica,
porque cyache tuꞌn cycꞌmonte Tyol Dios xi tmaꞌn Pablo cye,
in che queꞌyin tuj Tuꞌjil tyol Dios tcyakil kꞌij tuꞌn tel cynicꞌ tiꞌj ka ax toc aju yol xi tmaꞌn Pablo cye.
12 Cyjaꞌtzun nimcu xjal judiy e ocslan,
ax icx e ocslan nimcu xjal grieg maꞌ cyoclen,
tzaꞌnx ke xuꞌj ax icx ke xinak.
13 Pero tej cybinte xjal judiy tuj tnam Tesalónica ka icx tuj tnam Berea in pacbanjtz tyol Dios tuꞌn Pablo,
e pontzun tuj Berea,
ax icx e jaw tilj xjal cyuꞌn.
14 Pero jurat naj xi samaꞌn Pablo cyuꞌn erman tuꞌn t-xiꞌ ttzi mar;
atzunte Silas tucꞌix Timotey ax e cyaj ten tuj Berea.
15 Atzun cye keju e jeꞌx wabalte Pablo,
xi cyiꞌn tuj tnam Atenas.
Tejtzun cyajtz,
tzaj tmaꞌn Pablo cye tuꞌn t-xi cymaꞌn te Silas ex te Timotey tuꞌn cypon naj tucꞌil.
Tej tpon Pablo tuj tnam Atenas
16 In ayontoktzun Pablo cyiꞌj Silas tucꞌix Timotey tuj tnam Atenas,
tzaj taꞌw tuj tanmi tej tqueꞌyinte nojni tuj tnam cyuꞌn ke tilbilal.
17 Cyjaꞌtzun o yolin nim tuj ja te cꞌulbil cyucꞌil ke xjal judiy ex cyucꞌil txkantl xjal nimal Dios,
ex in yolin tuj plas tcyakil kꞌij cyucꞌil ke xjal in che pon.
18 E pontzun junjun xjal xnakꞌtzal tiꞌj nabl,
jun cꞌloj in che oc lpeꞌ tiꞌj cyxnakꞌtzbil Epicurey ex juntl cꞌloj in che oc lpeꞌ tiꞌj cyxnakꞌtzbil Estoicos,
e yolin tucꞌil Pablo.
At junjun in cymaꞌn:
—¿Ti taj tuꞌn ttzaj tmaꞌn ju chmol yol lu?
Ex txkantl in cymaꞌn:
—Ic tzaꞌncu pacbal tiꞌj junxitl dios te jlu.
O cyma jlu porque in pacbantok Pablo tiꞌj tkanil baꞌn tiꞌj Jesús ex tiꞌj tuꞌn cyjaw ankꞌin xjal.
19 Xitzun cyucꞌin e pon tuj jun lugar Areópago tbi jatum nnoꞌc cychmon cyib tnam xjal,
ex cyma:
—¿Baꞌnpe tuꞌn kbinteye alcye acꞌaj xnakꞌtzbil in tmaꞌna?
20 Porque ma kbiye junxitl tbinjtz xnakꞌtzbil in tmaꞌna.
Kajbiltzune tuꞌn kbinteye ti t-xilen jlu,
che chi.
21 Porque cycyakil aj Atenas ex ke stranjer xjal najl ke cyxol,
oꞌcx toc cynabl tiꞌj tuꞌn cybinte jun acꞌaj tkanil ex tuꞌn cyyolin tiꞌj.
22 Jawtzun weꞌ Pablo cyxol xjal tuj lugar Areópago ex tma:
—Akeye xinak aj Atenas,
tuj tcyakil ma tzꞌel nnicꞌe tiꞌj cꞌujlaꞌnxix ke cydiose cyuꞌne.
23 Porque tej ẍin bete ma che wile ke tilbilal in che cꞌulune cywitz,
ex ma wile jun altar tzꞌiban jun yol twitz in tmaꞌn:
Te jun Dios mi jun xjal ojtzkilte.
Aju Dios in che cꞌulune twitz ex mintiꞌ ojtzkiꞌn cyuꞌne,
atzunju in xi npacbaꞌne cyeye.
24 Aju Dios binchante txꞌotxꞌ ex tcyakilju at twitz,
tajaw cyaꞌj ex tajaw txꞌotxꞌ mya ax najl tuj jun ja cybinchben xjal,
25 ex mintiꞌ cyajben xjal te,
porque mintiꞌ chꞌin atx taj te;
porque ax in kꞌonte kchwinklal ex kxew kcyakil ex tcyakilju at.
26 Ex junx xjal tbincha Dios te cyiyjil cycyakil xjal tuꞌn cyten tuj tcyakil twitz txꞌotxꞌ,
ex cyaj techan Dios cykꞌijlalil ex tmojonil cytanmi;
27 tuꞌntzun cyjyon tiꞌj Dios,
ka at tumel xmacan tuꞌn tcnet cyuꞌn,
ax toc ate Dios mya najchak taꞌ ttxlaj junjun ke.
28 Porque tuꞌn Dios itzꞌ koꞌ,
ex tuꞌn in ko yucch,
ex tuꞌn atoꞌ;
ic tzaꞌn o cyma junjun xjal tzꞌibal yol te cybitze che chi cyjaꞌ:
Porque ax toc tiꞌj Dios tzaj kiyjil,
che chi.
29 Cyjaꞌtzun tiꞌj Dios tzaj kiyjil,
miꞌntzun ko ximan tiꞌj ka ic tten Dios ic tzaꞌn jun tilbilal kꞌan pwak ex ka sak pwak,
ex ka abj ttxꞌotxꞌil,
ic tzaꞌn in cub cybinchaꞌn xjal ic tzaꞌnx in cub cyximan.
30 Pero mintiꞌ oc tkꞌoꞌn Dios tcwent tiꞌj cykꞌijlalil xjal ojtxi tuꞌnju mintiꞌ el cynicꞌ tiꞌj;
atzun jaꞌlo ma tzaj tmaꞌn Dios tuꞌn tajtz tiꞌj cyanmi cycyakil xjal tuj tcyakil lugar.
31 Porque ma cyaj techan Dios jun kꞌij tuꞌn cyoc cycyakil xjal tuj xjel tuj tumelxix tuꞌn jun xinak,
aju ma tzꞌoc tkꞌoꞌn Dios te jwes;
ex ma tzaj tyecꞌun cye cycyakil xjal ka ax toc,
tuꞌnju ma jaw ankꞌin tuꞌn cyxol cyimni,
chi Pablo xi tmaꞌn cye.
32 Tejtzun cybinte xjal in yolin Pablo tiꞌj tuꞌn cyjaw ankꞌin ke cyimni,
at junjun e oc ten xmayil tiꞌj,
ex junjuntl in cymaꞌn:
—Kajbile tuꞌn kbinteye oc tyolina juntl maj tiꞌj jlu,
che chi.