Tej t-xi ucꞌin Timotey cyuꞌn Pablo ex Silas
16
Ax icx o pon Pablo tucꞌix Silas tuj tnam Derbe ex tuj tnam Listra;
atzun taꞌ jun ocslal Timotey tbi,
tal jun xuꞌj judiy ex ocslal,
atzun tman Timotey grieg xjal.
2 Atzun cye erman tuj tnam Listra ex tuj tnam Iconio in che yolin baꞌn tiꞌj Timotey.
3 O tajbe Pablo tuꞌn t-xiꞌ Timotey tucꞌil;
xitzun tiꞌn tuꞌn t-sircunsidarinjtz tuꞌn cylaj ke xjal judiy axtok ateꞌ;
porque baꞌntok cyuꞌn cycyakil ka grieg xjal tman.
4 Ex tej cyicꞌ tuj junjun tnam,
xi cymaꞌn cye erman tuꞌn tjapun cyuꞌn aju cyajni bant tiꞌj cyuꞌn apostl ex cyuꞌn ansyan ateꞌtok tuj Jerusalén.
5 Cyjaꞌtzun e cyuwsanjtz ke ocslal tuj cyocslabl tuj junjun tnam,
ex in chmet-xi cybet junjun kꞌij.
Cub tyecꞌun tib jun xjal aj Macedonia twitz Pablo ic tzaꞌn tuj witzicꞌ
6 Entons e mayonjtz Pablo tuꞌn Xewbaj Xjan tuꞌn miꞌn t-xi cymaꞌn tyol Dios tuj txꞌotxꞌ Asia.
Cyjaꞌtzun e icꞌx tuj txꞌotxꞌ Frigia ex tuj txꞌotxꞌ Galacia.
7 Tejtzun cypon ttxlaj txꞌotxꞌ Misia,
o cyajbe tuꞌn cyxiꞌ tuj txꞌotxꞌ Bitinia,
pero mintiꞌ tcuyi Xewbaj Xjan tuꞌn cyxiꞌ.
8 E icꞌxtzun ttxlaj Misia,
e cuꞌpun tuj tnam Troas.
9 Ex at jun o til Pablo ic tzaꞌn tuj witzicꞌ te konicꞌan:
Lu jun xinak aj Macedonia waꞌltok in cubsan twitz ex in tmaꞌn:
Ticꞌtza tuj Macedonia ex ko tonintza,
chi xjal.
10 Tej tlonte Pablo jlu ic tzaꞌn tuj witzicꞌ,
oc tilil kuꞌne tuꞌn kxiꞌ naje tuj txꞌotxꞌ Macedonia,
cub kximane ka ax toc ate Dios in txocon keye tuꞌn t-xi kpacbaꞌne tkanil colbil cye.
Tej tten Pablo tucꞌix Silas tuj tnam Filipos
11 O extzune tuj tnam Troas,
oꞌxtzune tuj barc,
acu o canune tuj jun tal txꞌotxꞌ tmijil mar Samotracia tbi,
ex te juntl kꞌij o pone tuj tnam Neápolis.
12 O extzune tuj tnam Neápolis,
o pone tuj tnam Filipos,
aju tnam lu mas maꞌ toclen cywitz mastl tnam tuj txꞌotxꞌ Macedonia,
ex aj Rom ke xjal lu;
ex axtzun o cyaj tene cab kꞌij.
13 Ex tuj jun kꞌij te ojlabl o exe tiꞌjxi tnam,
o pone ttzi jun nima jatum in che pon xjal naꞌl Dios.
O cubtzun keꞌye,
ex o yoline cyucꞌil xuꞌj akeju otok pon cychmon cyib.
14 At jun xuꞌj in bin,
Lidia tbi,
cꞌayil xbalun puro tbanil ex wiꞌyilxix,
aj Tiatira te xuꞌj lu,
ex cꞌulul te Dios;
ex o tkꞌajtza Kajaw tuj tanmi xuꞌj tuꞌn toc tkꞌoꞌn tcwent tiꞌj ju in tmaꞌn Pablo.
15 Tejtzun tbyan Lidia cyucꞌix keju ateꞌ tuj tja,
o cubsan kwitze chi cyjaꞌ:
—Ka ocslalxix kine tiꞌj Kajaw tuj cywitze,
cyocxe tuj njaye,
ex ax che posadiyine,
chi Lidia.
Ex o cubsanxix kwitze tuꞌn kcyaj tene tucꞌil.
16 Entons at jun kꞌij cyjaꞌ kxiꞌye naꞌl Dios,
oc noj kwitze jun txin majen,
at juꞌẍ tuj tanmi baꞌn kꞌijin;
ex nim pwak in cycambaꞌn ke tpatrón txin tuꞌnju tkꞌijbil.
Conversión del carcelero (Cybinchiben 16.16-40)
—Akeju xjal lu tmajen Dios ke,
aju Dios Maꞌxix Toclen,
in xi cypacbaꞌn cyeye aju be te colbil.
18 Ex nim kꞌij tma txin icju,
pero mya baꞌn eꞌla tuj twitz Pablo;
cyjaꞌtzun ajtz tqueꞌyin Pablo,
ex xi tmaꞌn te juꞌẍ:
—Cxel nmaꞌne teya tuꞌn tipumal Jesucrist tuꞌn tetza tuj tanmi txin.
Ex jurattzun etz naj juꞌẍ.
19 Pero tej cyqueꞌyinte ke tpatrón txin otok tzꞌetz juꞌẍ tuj tanmi txin ex atzun kꞌukltok cycꞌuꞌj tiꞌj tuꞌn tul cypwak,
tzyettzun Pablo cyuꞌn tucꞌix Silas,
e jeꞌx cyiꞌn tuj plas cywitz aj sanjelal;
20 xitzun cyiꞌn cywitz ke jwes ex cyma:
—Akeju xinak lu judiy xjal ke,
ma che jaw tilj xjal cyuꞌn tuj ktanmi,
21 in cymaꞌn tuꞌn kbinchante aju mya kꞌoꞌn ke tuꞌn kcꞌmonte ex tuꞌn kbinchante,
porque aj Rom koꞌ,
che chi.
22 E pontzun tilj xjal cyiꞌj Pablo;
atzun cye jwes xi cymaꞌn tuꞌn tel sbitꞌun cyxbalun ex tuꞌn cybaj asyalin tuꞌn tkꞌab tzeꞌ.
23 Ex cybajlenxi asyalin nim,
e ocx cykꞌoꞌn tuj pres,
ex xi cymaꞌn te xkꞌukil pres tuꞌn cyoc cwentinxix.
24 Tejtzun tcꞌmonte xkꞌukil pres aju orden lu,
e ocx tkꞌoꞌn tuj calabós max tujxi,
ex ocx tkꞌoꞌn cykan tuj sep.
25 Pero te tmij akꞌbil in naꞌn Pablo Dios tucꞌix Silas,
ex in che bitzan te Dios;
ex ke mastl pres in che bintok cyiꞌj.
26 Entons minaben tzaj jun cyaknajnab nimxix,
biꞌx e baj yucch ke t-simyentil cyja pres;
ex jurat naj jaket tcyakil pwert,
ex e jeꞌl pujl caden cyiꞌj cycyakil pres.
27 Ultzun tnabl ju xkꞌukil pres ex tej tqueꞌyinte otok che jaket tpwertil ja jatum ateꞌ ke pres,
jatz tiꞌn t-spad,
o tajbe tuꞌn tcub tbyon tib,
tuj tnabl ka otok che etz ok ke pres.
28 Atzunte Pablo jaw tkꞌajkꞌajel twiꞌ cyuw ex tma:
—Miꞌn tcꞌixbisa tiba,
lu koꞌye atoꞌye kcyakile.
29 Xitzun tkanin xkꞌukil pres jun ttxan tzaj,
ex ocx kelan max tujxi,
ex cub ẍmejeꞌ twitz Pablo ex twitz Silas in luꞌlun tuꞌn tchi.
30 E jeꞌtztzun tiꞌn,
ex xi tkanin cye:
—Akeye tat,
¿ti oc nbinchaꞌye tuꞌn nclete?
31 Xitzun cymaꞌn Pablo te:
—Ocslama Kajaw Jesucrist,
ex oc cleteltzuna,
aya ex keju ateꞌ tuj tjaya.
32 Xitzun cymaꞌn tyol Kajaw te ex cye cycyakil keju ateꞌ tuj tja.
33 Ax or te konicꞌan baj ttxꞌjoꞌn cycꞌixblen;
ex jurat o byan cyucꞌix cycyakil keju ateꞌ tuj tja.
34 E jeꞌxtzun tiꞌn tja,
xi tkꞌoꞌn cywa;
ex o tzalajxix cyucꞌix keju ateꞌ tuj tja tuꞌnju otok che ocslan tiꞌj Dios.
35 Tejtzun kskix,
xi cysamaꞌn jwes cabe polisiy kꞌmalte te xkꞌukil pres tuꞌn t-xi tzokpet Pablo tucꞌix Silas.
36 Xitzun tmaꞌn xkꞌukil pres ju yol lu te Pablo:
—Ma tzaj cysamaꞌn jwes cabe xjal kꞌmalte tuꞌn cyxi tzokpete;
cyjaꞌtzun baꞌn tuꞌn cyexe jaꞌlo,
miꞌn che bisune,
chi xjal.
37 Atzunte Pablo xi tmaꞌn cye polisiy:
—Ma ko baj asyaline cyuꞌn cywitz cycyakil xjal ex mintiꞌ ksentense tcub,
ex ax aj Rom koꞌye ma ko ocx kꞌoꞌne tuj pres,
¿jaꞌlotzun,
maj tuj ewajtzun ko elex lajoꞌne cyuꞌn?
Mlay.
E cytzaj xjal lu kꞌil keye tuꞌn kexe,
chi Pablo.